1 Tesalonisense 2
2
O Rado e Pabloko ande Tesalonika
1Pplalalen, tumen llanen kai kana llelam tumende ni cherdamle samo gia. 2Tumen llanen kai omanglal kusle amen ta marde amen ando Filipos#Apost 16.19-40. ta o Del pomozisarda amen te ppena e lachi viasta tromanimaia ta ande iek bari nuzda.#Apost 17.1-9. 3Soke ppenaia o chachipe, ta ni cheraiale bilachimaia ta ni te kojava nika. 4A o Del pomozisarda amen ta dia amende o rado te ppena e lachi viasta, ta goia si e orba kai da. Ni kamam te ava drago e manusenge, manga te ava drago e Devleke kai llanel sa so si ande amaro lio. 5Tumen llanen kai nikada ni ppendam tumenge alava sukar te ava tumenge drago, ta ni kojadam tumen te la tumendar love. Angla o Del ppenale tumenge. 6Nikada ni rodiam e llenendar te den amen liubao: ni tumendar ni averendar. 7Amen sai cherdama te acharen kai gazdari pe tumende soke sam apostolura e Kristoke, a cherdilam sargo minone maskar tumende. Sargo iek dei kai bariarel ta arakkel pe minonen, 8isto gia amen voli tumen soke diam tumen e lachi viasta e Devleki, ta sai dia man i amaro zivoto pala tumende. 9Pplalalen, den tumen golli sar radia ta sar trudia amen te la love te zivi. Sorro llive radia te na ava tumenge iek pparipe, ta ppenaia tumenge e lachi viasta e Devleki.#2 Tesl 3.8; Apost 18.3; 20.34; 1 Krn 4.12; 2 Krn 11.7. 10O Del ta i tumen dikklen kai sa gola ezgode cherdamlen chachimaia ta orta tumenchar kai sen e llene kai pachan. 11Tumen llanen kai suakone llenea tumendar sama sargo iek dad pe chaurrenchar, 12ta ppendam tumenge te llan sar o Del mangel, vou ikkarda tumen te aven ande iek ttan lea ande leko foro ta ande leko blagosipe.
13Goleke amen da fala e Devle, soke kana asunden e porouka kai andam tumenge lienla sargo e Devleki porouka a na sargo e manusengi. A chachimaia si e porouka e Devleki, soke cherel te achardol pe tumende kai sen llene kai pachan. 14Tumen nakklen isto so nakkle e llene katar e Devleki kkanlliri kai si ande Judea, soke e llene katar tumaro foro cherde tumen te nakken patnia isto sar e judiura cherde te nakken patnia e llene katar gola kkanllira.#Apost 17.5. 15Gola judiura mundarde e Gazda e Jesuse isto sar omanglal mundarde e poraukonen ta tradie amen. E Devleke inai drago sar si von, ta si silne saurrenchar, 16soke ni muken amen te da orba e llenenchar kai inai judiura, te sai braduinpe i von. Golea von cheren te pperdol lengo bilachipe. A o Del ka patil len zurale.
O Pablo mangel te llal ande Tesalonika pale
17Pplalalen, kana fuladilam tumendar ta nakklo o vreme, tumen inai sena dur soke sena ande amaro lio ta zelia te lla te dikka tumen. 18But droma manglam te lla, ta i me o Pablo mangava te llau, a o Satanas ni mukla amen. 19Tumendar adurichara but ta tumen ka aven amari veselia ta amaro baripe angla o Gazda o Jesus kana vou ka irilpe. 20Tumen sen amaro baripe ta amari veselia.
Currently Selected:
1 Tesalonisense 2: ROM07
Highlight
Share
Copy
Want to have your highlights saved across all your devices? Sign up or sign in
Nuevo Testamento en Romané © Sociedad Bíblica Chilena, 2007.