Biă 34

Môsê ngă hơđang bohtâo phr̂âo

(Juăt 10:1-5)

1 Yêhôwa pơhiăp hr̂ŏm Môsê: «Br̂ơi ih phă hơđang bohtâo dua pŏk hla ti ahlâo,#An Biă 24:12. nŭn kâo ti čih klơi pơhiăp hla ti kâo čih mơ̆ng hơđang bohtâo ih ngă pơčah lôi ahlâo nŭn.#An Biă 32:19. 2Br̂ơi ih met-set jr̂ŏng lôi hlâo, tơl dih guah br̂ơi ih đĭ nao pơ kŏ čĭ Sinai, jr̂ŏng nŭn dŏ dŏng ti năp kâo ngŏ kŏ čĭ nŭn. 3Anăm br̂ơi lơi đĭ nao hr̂ŏm ih ôh, dăp bĭ br̂ơi ƀôh lơi bat yô tơgr̂ư̆ ƀon mơ̆ng kŏ čĭ nŭn le, wŏt bĭ br̂ơi phung triw, phung be, phung mo nao ƀŏng mr̂ơ̆k gah năp kŏ čĭ nŭn ôh.»#An Biă 19:13. 4Nŭn yơh, Môsê phă hơđang bohtâo dua pŏk hla ti ahlâo, jr̂ŏng nŭn ñu gŭ đĭ sêng-ƀr̂êng mơ̆ng guah, nao pơ kŏ čĭ Sinai, hla ti Yêhôwa pơtă br̂ơi ñu, dăp djă ba hơđang bohtâo dua pŏk mơ̆ng ngan ñu mơ̆n. 5Nŭn Yêhôwa tr̂ŭn r̂ai tăm kơthŭl gơnăm,#An Biă 13:21; 19:9. jr̂ŏng nŭn ñu dŏ dŏng ha anŭn hr̂ŏm Môsê, dăp r̂ă đĭ ƀŏ ñu, a iâo “Yêhôwa.”#An Biă 3:13-15; 6:3; 33:19. 6Yêhôwa bat dr̂ong ti năp Môsê, ñu r̂ă đĭ:

«Yêhôwa, Yêhôwa!

Yang bŭt hiam thâo pap-dr̂ap,

Ñu kaih hêl,

Ñu hmâo bŭt-tai bŏ mơ̆ng klơi khăp-pap dăp klơi kơpă-hnŏng.

7Ñu khăp-pap ngă hiam mơ̆ng mơnuih,

Khă tơl pơ ha bâo nôk,

Ñu klaih lôi klơi set klơi wĕ-wŏ dăp klơi glaĭ,

Plai mơnuih ngă glaĭ ñu bĭ yap kơpă-hnŏng ôh,

Ñu tr̂ĕ kơđi klơi glaĭ ma,

Khă tơl pơ nă čo klâo pă nôk.»#An Biă 20:5-6; 23:7.

8Nŭn Môsê bon tr̂ŭn tăñ tơl pơ kơnah, dăp kô̆p kŏ. 9Jr̂ŏng nŭn Môsê pơhiăp laĭ: «Ơ Khua Yang, jơ̆ laĭ ih bŏ bŭt mơ̆ng kâo dơdi, br̂ơi ih nao hr̂ŏm mơi wŏ, wŏt nă plơi lan ne găng kŏ#34:9 Găng kŏ Hêbrơ laĭ «Găng tơkoi.» ơ mơ̆n.#An Biă 33:15. Dueh mơ̆ng ih klaih lôi klơi set dăp klơi glaĭ mơi, br̂ơi ih tô̆ mơi jr̂ŏng dr̂ăm pơđŏk ih.»#An Biă 6:7; 19:5.

Ơi Adai kă kr̂a klơi uăn bơgop

(Biă 23:14-19; Juăt 7:1-5; 16:1-17)

10Yêhôwa pơhiăp laĭ: «Nêne kâo ti kă klơi uăn bơgop. Kâo ti ngă klơi myang mơsêh ti năp bih nă plơi lan ih, buă nŭn a bĭ juăt ngă ôh, ti năp nă mơnuih tơgr̂ư̆ sô̆n-sat dŏ jŏp-jang mơ̆ng lŏn kơnah. Bih nă plơi lan dŏ hr̂ŏm ih ti ƀôh buă kâo Yêhôwa, yua buă kâo ti ngă hr̂ŏm ih nŭn myang mơsêh jat.

