Buă Ngă 9
9
Sôl pơlih bŭt-tai ngư̆ Yêsu
(Buă 22:3-16; 26:9-18)
1Pah anŭn, Sôl dŏ nŏng hiăp khu laĭ ti pơdjai lôi môt hyĕn tui Khua Yang.#An Buă 8:3. 2Ñu nao dueh mơ̆ng pô khua ngă yang čih br̂ơi ñu hla hr̂ă, ñu čiăng ba nao hla hr̂ă nŭn tơgr̂ư̆ sang luôm môt Yuđa tăm plơi Đamah, jơ̆ laĭ ñu ƀôh mơnuih pă bat tui glan Khua Yang, wŏt đahkơi lơ đahmơi ơ mơ̆n, ñu ti mă čă ba glaĭ pơ plơi Yêrusalĕm. 3Pah ñu dŏ bat nao r̂ok glan, jĕ ti tơl plơi Đamah, phŏ, hmâo klơi đaih mơ̆ng adai dih pơčr̂ang tr̂ŭn jŭm dăl ñu. 4Ñu lơbuh tr̂ŭn pơ kơnah, jr̂ŏng nŭn ñu hmĭ ñi pơhiăp r̂ai pơ ñu: «Ơ Sôl, ơ Sôl! Yua yĕt ih bơjăm bơjuă ngă set kâo?» 5Ñu til đĭ: «Ơ Khua Yang! Lơi ih?» Nŭn Khua Yang til glaĭ: «Kâo Yêsu, pô ih bơjăm bơjuă. 6Gŭ đĭ wŏ, br̂ơi ih mŭt nao tăm plơi, nŭn r̂ăng ti r̂ă br̂ơi ih mơ̆ng buă ih ti ngă.» 7Môt bat hr̂ŏm ñu, gơñu dŏ đŏng khĕm, yua gơñu hmĭ ñi, plai bĭ ƀôh lơi-lơi ôh. 8Sôl gŭ đĭ mơ̆ng kơnah, wŏt dah săl ta ñu dŏ blang, plai ñu bĭ thâo ƀôh ôh. Nĭng nŭn yơh, r̂ăng dui ngan ñu, ba nao mŭt tăm plơi Đamah. 9Klâo r̂ơi boih, ñu bĭ thâo ƀôh, dăp bĭ ƀŏng bĭ ñŭm nŏ yĕt ôh.
10Mơ̆ng plơi Đamah hmâo pô hyĕn tui ha r̂ăng a iâo ƀŏ ñu Ananieh. Khua Yang pơƀôh br̂ơi Ananieh ƀôh ñu, dăp iâo ñu: «Ơ Ananieh!» Ñu til glaĭ: «Yĕt, Khua Yang? Kâo hmĭ boih.» 11Khua Yang pơhiăp laĭ: «Gŭ đĭ wŏ, bat nao pơ glan a iâo “Glan Kơpă,” jr̂ŏng nŭn sem mơnuih ha r̂ăng a iâo ƀŏ ñu Sôl, r̂ai mơ̆ng plơi Tơsôh, ñu dŏ mơ̆ng sang Yuđah. Nêne, ñu dŏ iâo-laĭ. 12Kâo pơƀôh br̂ơi ñu ƀôh lôi hlâo, hmâo đahkơi ha r̂ăng, a iâo ƀŏ ñu Ananieh, ti mŭt nao ah ngan ngŏ ñu, čiăng săl ta ñu đaih glaĭ dŏng.» 13Ananieh til glaĭ: «Ơ Khua Yang, kâo hmĭ mơnuih lô pơphol mơ̆ng đahkơi nŭn, ñu ngă set jat hr̂ŏm môt lơgoh hiam ih, tăm plơi Yêrusalĕm, 14nêne ñu hmâo sĭt r̂ai mơ̆ng môt tha ngă yang mop br̂ơi ñu, čiăng r̂ai mă čă bih mơnuih iâo đĭ ƀŏ ih mơ̆ng plơi ne mơ̆n.» 15Plai Khua Yang pơhiăp hr̂ŏm ñu: «Nao wŏ, yua kâo r̂ih ñu yơh. Kâo ti yua ñu, čiăng ñu r̂ă r̂oi mơ̆ng ƀŏ kâo ti năp môt sô̆n-sat pơkŏn, dăp môt pơtao, wŏt nă čo Israel he mơ̆n.#An Mat 10:18. 16Kâo ti ngă br̂ơi ñu thâo kr̂ăn laĭ ñu ti pŏ klơi kơnap-tap lô, yua mơ̆ng ƀŏ kâo.» 17Nĭng nŭn yơh, Ananieh nao hĕ, jr̂ŏng nŭn mŭt nao tăm sang nŭn, ñu ah ngan ngŏ Sôl, dăp pơhiăp laĭ: «Ơ yŏng Sôl! Khua Yang Yêsu, pô pơƀôh br̂ơi ih ƀôh ñu r̂ok glan, ñu pơđơi kâo r̂ai, čiăng săl ta ih đaih glaĭ, dăp čiăng ih bŏ mơ̆ng Yang Bơngăt Hiam he mơ̆n.» 18Pah anŭn he boih, hmâo hla ti kah kan jr̂uh mơ̆ng săl ta ñu, nŭn săl ta ñu đaih glaĭ dŏng. Jr̂ŏng nŭn ñu gŭ đĭ, tô̆ klơi ñŭk ƀatem. 19Tơl ñu ƀŏng huă, ñu hmâo pr̂an glaĭ dŏng.
