1. Korintarya 7

Rom oun romni

1T'mer poučan mandar an t'maro liil: “Vals mishto i morsheske, te romedinerals yob gar?” Oun koy pre penau me: 2Hi feteder, te hi hako morshes peskri romni oun haki djouvyat peskro rom, har te krenn le vi-ladjedo koova. 3O rom te vell peskri romyake koy. Oun i romni te vell peskro romeske koy. 4Koy romyat hi gar pral peste penepaske. Ko čačepen hi o romes. Vitar gar hi ko romes pral peste penepaske. Ko čačepen hi i romyat. 5Kek t'mendar te rikrell pes kol vavarestar pale! T'mer nay rikrenn t'men i tikno tsiro pale, te kamenn t'mer douy kova, te mangenn o Debles an. Oun pal kova avenn pale khetne har rom oun romni! Te krenn t'mer kova gar, palle nay vell, te han bouder gar o ray pral t'mende oun perenn an o bengeskro vast. 6Me penau t'menge kova, te nay krenn kova yaake, oun gar, te hounte krenn les. 7Ninna te kamoms, te vals hakeno gar romedino, yaake har me gar romedino hom, kova djal gar. Mer ham gar yek har o vavar. Yaake har o Devel kamella, hi yek romedino oun ko vavar romedinerell gar. 8Kolenge, kay gar romedino hi, penau me: T'menge vals mishto, te romedinerenn t'mer gar. Kol djouvyenge, kolengre romma meran, penau me: T'menge hi feteder, te romedinerenn t'mer bouder gar. 9T'mer te djivenn nay gar kokres, palle romedinerenn. Hi feteder, te romedinerenn t'mer, har te doukell o morsheskro dji pal i djouvyate oun i djouvyakro dji pal i morsheste.

10-11Kolenge, kay romedino hi, penell o ray Yezous, gar me, te moukell i romni peskro romes gar. Vitar gar hounte tradell i rom peskri romyat pestar. Te moukas i romni peskro romes, hounte ačell yoy peske kokres. Te kamell li gar kokres te ačell, palle rakrell li pes peskro romeha vin, oun djal pash leste pale.

12Kol vavarenge penau me, gar o ray Yezous: Te hi i patslo phrales i romni, kay gar patslo hi, oun yoy kamell pash leste te ačell, palle tradell yob lat gar krik. 13Oun te hi i patsli romyat i rom, kay gar patslo hi, oun yob kamell pash late te ačell, hounte moukell yoy les gar. 14O Devel dikell lačes ap o romeste, kones i patsli romni hi. Oun o Devel dikell lačes ap i romyate, kay lat i patslo rom hi. Te vals kova gar yaake, vans t'mare čave har i čave kolendar, kay prindjrenn o Debles gar. Kova hi gar yaake. Glan o Debleste hi le har čave, kolengro dad oun day, kolla douy, patslo hi. 15Te kamell kova, kay gar patslo hi, o patsles te moukell, yaake nay djal lo peske. Ko patslo hi gar pandlo ap leste. O Devel kamell gar, te čingrenn t'men.

16I patsli djouvel nay djinell gar, te anell li nay peskro romes ap o Yezouseskro drom. Oun o patslo morsh nay djinell vitar gar, te anell lo nay peskri romyat ap o Yezouseskro drom.

I lab ap i boudepangre

17Kova, hoy t'menge kanna penau, penau me i tsele patslenge, kote, kay yon khetne venna. Mer lauter hounte djivas maro djipen ap koy platsa, kay maro ray Yezous men čivas, oun hounte ačas koy pashel, hoy mer hams, har o Devel men gole das: 18Te vas yek ap o mass činlo#7:18 Kova his i biboldenge o sikepen, kay yon o Debleskre menshe hi, dik: 1. Mose 17:10-14 pal i biboldengro čačepen, ačell lo pashel. Te vas yek gar ap o mass činlo, moukell pes yob gar te činell. 19Kolla hi gar boudeder moldo, kay ap o mass činlo hi, har kolla, kay gar činlo hi ap o mass. Glan o Debleste molella, te rikress tout ap leskro lab. 20Hakeno hounte ačell koy pashel, hoy yob his, har o Devel les gole das. 21Te hals tou i pandlo boudepaskro, har o Devel tout gole das, hounte doukrell tout kova gar! Te penell tiro ray, kay tou leske boudreh: “Tou nay dja touke!” palle nay djah touke tou, oun hal bouder kek pandlo boudepaskro! 22Koon i pandlo boudepaskro his ap ko tsiro, har o Yezous Kristo les gole das, kova hi glan leste bouder kek pandlo boudepaskro. Oun koon kek pandlo boudepaskro his ap ko tsiro, har o Yezous Kristo les gole das, kova hi kanna o Yezous Kristeskro boudepaskro.