11«Br̂ơi gô-ih djă čr̂oh wŏ klơi kâo pơtă br̂ơi gô-ih r̂ơi ne. Nêne, kâo ti pơpŏl lôi môt sô̆n-sat Amôri, môt sô̆n-sat Kanan, môt sô̆n-sat Hêt, môt sô̆n-sat Pêrĭsit, môt sô̆n-sat Hêwi, dăp môt sô̆n-sat Yêƀuh, br̂ơi biă đuĕ ti năp gô-ih. 12Lơwăng hŏ, anăm kă klơi uăn bơgop hr̂ŏm mơnuih dŏ pơ lŏn-ia gô-ih ti mŭt nao nŭn ôh, huĭ dah gơñu dŏ hr̂ŏm gô-ih, jr̂ŏng nŭn gô-ih ti djơ̆ đong gơñu. 13Plai dŏng, br̂ơi gô-ih ngă bơbuh lôi pr̂a ngă yang gơñu, dăp teh pơčah lôi bohtâo dô gơñu bơdŏng đĭ tang br̂ơi yang gơñu, wŏt ngă bơjoh lôi gŏk Asêra yang gơñu mơ̆n.#An Juăt 16:21-22. 14Gô-ih anăm bon ti năp yang pơkŏn ôh, yua kâo Yêhôwa, kâo yang hmâo bŭt gal, nĭng nŭn yơh, a iâo ƀŏ kâo “Yang Gal.”#An Biă 20:3-5. 15Anăm kă klơi uăn bơgop hr̂ŏm mơnuih dŏ mơ̆ng lŏn-ia nŭn ôh, yua tơl gơñu ngă klơi tă-tăn tui yang gơñu pô,#34:15 Ngă klơi tă-tăn tui yang gơñu pô nŭn tui tam Hêbrơ hiăp pơyap hla ti buă đahmơi ƀuo pô. dăp pơyŏl čĭm ngă yang, nŭn gơñu ti jak gô-ih nao ƀŏng djăm gơñu ngă yang nŭn mơ̆n. 16Ha tô̆ dŏng, jơ̆ laĭ gô-ih tô̆ nă đahmơi gơñu br̂ơi nă đahkơi gô-ih dŏ, nŭn nă đahmơi gơñu ti ngă klơi tă-tăn tui yang gơñu, jr̂ŏng nŭn gơñu ti ngă br̂ơi nă đahkơi gô-ih ngă klơi tă-tăn tui yang gơñu mơ̆n.#An Yap 25:1-3; 1Kô 10:14-22.

17«Anăm tô̆ maih pr̂ăk băn, tuh ngă hup yang pr̂ăp gô-ih pô ôh.#An Biă 20:4.

18«Br̂ơi gô-ih djă čr̂oh r̂ơi ƀŏng nŭmpăng a bĭ čĕ pơi. Br̂ơi gô-ih ƀŏng nŭmpăng a bĭ čĕ pơi juh r̂ơi, hla ti kâo pơtă br̂ơi gô-ih, mơ̆ng r̂ơi kâo pơkă, mơ̆ng blan Aƀip, yua blan nŭn yơh gô-ih biă mơ̆ng čal Êjĭp.#An Biă 12:14-20; 23:15; Lêwi 23:6-8; Yap 28:16-25.

19«Bih nă đahkơi phŭn biă mơ̆ng čian mĭ ñu, čr̂oh br̂ơi kâo, dăp nă kơno phŭn tơgr̂ư̆ čĭm gô-ih, wŏt mo wŏt triw wŏt be ơ mơ̆n.#An Biă 13:2. 20Plai nă kơno lie tuh blŭng, br̂ơi gô-ih hơlih mơ̆ng nă triw lơ nă be, čiăng song tô̆ ñu. Jơ̆ laĭ gô-ih bĭ song tô̆ ñu ôh, nŭn br̂ơi bơjoh lôi tơkoi ñu. Bih nă đahkơi phŭn gô-ih, nŭn br̂ơi gô-ih song tô̆ gơñu mơ̆n.#34:20 Nă đahkơi phŭn môt Israel song tô̆ mơ̆ng len đơč. An Biă 13:13; Yap 18:15-16.

«Gô-ih bĭ thâo r̂ai ti năp kâo ngan soh-sel ôh.

21«Br̂ơi gô-ih ngă buă năm r̂ơi, tơl r̂ơi ti juh br̂ơi gô-ih bơdơi, mă yan a thai, wŏt yan a yuă ơ mơ̆n, br̂ơi gô-ih bơdơi mơ̆n.#An Biă 16:23-30; 20:8-10; 23:12; 31:13-17; 35:2-3. 22Br̂ơi gô-ih djă čr̂oh r̂ơi ngă yang r̂ơi ti ma pluh, r̂ơi nŭn gô-ih ti ba r̂ai pơyŏl dai sali dr̂oh blŭng.#An Biă 23:16; Lêwi 23:15-21; Yap 28:26-31; Juăt 16:9-12. Tơl ti bih thŭn, br̂ơi gô-ih djă čr̂oh r̂ơi ngă yang yan pơƀô̆t boh-tr̂oh mơ̆n.#An Biă 23:16; Lêwi 23:33-43. 23Ha thŭn klâo wŏt, br̂ơi bih môt đahkơi tăm môt gô-ih r̂ai ti năp kâo, Khua Yang Yêhôwa, Yang môt sô̆n-sat Israel. 24Tơl gô-ih đĭ r̂ai ti năp kâo Yêhôwa Yang gô-ih ha thŭn klâo wŏt, nŭn bĭ hmâo lơi hưp čiăng hmâo kơnah gô-ih ôh, yua kâo ti pơpŏl lôi môt sô̆n-sat pơkŏn-pơkŏn br̂ơi biă đuĕ ti năp gô-ih, dăp r̂ĭ br̂ơi gô-ih goi br̂ơi pr̂ŏng lơhaih mơ̆n.

