Biă 17

Ia r̂o biă mơ̆ng bohtâo

1Bih nă plơi lan Israel biă mơ̆ng čol Sin,#An Biă 16:1. gơñu bat mơ̆ng ha ƀon nao pơ ha ƀon, tui klơi Yêhôwa pơđơi. Gơñu bơdŏng sang seng tŏng ti ƀon Rêphiđim, ƀon nŭn nă plơi lan bĭ hmâo ia ñŭm ôh. 2Nĭng nŭn yơh, nă plơi lan sem kơđi hr̂ŏm Môsê, gơñu pơhiăp laĭ: «Gô-ih br̂ơi mơi ia ñŭm wŏ!»#An Biă 15:24; 16:2-3. Môsê til glaĭ: «Yua yĕt gô-ih sem kơđi hr̂ŏm kâo? Yua yĕt gô-ih long-lăng Yêhôwa?» 3Pơ anŭn nă plơi lan hao ia kơtang jat, nŭn gơñu tr̂ŭk mơ̆ng Môsê, gơñu laĭ: «Yua yĕt ih ba mơi biă mơ̆ng čal Êjĭp, čiăng pơdjai lôi môt mơi, dăp nă čo mơi, wŏt phung čĭm mơi, yua mơ̆ng klơi hao ia hla ne lĕ?»#An Biă 14:11. 4Nĭng nŭn yơh, Môsê iâo đĭ Yêhôwa, ñu laĭ: «Hiư̆m pă kâo ti ngă mơ̆ng nă plơi lan ne? Gơñu iă ti mă bohtâo jiah pơdjai lôi kâo boih.» 5Yêhôwa pơhiăp hr̂ŏm Môsê: «Br̂ơi ih bat nao hlâo gah năp nă plơi lan wŏ, dăp jak ba môt kŏng-tha Israel pơanah bat nao gah năp hr̂ŏm ih mơ̆n, gai jr̂a ih ƀang ia kr̂ong Nil nŭn, br̂ơi ih djă ba mơ̆ng ngan ih mơ̆n. 6Ep wŏ, kâo ti dŏ dŏng gah năp ih, ngŏ bohtâo mơ̆ng kŏ čĭ Hôrep, br̂ơi ih teh bohtâo nŭn, nŭn ia ti r̂o biă r̂ai, jr̂ŏng nŭn nă plơi lan ti ñŭm.» Nŭn Môsê ngă tui hla nŭn, ti năp môt kŏng-tha Israel. 7Môsê iâo ƀon nŭn “Masa” (čiăng laĭ “Long-lăng”), dăp iâo ƀon nŭn “Mêriƀa” mơ̆n (čiăng laĭ “Sem kơđi”), yua nă čo Israel sem kơđi, dăp long-lăng Yêhôwa, gơñu pơhiăp laĭ: «Hiư̆m, Yêhôwa dŏ hr̂ŏm môt mơi mơ̆n ah?»#An Yap 20:2-13.

Môt sô̆n-sat Amalêk bơblah hr̂ŏm Israel

8Jr̂ŏng nŭn, môt sô̆n-sat Amalêk#An Phŭn 36:12. nao bơblah hr̂ŏm môt Israel ti ƀon Rêphiđim. 9Môsê pơhiăp hr̂ŏm Yôsuê: «Br̂ơi ih nao r̂ih đahkơi pơanah, biă nao bơblah hr̂ŏm môt sô̆n-sat Amalêk. R̂ơi gla kâo ti nao dŏ dŏng ngŏ kŏ čĭ, dăp djă ba gai jr̂a Ơi Adai mơ̆ng ngan kâo.» 10Nŭn Yôsuê ngă tui hla ti Môsê pơđơi, ñu nao bơblah hr̂ŏm môt sô̆n-sat Amalêk, gah Môsê dua ñu Ơrô̆n klâo ñu Hơ, gơñu đĭ nao ngŏ kŏ čĭ. 11Pah Môsê yŏl đĭ ngan ñu, nŭn Israel hmâo pr̂an kơtang hloh, tơl Môsê plĕ tr̂ŭn ngan ñu, nŭn Amalêk hmâo pr̂an kơtang hloh dŏng. 12Plai ngan Môsê lơgah jat, nŭn gơñu tô̆ bohtâo ba r̂ai čr̂oh br̂ơi Môsê dŏ ben, jr̂ŏng nŭn Ơrô̆n dua ñu Hơ, jom tŏ br̂ơi ngan Môsê, ha r̂ăng ha gah, ha r̂ăng ha gah. Nĭng nŭn yơh, ngan Môsê dŏ hơđŏng khă tơl yang r̂ơi lĕ. 13Nŭn yơh, Yôsuê yua đao bơblah hr̂ŏm môt tơhan Amalêk, jai gah ñu.

14Yêhôwa pơhiăp hr̂ŏm Môsê: «Čih čr̂oh klơi ne tăm hla wŏ, čiăng gô-ih hơdŏl glaĭ, dăp an br̂ơi Yôsuê hmĭ, yua kâo ti lŏm lôi môt Amalêk gah yô̆ adai ne br̂ơi bih, tơl bĭ hmâo lơi kơčăng glaĭ mơ̆ng môt gơñu dŏng ôh.»#An Juăt 25:17-19; 1Săm 15:2-9; Êst 9:24-25. 15Pah anŭn, Môsê ngă pr̂a ngă yang, jr̂ŏng nŭn iâo ƀŏ pr̂a nŭn “Yêhôwa-nisi” (čiăng laĭ “Yêhôwa yơh klơi jai kâo”#17:15 Mơ̆ng đim môt tơhan yua gai glong hmâo hup gah ngŏ kŏ gai, gơñu yŏl đĭ gai nŭn čiăng bih môt tơhan gah gơñu tui gai nŭn. Jơ̆ laĭ jai gah gơñu, gơñu pla gai nŭn tăm kơnah mơ̆ng ƀon nŭn. Gai nŭn Hêbrơ iâo «Nisi.» Yêhôwa-nisi čiăng laĭ Yêhôwa yơh pô ba kŏ môt tơhan Israel ngă br̂ơi gơñu jai.). 16Ñu pơhiăp laĭ: «Ngan yŏl đĭ pơ gr̂e pơtao Yêhôwa!#17:16 Ngan yŏl đĭ pơ gr̂e pơtao Yêhôwa! Jlan ne kơnap hông. Mơnuih pơanah khư̆t laĭ ñu pơhiăp mơ̆ng ngan Môsê yŏl đĭ pah môt Israel bơblah hr̂ŏm môt Amalêk. Mơnuih pơanah dŏng khư̆t laĭ ñu pơhiăp mơ̆ng Yêhôwa yŏl đĭ ngan ñu pô uăn laĭ ti bơblah hr̂ŏm môt Amalêk. Mơnuih pơanah dŏng khư̆t laĭ ñu pơhiăp mơ̆ng ngan môt Amalêk yŏl đĭ čiăng bơblah glaĭ mơ̆ng Yêhôwa. Mơnuih pơanah dŏng čiăng ke boh hiăp Hêbrơ, Hêbrơ laĭ «Gr̂e pơtao Yêhôwa» gơñu čĕ kr̂a «Hla kơ Yêhôwa» dŏng. Yêhôwa ti bơblah hr̂ŏm môt sô̆n-sat Amalêk, tơgr̂ư̆ nôk nao-nao hayoh.»

Currently Selected:

Biă 17: JKB

Highlight

Copy

Compare