1. Petro 5
5
I lab ap i phoureder, kay denn yak ap i patslende
1Kanna rakrau ap kolende, kay hi i phoureder mank t'mende. Me hom ninna i phoureder, oun dikom mire yakentsa, har o Yezous Kristo ap o troushel meras. Oun ap ko dives, kay vell peskro tselo raylepen diklo, hom me ninna pash leste. T'menge penau zoreles: 2Denn garda ap i patslende, kay o Devel peske khetne anas! T'mer han har i bakrengre. Oun o Debleskre čave hi har bakre, hoy o Devel an t'mare vasta das. Denn len kova, hoy len hounte vella, te ačell lengro patsepen djido! Krenn kova o tselo djiyestar! Yaake kamell les o Devel. Krenn kova gar, har te vals i phari boudi, hoy hounte krenn! Krenn koy boudi dran o kamlepen oun gar, te venn t'mer playsedo! 3Ma avenn raya pral i patslende! Sikrenn lende, har t'mer djivenna, te djivenn yon ninna yaake! 4Oun ap ko dives, kay vell o pralstouno bakrengro, lenn t'mer leskro raylepen, hoy ačella hako tsireske.
5Kol terne menshenge penau me: Krenn kova, hoy kol phoureder phrala t'menge penenna!
I lab ap hakeneste
Hakeneske penau: Kek te krell, har te vell lo bareder har ko vavar! O Devel hi gar ap i rig kolendar, kay krenn pen bares. Na-a, yob hi lačes kolenge, kay krenn pen gar bares. 6Doleske krenn t'men tikno tel o Debleskro zorelo vast! O Debleskro tsiro vella, kay yob t'men bares krella. 7Lauter, hoy hi t'men phares ap o dji, vitsrenn ap leste! Yob krell lauter mishto. 8Denn garda, oun avenn gar khino! O beng kamell t'men te marell. Oun yob djal trouyel har i divyi bari margodja, hoy hi lat bok, oun rodella, kones yoy nay rhal pre. 9Ma krenn, hoy o beng t'mendar kamella! Ačenn zoreles an o patsepen! T'mer hounte djinenna, kay lenn le t'mare phralen oun phenya ap i tseli phoub ninna yaake palla har t'men.
10I tikno tsiro vell pharo koova ap t'mende. An kava tsiro lenn t'mer i zoor, te ačenn ap o Debleskro drom. O Devel, kolestar vell o tselo lačepen, yob das t'men gole, te djivenn hako tsiro khetne o Yezous Kristeha oun lenn leskro raylepen. Yob dell t'men ninna i zoor, te ačenn zoreles an o patsepen oun an o djipen. 11I tseli zoor hi leske kanna oun hako tsiro! Amen!
Ačenn pash o Debleste!
12Maro lačo phraal, o Silvano, vas mange ap i rig, te činell lo kava tikno liil. An kava liil kamoms te penap t'menge an o dji, te djinenn čačepah: O Devel hi t'menge lačo. Ačenn pash leste! 13I patsle, kay venn khetne an o foro Babilon, penenn t'menge lače laba. Yon van o Deblestar vin rodedo har t'mer. Ninna miro čavo Marko penell t'menge lače laba. 14Te venn t'mer khetne, denn t'men i čoum, te dikell hakeno, kay t'mer phrala oun phenya han!
O Debleskri barht t'menge lauterenge, kay djan ap o Yezous Kristeskro drom!
Currently Selected:
1. Petro 5: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