25«Tơl gô-ih ngă yang dăp ƀŏng huă r̂ơi klơi gao, br̂ơi gô-ih pơyŏl dr̂ah čĭm a ngă yang nŭn, plai gô-ih anăm tô̆ nŭmpăng a čĕ pơi pơyŏl hr̂ŏm dr̂ah nŭn ôh. Gô-ih anăm čr̂oh djăm nŭn khă tơl guah le.#An Biă 12:8-10.

26«Gah boh-tr̂oh bơboh phŭn blŭng mơ̆ng kơnah gô-ih, br̂ơi gô-ih ba r̂ai pơ sang kâo Yêhôwa Yang gô-ih.#An Biă 22:29.

«Ih anăm tô̆k nă be hr̂ŏm ia sâo mĭ ñu ôh.»

27Jr̂ŏng nŭn Yêhôwa pơtă br̂ơi Môsê: «Br̂ơi ih čih čr̂oh klơi pơhiăp ne, yua mơ̆ng klơi pơhiăp ne yơh kâo kă klơi uăn bơgop hr̂ŏm ih dăp hr̂ŏm Israel.» 28Môsê dŏ ha anŭn hr̂ŏm Yêhôwa pă pluh r̂ơi pă pluh mlăm, ñu bĭ ƀŏng bĭ ñŭm yĕt ôh.#An Biă 24:18. Yêhôwa čih#34:28 Yêhôwa čih Hêbrơ laĭ «Ñu čih.» mơ̆ng hơđang bohtâo dua pŏk nŭn, bih boh hiăp klơi uăn bơgop, a iâo klơi pơtă pluh kho.

Ƀŏ Môsê đaih

29Môsê tr̂ŭn mơ̆ng kŏ čĭ Sinai, dăp djă hơđang bohtâo klơi uăn bơgop dua pŏk mơ̆ng ngan ñu. Pah ñu tr̂ŭn mơ̆ng kŏ čĭ, klĭ ƀŏ ñu đaih, yua ñu pơhiăp hr̂ŏm Yêhôwa, plai ñu bĭ thâo kr̂ăn laĭ ƀŏ ñu đaih ôh.#An 2Kô 3:7-16. 30Tơl Ơrô̆n dăp bih-tih nă plơi lan Israel ƀôh Môsê, dăp ƀôh klĭ ƀŏ ñu đaih, nŭn gơñu huĭ bĭ khĭn nao jĕ Môsê ôh. 31Plai Môsê iâo glaĭ môt gơñu, nŭn Ơrô̆n dăp bih môt khua ba kŏ nă plơi lan, gơñu wŏt glaĭ pơ Môsê dŏng, jr̂ŏng nŭn Môsê pơhiăp hr̂ŏm gơñu. 32Dơdơi mơ̆ng anŭn, bih môt nă čo Israel r̂ai jĕ Môsê, jr̂ŏng nŭn Môsê pơtă br̂ơi môt gơñu, dơm klơi Yêhôwa pơhiăp hr̂ŏm ñu mơ̆ng kŏ čĭ Sinai. 33Tơl Môsê pơhiăp hr̂ŏm môt gơñu jr̂ŏng boih, nŭn Môsê tô̆ seng gom lôi ƀŏ ñu.

34R̂ĭm wŏt Môsê mŭt nao ti năp Yêhôwa, čiăng pơhiăp hr̂ŏm ñu, nŭn Môsê toh lôi seng mơ̆ng ƀŏ ñu khă tơl ñu biă glaĭ. Tơl ñu biă glaĭ, ñu r̂ă br̂ơi nă čo Israel tui klơi Yêhôwa pơtă br̂ơi ñu. 35Nŭn nă čo Israel ep ƀŏ Môsê, ƀôh klĭ ƀŏ ñu đaih. Nŭn Môsê tô̆ seng gom kr̂a ƀŏ ñu, khă tơl ñu mŭt nao pơhiăp hr̂ŏm Yêhôwa dŏng.

Currently Selected:

Biă 34: JKB

Highlight

Copy

Compare