1. Korintarya 14
14
O rakepen, hoy o Debleskro Dourho i patslende della
1Krenn lauter, te lenn o Debleskro kamlepen an t'maro dji! Oun rodenn i tselo djiyestar kol zorya, hoy o Debleskro Dourho an t'mende čivella, te nay boudrenna o Debleske! Boudeder har hako vavar koova rodenn koy pal, te penenn nay i menshenge i lab, hoy vella o Deblestar.
2Kova, kay rakrella an i rakepen, hoy o Debleskro Dourho les das, oun hoy kek hayvella, kova rakrell gar i menshenge. Yob krell kova o Debleske. O Debleskro Dourho dell les koy zoor, te rakrell lo, hoy kek mensho djinella. 3Kova, kay penell i menshenge i lab, hoy vella o Deblestar, kova rakrell yaake ap i menshende, te vell lengro patsepen zoreles, oun te venn lengre djia barhteles oun zoreles. 4Kova, kay rakrella peske an i rakepen, hoy o Debleskro Dourho les das oun hoy kek hayvella, koleske djal feteder an peskro dji. Kova, kay penell i patslenge i lab, hoy o Deblestar vella, krell kova, te vell kolengro patsepen zoreles.
5Ninna te kamoms me, te rakrans t'mer lauter an i rakepen, hoy o Debleskro Dourho das, kamoms me boudeder, te penans nay t'mer lauter i menshenge i lab, hoy vella o Deblestar. Hi boudeder moldo, te penell yek i lab, hoy vella o Deblestar, har te rakrell yek an i vavar rakepen, hoy kek hayvella. Hi vavarčandes, te hi yek koy, kay penell nay, hoy an ko vavar rakepen rakedo vas, yaake te venn i patsle zoreles an o patsepen.
6Kanna, mire phrala, har vals kova, te voms me pash t'mende, oun rakroms an i rakepen, hoy kek hayvella? Kova molals t'menge či. T'menge hi boudeder moldo, te rakrap an i rakepen, hoy t'mer hayvenna, oun te penap t'menge, hoy o Devel mande sikras, oun hoy lestar djinau. Oun t'menge hi ninna boudeder moldo, te penap t'menge i lab, hoy vella o Deblestar, oun te sikrap t'men, har te djan ap o Debleskro drom.
7Kova hi yaake har o bashepen. Te bashrell yek gar mishto, hayvell kek, hoy bashedo vella. 8Te djan i lourde an o kourepen, palle phourdell yek ap i bashepaskri. Oun yob te phourdella yaake djoungeles, te hayvell les kek, palle djal kek an o kourepen. 9Yaake hi kova ninna t'mentsa. Te rakrenn t'mer an i rakepen labentsa, hoy kek hayvella, har nay hayvell yek, hoy t'mer penenna? T'mer rakrenn čičeske. 10Dell boud menshe an boud themma. Oun hakenes hi peskro rakepen. 11Te hayvau me gar ko vavareskro rakepen, hom me koleske i vi-themari. Oun ninna yob hi mange i vi-themari. 12Yaake hi kova ninna t'mentsa. T'mer kamenn o tselo djiyestar kol zorya te lell, hoy o Debleskro Dourho della. Krenn lauter, te lenn boud kolestar, hoy krell i patslen zoreles an o patsepen!
13Hi yaake: Koon an i rakepen rakrella, hoy das les o Debleskro Dourho, kova hounte mangell o Deblestar, te nay penell lo i menshenge kova, hoy koy rakedo vas. 14Me te rakrau an i rakepen, hoy o Debleskro Dourho man das, palle krell kova o Debleskro Dourho an mande. Oun me hayvau gar, hoy me penom. 15Hoy hounte krap me kanna? Me kamau te rakrap o Debleha an i rakepen, hoy o Debleskro Dourho man das. Ninna kamau me te rakrap leha i labentsa, hoy me hayvau. Oun me kamau leske te givap, har o Debleskro Dourho moukell man te givell. Oun ninna kamau te givap i labentsa, hoy me hayvau.
16Te shareh tou o Debles an i rakepen, hoy o Debleskro Dourho tout das, oun koy hi yek, kay hayvell kova gar, har nay penell yob Amen ap kova, hoy tou penal? 17Leskro dji vell gar zoreles, ninna te parkral tout tou o djiyestar pash o Debleste. 18Me parkrau man pash o Debleste, kay rakrau boudeder har t'mer lauter an i rakepen, hoy o Debleskro Dourho man das. 19Te hom me mank i patslende, te sikrap len o Debleskro drom, kamau kote feteder panč laba te rakrell, hoy hakeno hayvella, har deesh zerya laba an i rakepen, hoy kek hayvella.
