1. Korintarya 13
13
I gili pral o Debleskro kamlepen
1Ninna te rakroms me nay an hako rakepen,
hoy i menshe oun i bolepangre rakrenna,
oun te vals man gar o Debleskro kamlepen an miro dji,
palle voms me har i bashepaskro,
kay bashrell gar mishto.
Leskro bashepen molella či.
2Te vals man gar o Debleskro kamlepen an o dji,
palle molals ninna kova či,
te penoms me i menshenge,
hoy o Devel mande sikras.
Te vals man gar o Debleskro kamlepen an o dji,
palle molals ninna kova či,
te djinoms halauter,
hoy i vavar gar djinenna
oun te hayvoms ko tselo Debleskro drom.
Te vals man gar o Debleskro kamlepen an o dji,
palle molals ninna kova či,
te vals man yek zorelo patsepen,
te penoms ap i berge:
Hadenn t'men, oun yon hadenna pen.
3Te vals man gar o Debleskro kamlepen an o dji,
palle molals ninna kova či,
te doms miro tselo bravlepen kol čorvelende,
oun te moukoms man me djides pre te rhačrell.
4Kones hi o Debleskro kamlepen an o dji,
kova rikrella lauter vin.
Yob hi lačo oun zilverella gar.
Yob krell pes gar bares
oun sharell pes gar.
5Kones hi o Debleskro kamlepen an o dji,
kova krell kek vi-ladjedo koova;
oun dikell gar ap peste kokres.
Yob dikell ninna ap i vavarende,
te djal lenge mishto.
Kones hi o Debleskro kamlepen an o dji,
kova moukell pes gar rhoyedo te krell.
Yob bistrell o čilačepen,
hoy i vavar leske kran.
6Kones hi o Debleskro kamlepen an o dji,
kova hi gar barhtelo pral o čilačepen.
Yob hi barhtelo pral o čačepen.
7Te hi les o Debleskro kamlepen an o dji
oun i menshe doukrenn les,
hi yob gar rhoyedo pral kova.
Kones hi o Debleskro kamlepen an o dji,
kova patsell halauter.
Yob dell o vavares gar pre,
oun rikrell lauter vin.
8Vell i tsiro, kay čivell o Debleskro Dourho i patslenge bouder kek lab an o dji.
Vell i tsiro, kay dell lo len bouder kek vavar rakepen.
Vell i tsiro, kay hounte vell men bouder kek gosvepen.
Yek ačella: o Debleskro kamlepen.
9Kanna djinah gar lauter o Deblestar,
i tikno kotar kokres.
Oun kova, hoy sikrell lo mende pestar,
hi i tikno kotar kokres.
10Yek tsiro vella, kay dikah lauter lestar
oun bouder gar tikne kotya kokres.
11Har homs i tikno čavo,
rakrom me har i čavo,
oun dikom lauter har i čavo.
Oun man his čavengro koova an o shero.
Har vom i morsh,
čivom o čavengro koova krik.
12Kanna dikah o Debleskro koova gar mishto.
Mer dikah kova yaake har an o phouro blendari.
Yek dives vella, kay dikah mer o Debles, har yob hi.
Lauter, hoy me kanna lestar djinau, hi tikne kotya.
Vell ko dives, kay prindjrau les yaake,
har yob man prindjrella.
13Kanna ačenna menge kalla triin:
– O patsepen ap o Debleste;
– i barht, te djinah mer, te vell lauter mishto;
– o Debleskro kamlepen.
O bareder kol trinendar hi o Debleskro kamlepen.
Currently Selected:
1. Korintarya 13: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