Sôl r̂ă r̂oi mơ̆ng Yêsu tăm plơi Đamah
Sôl dŏ hr̂ŏm môt hyĕn tui mơ̆ng plơi Đamah klâo pă r̂ơi, 20tô̆ mơ̆ng anŭn he yơh ñu r̂ă r̂oi mơ̆ng Yêsu tăm sang luôm pơkŏn-pơkŏn, ñu laĭ: «Yêsu yơh nă Ơi Adai.» 21Bih mơnuih hmĭ ñu r̂ă r̂oi, gơñu tuêl, dăp laĭ: «Hiư̆m, bĭ djơ̆ ôh, pô ne čiăng bơr̂ăm lôi bih mơnuih iâo đĭ ƀŏ Yêsu mơ̆ng plơi Yêrusalĕm? Nêne, ñu r̂ai pơ ane dŏng, čiăng mă čă mơnuih iâo đĭ ƀŏ Yêsu, ba glaĭ pơ môt tha ngă yang.» 22Plai Sôl dŏng, ñu jai thâo tui thâo tui,#9:22 Ñu jai thâo tui lơ «Ñu hmâo pr̂an jai kơtang tui.» ñu r̂ă br̂ơi môt sô̆n-sat Yuđa dŏ mơ̆ng plơi Đamah thâo jel laĭ, Yêsu yơh, Yang Krih dơdi, nŭn gơñu bĭ hmâo nŏ yĕt ti bơjah glaĭ ôh.
Sôl đuĕ mơ̆ng môt sô̆n-sat Yuđa
23Wĭ r̂ơi mơ̆ng anŭn, môt sô̆n-sat Yuđa bơgĭt gŏp gơñu čiăng pơdjai lôi Sôl. 24Plai dŏng, Sôl thâo kr̂ăn mơ̆ng buă gơñu bơgĭt nŭn. Gah môt Yuđa dŏng, gơñu dŏ kr̂ăp ti amăng jang plơi, r̂ĭm r̂ơi r̂ĭm mlăm, čiăng pơdjai lôi ñu. 25Nĭng nŭn yơh, tơl mlăm môt hyĕn tui Sôl, gơñu čr̂oh Sôl mơ̆ng gơjơ, djieng tr̂ŭn ñu sit dăp plơi.#An 2Kô 11:32-33.
Sôl dŏ mơ̆ng plơi Yêrusalĕm
26Tơl Sôl tr̂uh nao pơ plơi Yêrusalĕm,#An Kal 1:17-18. ñu hăt mŭt pơtŭm hr̂ŏm môt hyĕn tui, plai bih gơñu huĭ Sôl, yua gơñu bĭ ngư̆ laĭ Sôl jr̂ŏng pô hyĕn tui ôh. 27Plai Ƀanaƀah dŏng,#An Buă 4:36. ñu tô̆ Sôl, ba nao pơ môt r̂ă tang Yêsu, jr̂ŏng nŭn ñu r̂ă r̂oi br̂ơi môt gơñu mơ̆ng buă Sôl ƀôh Khua Yang r̂ok glan, dăp buă Khua Yang pơhiăp hr̂ŏm Sôl, wŏt buă Sôl r̂ă r̂oi mơ̆ng ƀŏ Yêsu mơ̆ng klơi khĭn tăm plơi Đamah. 28Tô̆ mơ̆ng anŭn, Sôl dŏ hr̂ŏm môt gơñu, dăp bat nao r̂ai hr̂ŏm gơñu mơ̆ng plơi Yêrusalĕm, wŏt r̂ă r̂oi mơ̆ng ƀŏ Khua Yang mơ̆ng klơi khĭn. 29Ñu pơhiăp hr̂ŏm môt sô̆n-sat Yuđa pơhiăp Krĭk, dăp bơjah hr̂ŏm môt gơñu mơ̆n, plai môt gơñu dai khư̆t čiăng pơdjai lôi ñu. 30Tơl môt yŏng dơi hmĭ mơ̆ng klơi ne, nŭn gơñu ba nao ñu pơ plơi Sêsara, jr̂ŏng nŭn pơđơi ñu nao pơ plơi Tơsôh dŏng.
