Buă Ngă 22
22
1«Ơ yŏng dơi, ơ môt ma, dueh mơ̆ng gô-ih hmĭ kâo r̂ă glaĭ ƀơĭ wŏ!»
2Tơl gơñu hmĭ ñu pơhiăp Hêbrơ, nŭn jai gơñu uăt lôi leh, hloh mơ̆ng anŭn dŏng. Nŭn Pôl pơhiăp laĭ:
3«Kâo sô̆n-sat Yuđa, plơi a pơpôn kâo plơi Tơsôh tăm tr̂ing Kilikie, plai dŏng, kâo dŏ tăm plơi Yêrusalĕm ne mơ̆ng kâo dŏ muai. Kâo hyĕn hr̂ŏm Kamaliel, ñu pơto br̂ơi kâo klơi juăt môt ơi don ta jel-lĕk boih.#An Buă 5:34-39. Kâo hmâo bŭt-tai kiăng ngă buă Ơi Adai hla ti bih gô-ih r̂ơi ne mơ̆n. 4Pah ahlâo, kâo juăt bơjăm bơjuă ngă set mơnuih bat tui glan ne, khă tơl kâo čiăng gơñu djai, yua kâo mă čă lôi đahkơi đahmơi, ba nao kr̂ĭ lôi tăm sang khŭk.#An Buă 8:3; 26:9-11. 5Mơ̆ng klơi nŭn, pô khua ngă yang, dăp bih-tih môt kŏng-tha tr̂ĕ kơđi, gơñu thâo jel mơ̆ng buă kâo mơ̆n. Kâo tô̆ hla hr̂ă mơ̆ng môt gơñu, ba nao pơ môt yŏng dơi mơ̆ng plơi Đamah, yua kâo nao čiăng mă čă lôi mơnuih dŏ pơ anŭn, čiăng ba r̂ai tr̂ĕ kơđi môt gơñu mơ̆ng plơi Yêrusalĕm.#An Buă 9:1-2.
6«Pah kâo dŏ bat r̂ok glan, jĕ ti tơl plơi Đamah, ai-ñu yang r̂ơi dŏng, phŏ, hmâo klơi đaih kơmlă kơtang, pơčr̂ang tr̂ŭn mơ̆ng adai dih jŭm dăl kâo.#22:6 Buă 9:1-19; 26:12-18 r̂ă r̂oi mơ̆ng klơi Pôl pơlih bŭt tai mơ̆n. 7Kâo lơbuh tr̂ŭn pơ kơnah, jr̂ŏng nŭn kâo hmĭ ñi pơhiăp r̂ai pơ kâo: “Ơ Sôl, ơ Sôl! Yua yĕt ih bơjăm bơjuă ngă set kâo?” 8Kâo til glaĭ: “Ơ Khua Yang! Lơi ih?” Ñu pơhiăp r̂ai pơ kâo: “Kâo Yêsu, plơi Nasaret, pô ih bơjăm bơjuă.” 9Môt bat hr̂ŏm kâo, gơñu ƀôh klơi đaih nŭn mơ̆n, plai gơñu bĭ hmĭ ñi pô pơhiăp r̂ai pơ kâo ôh.#22:9 Gơñu bĭ hmĭ ñi pô pơhiăp r̂ai pơ kâo ôh lơ «Gơñu bĭ hông pô pơhiăp r̂ai pơ kâo ôh.» 10Kâo kơña: “Ơ Khua Yang, hiư̆m kâo ti ngă?” Khua Yang til glaĭ pơ kâo: “Gŭ đĭ wŏ, mŭt nao tăm plơi Đamah, pơ anŭn r̂ăng ti r̂ă br̂ơi ih mơ̆ng buă kâo pơtă br̂ơi ih ngă.” 11Săl ta kâo bĭ thâo ƀôh ôh, yua klơi gơdr̂ih-gơdr̂ŏng nŭn đaih kơmlă,#An 2Kô 4:4. nĭng nŭn yơh, môt bat hr̂ŏm kâo, gơñu mơ̆ng dui ngan kâo ba nao mŭt tăm plơi Đamah.
12«Hmâo đahkơi ha r̂ăng a iâo ƀŏ ñu Ananieh, ñu mơnuih huĭ pơpô̆ Ơi Adai, ñu ngă djơ̆ tui klơi juăt, bih môt sô̆n-sat Yuđa dŏ pơ anŭn pơ-i ñu mơnuih hơdĭp hiam, 13ñu r̂ai dŏ dŏng jĕ kâo, dăp pơhiăp laĭ: “Ơ yŏng Sôl, br̂ơi săl ta ih đaih glaĭ wŏ!” Pah anŭn he boih, săl ta kâo đaih glaĭ, jr̂ŏng nŭn kâo thâo ƀôh ñu. 14Nŭn ñu laĭ: “Ơi Adai, Yang ơi don ta, ñu r̂ih ih, br̂ơi ih thâo kr̂ăn klơi ñu čiăng, dăp br̂ơi ih ƀôh pô kơpă-hnŏng,#22:14 Pô kơpă-hnŏng čiăng laĭ Yang Krih. wŏt hmĭ klơi pơhiăp biă mơ̆ng amăng bah ñu mơ̆n, 15yua ih ti jr̂ŏng pô r̂ă pơthâo br̂ơi bih-tih mơnuih, mơ̆ng buă ih ƀôh, dăp buă ih hmĭ. 16Nêne, yĕt ih dŏ gon lĕ? Gŭ đĭ wŏ, tô̆ klơi ñŭk ƀatem, dăp iâo đĭ ƀŏ Khua Yang, čiăng r̂ao lôi klơi glaĭ ih!”#An Doh 51:2; Rôm 10:13.