20Mire phrala, ma avenn har tikne čave, kay gomme gar boud djinenna. Avenn gosevo har i phoure! Pash čilačo koova, avenn har tikne čave, hoy o čilačepen gar hayvenna! 21An o Debleskro lab hi činlo: Me kamau te rakrap ap kal menshende an o vavar rakepen. Oun vi-themarya penenn lenge mire laba. Oun ninna palle shounenn le gar ap mande,#14:21 dik: Yesaya 28:11 penell o Devel.
22Yaake dikenn t'mer: O Debleskro Dourho dell o vavar rakepen, te sikrell o Devel peskri zoor kolende, kay gar patsenna, oun gar i patslende. Hi vavarčandes, te penell yek i lab, hoy vella o Deblestar. Ko lab hi i patslenge oun gar kolenge, kay patsenna gar ap o Debleste. 23Dikenn, te vans i tsele patsle khetne, oun rakrans lauter an i vavar rakepen, oun koy vals yek, kay gar patslo hi oun kay prindjrell kova gar, penals kova: “Kalla hi lauter narvele!” 24Hi vavarčandes, te lell hakeno i lab o Deblestar, oun penell les glan i vavarende, oun koy vella yek, kay gar patsella oun o tselo koova gar prindjrella, koleske djal lauter an leskro dji, oun leske djan i yaka pre pral peskri doosh. 25Hoy an leskro dji khatedo hi, vell diklo. Oun yob moukell pes glan tele perell ap i phoub oun mangell o Debles an, oun penell: “O Devel hi čačepah pash t'mende!”
Har lauter djala kote, kay i patsle khetne venna
26Mire phrala, hi yaake: Te venn t'mer khetne, sharell ko yek o Debles i gilyah. I vavar sikrell, har te djan ap o Debleskro drom. Ninna i vavar penell, hoy o Devel les sikras. Pale i vavar rakrell an i rakepen, hoy o Debleskro Dourho les das. Oun i vavar nay penell, hoy koy rakedo vas. Lauter kova krenn, te venn i patsle zoreles an o patsepen! 27Te hi menshe koy, kay rakrenn an i vavar rakepen, moukenn te rakrenn douy te triin, gar boudeder har triin, yek pal o vavareste! Oun yek hounte penell, hoy rakedo vas.
28Te hi kek koy, kay penell nay, hoy koy rakedo vas, palle moukenn kekes an i vavar rakepen te rakrell. Yob nay rakrell khere peske kokres oun o Debleske.
29Kolla, kay penenna i menshenge i lab, hoy o Deblestar vella, kolendar moukenn te rakrenn douy te triin! Oun kol vavar denn garda, te hi kova čačo, hoy rakedo vella!
30Te penell yek i lab o Deblestar, oun o Devel sikrell čomone ap i vavareste, kay koy pashel beshdo hi, hounte moukell ko ersto koles te rakrell. 31T'mer lauter nay penenn yek pal o vavareste i lab, hoy vella o Deblestar. Yaake dikenn lauter, har te djan o Debleskro drom. Oun lauter venna zoreles an o patsepen.
32Kones i lab vell o Deblestar, kova nay rikrell pes pale, yaake rah har ko vavar rakrella. 33O Devel kamell kek čingepen. Yob kamell, te djal lauter mishto. Kova hi yaake an hake forya, kay i patsle khetne venna.
34Te venn t'mer khetne an o Debleskro kheer, ma moukenn i djouvyen te rakrell. Yon hounte shounenn ap kova, hoy penlo vella. Yaake hi ninna činlo an o Moseskre lila.
35Te kamell i djouvel čomone te djinell, poučell li khere peskro romestar. Kova hi gar mishto, te rakrell i djouvel an o Debleskro kheer. 36Vas o Debleskro lab t'mendar? Na-a! Vas o Debleskro lab pash t'mende kokres? Na-a! 37Te patsell yek t'mendar, kay o Devel rakrell leha, oun kay o Debleskro Dourho les o Debleskro koova sikrell, yaake hayvell yob, te hi kava gar mandar, hoy me kate činau. Kava hi o Deblestar. 38Koon kova gar kamell te dikell, ap koleste dikenn vitar gar!
39Mire phrala, mangenn o Debles, te nay penenn i menshenge i lab, hoy lestar vella! Oun moukenn kolen te rakrell, kay kamenna an ko rakepen te rakrell, hoy o Debleskro Dourho len das!
40Krenn kava yaake, te djal kova lauter mishto oun shoukar!
Currently Selected:
1. Korintarya 14: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