31Jr̂ŏng nŭn môt sang jnŭm tơgr̂ư̆ ƀon mơ̆ng Yuđa, Galilê, dăp Samari hmâo klơi nŭk-nua, dăp dŏ gơjăp gơjăl tui. Gơñu bat nao pơ năp mơ̆ng klơi huĭ pơpô̆ Khua Yang, dăp Yang Bơngăt Hiam pơđĭ ai bŭt-tai gơñu, nĭng nŭn yơh, môt sang jnŭm lal đĭ lô tui.
Pêtrôih pơhuai Ênieh
32Pêtrôih bat yô mơ̆ng ha ƀon nao pơ ha ƀon. Ñu tr̂ŭn nao čuă ngui môt lơgoh hiam tăm plơi Liđa. 33Pơ anŭn ñu ƀôh đahkơi ha r̂ăng a iâo ƀŏ ñu Ênieh, ñu djai le ngan dŏ đih mơ̆ng gr̂e păn thŭn boih. 34Pêtrôih pơhiăp nao pơ ñu: «Ơ Ênieh! Yêsu Krih pơhuai br̂ơi ih boih. Gŭ đĭ wŏ, met-set gr̂e ih!» Pyut ñu gŭ đĭ hĕ. 35Bih mơnuih dŏ mơ̆ng plơi Liđa dăp ƀon Sarôn ƀôh nĭng nŭn, jr̂ŏng nŭn gơñu wŏt glaĭ pơ Khua Yang.
Têƀitha dĭp glaĭ
36Mơ̆ng plơi Yô̆ppê hmâo đahmơi ha r̂ăng a iâo ƀŏ ñu Têƀitha (tui boh hiăp Krĭk laĭ “Đơkah”#9:36 Ƀŏ Têƀitha boh hiăp ơr̂amê, ƀŏ Đơkah boh hiăp Krĭk. Bih dua tô̆ nŭn čiăng laĭ “Čĭm kơtŏng.”), ñu pô hyĕn tui mơ̆n. Ñu ngă buă hiam lô, dăp ček hnă br̂ơi mơnuih hin kơtă-kơtă he mơ̆n. 37Pah anŭn, ñu wă-nuă, jr̂ŏng nŭn ñu djai hĕ. R̂ăng r̂ao br̂ơi dr̂ơi-jĕn ñu, jr̂ŏng nŭn ba đĭ ñu čr̂oh tăm nih tăl gah ngŏ. 38Plơi Liđa dŏ jĕ plơi Yô̆ppê. Tơl môt hyĕn tui hmĭ laĭ Pêtrôih dŏ pơ plơi Liđa, gơñu pơđơi đahkơi dua r̂ăng nao pơ Pêtrôih, dueh alôm mơ̆ng ñu: «Ih r̂ai pơ mơi tăñ wŏ.» 39Nŭn Pêtrôih gŭ đĭ nao hr̂ŏm môt gơñu. Pah Pêtrôih tơl nao, gơñu ba đĭ ñu nih tăl gah ngŏ. Bih đahmơi gơdr̂ô dŏ dŏng jĕ Pêtrôih, gơñu hia dăp pơƀôh br̂ơi ao, wŏt hnă buh pơkŏn-pơkŏn Đơkah ngă br̂ơi gơñu, pah ñu dŏ nŏng dŏ dĭp. 40Pêtrôih pơđơi bih gơñu biă đuĕ gah ia-wang, nŭn ñu tŏ ŭt iâo-laĭ,#An 1Pơtao 17:19-20; 2Pơtao 4:32-33; Mat 9:25. jr̂ŏng nŭn wih nao gah tâo, dăp pơhiăp laĭ: «Ơ Têƀitha! Gŭ đĭ wŏ!» Pah anŭn Têƀitha blang đĭ ta. Tơl ñu ƀôh Pêtrôih, ñu gŭ đĭ dŏ ben. 41Pêtrôih mă ngan ñu dui đĭ, jr̂ŏng nŭn Pêtrôih iâo r̂ai môt lơgoh hiam dăp môt đahmơi gơdr̂ô, nŭn br̂ơi gơñu ƀôh laĭ Têƀitha dĭp glaĭ yơh. 42Klơi ne hmĭ yô jŏp-jang tăm plơi Yô̆ppê, jr̂ŏng nŭn hmâo mơnuih lô ngư̆ Khua Yang. 43Pêtrôih dŏ mơ̆ng plơi Yô̆ppê wĭ r̂ơi, ñu dŏ hr̂ŏm đahkơi ha r̂ăng a iâo ƀŏ ñu Simôn, ñu mơnuih ngă buă pơkr̂a klĭ čĭm.
© 2024, Wycliffe Bible Translators, Inc.