17«Tơl kâo glaĭ r̂ai pơ plơi Yêrusalĕm dŏng, pah kâo dŏ iâo-laĭ tăm sang yang, nŭn Ơi Adai pơƀôh br̂ơi kâo, 18kâo ƀôh Khua Yang pơhiăp hr̂ŏm kâo: “Tăñ wŏ, br̂ơi ih biă đuĕ mơ̆ng plơi Yêrusalĕm nêne he yơh, yua gơñu bĭ tô̆ klơi ih r̂ă pơthâo mơ̆ng kâo ôh.” 19Nŭn kâo laĭ: “Ơ Khua Yang, gơñu thâo kr̂ăn yơh, kâo nao pơ sang luôm pơkŏn-pơkŏn, mă mơnuih ngư̆ ih, ba nao kr̂ĭ lôi tăm sang khŭk, dăp buăt gơñu mơ̆ng wĕ he mơ̆n. 20Pah r̂ăng pơhŏk dr̂ah Stêphan, pô r̂ă pơthâo mơ̆ng ih, nŭn kâo dŏ dŏng ha anŭn mơ̆n, dăp phom tui mơ̆ng buă nŭn, wŏt dŏ gak ao phyông môt pơdjai lôi ñu he mơ̆n.”#An Buă 7:57—8:1. 21Pah anŭn Khua Yang pơhiăp hr̂ŏm kâo, ñu laĭ: “Nao wŏ, yua kâo ti pơđơi ih nao pơ môt sô̆n-sat pơkŏn dŏ taih-taih.”»#An Buă 9:15; 13:46.
Pôl dua ñu khua tơhan Rôm
22Pah nă plơi lan hmĭ Pôl pơhiăp tơl gơi nŭn, gơñu pơhiăp đĭ kr̂aih laĭ: «Met-set lôi mơnuih neo ne mơ̆ng lŏn kơnah wŏ, yua ñu bĭ găl dŏ dĭp dŏng tah!» 23Gơñu dŏ nŏng pơhiăp đĭ kr̂aih, dăp toh pr̂ah lôi ao phyông gơñu, wŏt jai đĭ kơnah ƀô̆k he mơ̆n, 24pah anŭn, khua tơhan pơđơi r̂ăng ba nao Pôl mŭt tăm ƀon tơhan, nŭn ñu pơtă br̂ơi r̂ăng buăt Pôl mơ̆ng wĕ dăp kơña ñu, čiăng thâo kr̂ăn laĭ, kho yĕt nă plơi lan pơhiăp đĭ kr̂aih mơ̆ng ñu hla nŭn. 25Plai dŏng, pah r̂ăng kă lôi Pôl ti buăt ñu mơ̆ng wĕ, nŭn Pôl pơhiăp hr̂ŏm khua tơhan tŏ tui dŏ dŏng jĕ ñu, ñu laĭ: «Hiư̆m, hmâo sĭt mơ̆n, buăt mơnuih sŏñčiet Rôm mơ̆ng wĕ, hlâo a ka tr̂ĕ kơđi ñu ôh?»#An Buă 16:37. 26Tơl khua tơhan tŏ tui hmĭ nĭng nŭn, ñu nao r̂ă thâo khua tơhan pr̂ŏng, ñu laĭ: «Hiư̆m ih ti ngă? Yua mơnuih ne sŏñčiet Rôm.» 27Nŭn khua tơhan pr̂ŏng nao kơña Pôl: «R̂ă br̂ơi kâo wŏ! Ih sŏñčiet Rôm dơdi ah?» Pôl til glaĭ: «Ơ̆,» 28khua tơhan pơhiăp laĭ: «Kâo ƀŏng len lô jat, čiăng mŭt sŏñčiet Rôm.» Pôl laĭ: «Kâo sŏñčiet Rôm tô̆ mơ̆ng r̂ơi a pơpôn kâo he yơh.» 29Nĭng nŭn yơh, bih tơhan iă ti kơña Pôl, gơñu dŭn glaĭ mơ̆ng ñu tăñ. Tơl khua tơhan pr̂ŏng thâo kr̂ăn laĭ Pôl sŏñčiet Rôm, nŭn ñu huĭ mơ̆n, yua hlom ñu kă lôi Pôl boih.
Pôl dŏ ti năp môt khua tr̂ĕ kơđi
30Tơl r̂ơi dơdơi, khua tơhan čiăng thâo kr̂ăn jel laĭ, kơđi yĕt môt sô̆n-sat Yuđa săl Pôl, nĭng nŭn yơh, khua tơhan pih lôi Pôl, jr̂ŏng nŭn pơđơi môt tha ngă yang dăp bih-tih môt khua tr̂ĕ kơđi pơtŭm gŏp gơñu, jr̂ŏng nŭn ba nao Pôl br̂ơi dŏ dŏng ti năp môt gơñu.
© 2024, Wycliffe Bible Translators, Inc.