23O Devel playsras t'menge peskro čaveskro rateha. Ma denn t'men an i menshengre vasta! 24Mire phrala, hakeno ačell o Debleha oun ačell pashel, hoy yob his, har o Devel les gole das.

Hoy o Paulo kolenge penella, kay gar romedino hi

25Pral kol ternende, kay gar romedino hi, hi man kek lab, hoy maro ray Yezous mange penas. Me penau, har me kova dikau. Oun maro ray Yezous his yaake kamlo ap mande oun kras dran mande i morsh, ap koleste i menshe shounenna. Doleske nay patsenn man. 26Me penau t'menge: An kava pharo tsiro hi feteder, te ačell hakeno yaake, har yob hi. 27Hal tou romedino, ač pash tiri romyate oun ma dja krik latar! Te hal tou gar romedino, rode touke kek romyat! 28Te romedinereh, yaake aneh tou kek doosh ap toute. Oun te romedinerella i čay, anell li kek doosh ap peste. Kolenge vell boud pharo koova an lengro djipen. Oun me kamau, te vell kova gar ap t'mende. Doleske rakrau yaake.

29Kova penau me t'menge, mire phrala: Hi bouder gar boud tsiro. Kanna hounte djivell i romedino morsh yaake, har te vals les kek romni, yaake te nay boudrell lo o Debleske. 30Oun kolla, kay lenge ropaske hi, djivenn yaake, har te vans lenge gar ropaske. Oun kolla, kay barhtelo hi, djivenn yaake, har te vans yon gar barhtelo. Oun kolla, kay čomone o djipaske dren ginenna, krenn kova yaake, har te nay rikrans yon kova gar. 31Kay phoub oun lauter, hoy koy pre hi, ačella gar. Doleske pandenn t'men gar ap ko koova, hoy i menshenge ap kay phoub yaake boud moldo hi! 32Me kamoms, te vell t'maro dji gar pharo. Koon gar romedino hi, nay vell o Yezouseske, maro rayeske, o tselo djiyestar koy. 33Koon romedino hi, koleskro dji hi pherdo phoubyakro koova. Yob dikell ap kova, hoy leskri romni kamella. I paash djiyeha hi lo pash peskri romyate, ko vavar paash hi pash o Yezouseste. 34Oun koy djouvel, kay gar romedini hi, dikella, hoy nay krell yoy o Yezouseske, maro rayeske. Oun yoy krell kova peskri tseli zoryah, oun kamell peskri tselo djiyeha leske koy te vell. I djouvel, kay romedini hi, kolakro dji hi pherdo phoubyakro koova. Yoy dikell ap kova, hoy lakro rom kamella. 35Kova penau me t'menge gar, te krap t'maro djipen phares. Na-a, kova penau, te djal t'menge mishto. Kamoms, te djan o čačo drom, te djivenn o Yezouseske, maro rayeske, oun te ačenn zoreles pash leste.

36Te penell yek: “Kova hi gar mishto, te romedinerap me miri pirni gar, kay lat yaake zoreles kamau,” koleske penau me: Te romedinereh lat, aneh tou kek doosh ap toute.

37Te hi i morshes ap peskro dji, te romedinerell lo gar, oun leske hi kova gar pharo, te ačell lo kokres, koleske hi mishto, te romedinerell lo gar. 38Kova hi yaake: Te romedinerell yek, hi kova mishto. Te romedinerell yob gar, hi kova feteder. 39I romni hi ap peskro romeste pandlo yaake rah har yob djivella. Te merell o rom, hi li bouder gar pandlo ap leste. Oun yoy nay romedinerell, kones yoy kamella. Ap yek koova hounte rikrell li pes: Yoy hounte lell peske i patslo romes. 40Yoy hi barhtleder, patsau me, te ačell yoy peske kokres oun romedinerell gar. Yaake dikau me kova. Oun man hi ninna o Debleskro Dourho.

Currently Selected:

1. Korintarya 7: Sint-Man2024

Highlight

Copy

Want to have your highlights saved across all your devices? Sign up or sign in

Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.

Learn More About O Debleskro Lab 2024 (Sinte-Manouche)