Ɔ̀rɔ̀mùnka reè 9

Polì kɛ̀sɛmàà Isirayɛlidzin neè kàjaa tsɛ

1Kirisà ɲàn, mun sààbeen rìì dèe, mun na doò dèe waa. Ŋaablà re Dzia baraka rɔ̀n, mun akir'là sa mun shɛɛrɛ, 2ci mun taama ŋununbeuma bla ni, mun vunuun yeè bà kɔ̀n tsùuŋnà kudɛyn. 3Àwà à yɛ̀rɛ̀ na dzi mun na min bà dangaɔ̀, min vyɛ̀ bo Kirisà rà, n neema reè kamà, mun kun si reè, adamadzinbee kàjaa tsɛ. 4#Jdk 4.22.Ye rìì Isirayɛlidzin neè, Ŋaablà nìì reè bàu e dzin ì. À nɔɔrɔɔ̀ bàu ye rìì laa, ko à re dzyèèsìbe reè, ko sàrìyaa, ko à blàbèù'n kur'la, ko làyiri seunma rèè. 5Nìì reè bou fàbɔɔ rèè ɲàn, à ye rìì. Ŋaablà Jaara Modzìàn sa to yè bo è ɲan adamadzinbee kàjaa tsɛ, è bà ni gè sapɛ kuùn. Tsoo dzi yeè ɲɛn Ŋaa tsɛ kudɛyn ! Àmiinà !

Ibraximà tsua dzin taki reè

6À na ni a ci Ŋaablà re goomaa nì bàu gè nàfà bɛy dɛ ! Ɔ̀ɔɔn ! Nìì reè sapɛ Isirayɛlì tsua mòdzin, twɛy sapɛ rii na Isirayɛlì waa ! 7#Gok 21.12.Nìì reè to Ibraximà tsua mòdzin, à na ni a ci twɛy sapɛ rii y'à dzin ì waa. È ɲɛn à tsɛ, à dèu ci: «Wo tsua dzin nèè nà bo Ishakà rìì ɲàn.» 8Tɔ̀ dzuɔn nì yɛ, ci nìì reè dzin adamadzinbee kàjaa tsɛ, à na ni a ci twɛy rìì Ŋaablà dzin ì waa, ŋà nìì reè dzin è ɲɛn làyir'là tsɛ, twɛy rìì daɔn Ibraximà tsua dzin taki reè. 9#Gok 18.10.È ɲɛn à tsɛ, Ŋaablà làyir'là seun nèe tsuru ci: «Jii sɔn na kèseema, min na, Saràn nà bà dzin kpiri soo kereo.» 10À na tɔ̀ basɔùn waa. Nìi Èrèbekà, tɔ̀ sa don seun ɲe fà Ishakà rè, è dzin ì kere. 11Àwà, dziin nèè naà kereo ŋe waa, yè nà dzin yè goowùù tàmafa gooɲaan fa waa, ŋà Ŋaablà saɔ na ni tsuù nòn è ɲankɛr'na tsɛ è kòrò à jaaraa ka. 12#Gok 25.23.Faadziɛ na tɔ̀ saabu waa, ŋà tɔ boo kiribaà rìì ɲàn, nìi doùn à dèu Èrèbekà rà ci: «Bɔɔmaà nà bà dzininmaà rè jòn», 13#Mak 1.2,3.a ci à yɛ sɛbɛɔ̀n nìi tsuru Ŋaablà re Goomaa doùn ci: «Mun Yàkubà kɛ̀niun, min Isawù to.»

14Mùn dzia fèe dè tɔ̀un ? Ci terenbɛybe ni Ŋaablà ɲan gbɛ ? Ayi dɛrɛ ! 15#Jdk 33.19.È ɲɛn à tsɛ, à dziun Musà rà ci: «Min dzin ci mun màtsur'la nìi rà, mun màtsur'la tɔ̀ ra, mun to ye dzin ci mun wùù faa nìi rà, mun wùù faa tɔ̀ ra.» 16Tɔ̀ tsuru, tɔ̀ goò na mòò sàò, à to na fààn, à Ŋaablà ɲan màtsur'la rìì. 17#Jdk 9.16.Ŋaablà re goomaa tɔ̀ rii deò Fàràwuna na, nìi yɛ kìtaabuà doùn ci: «Mun wo bou ni taki, min bà ni wo ka n ne dzibaabee kpàdè, tà ko mun tsoò yè bà ni kiri dziɲantsiɛ min niì sapɛ.» 18Tà tsuru, nìi y'a dzibe, à màtsur'la tɔ̀ ra, nìi to y'a dzibe è tɔ̀ dùsùkuan xɔbe.

Ŋaablà rii sào ni

19Wo dzia dzin mun na tɔ̀un ci, è bà dzùrù Ŋaablà yeè jàà mùn na kɔn ? Tsì rii dzia e nɔn à sàɔ mà ? 20#Ekk 29.16; 45.9.Wo tsì tɔ̀ tsuru, wo mòdzìnkɔɔn yè bà ni Ŋaablà sɔswɛy ! Tsyɛɛn ni dzi dzin e myɛnbaa rà feera wo yè mun myɛ̀n nèe tsuru ɔ ? 21Tsyɛnmyɛnbaà rìì sàò na ni dzùà tsɛ gbɛ ? Tɔ̀ dzù soo, à y'a byɛ̀n à y'à fa faagoo wuu faa gè, à to y'a byɛ̀n à y'à fa faagoo ɲaan faa gè. 22Àwà, à na Ŋaablà sao, è re vununtaà ko e re dzibaabee kpàdè mòdzin ì nà, nìì reè kiriɔ vununtaà mòdzin neè. È na wɔɔ bara, ŋà, è mɔɲɔun è tɛyn cɛyn. 23Ta fau nì, è bà ni e nɔɔrɔ brisià kpàdè mòdzin ì nà, nìì reè kiriɔ à ɲan màtsur'la mòdzin neè, à twɛy nìì reè màbyɛ̀n tsùuŋnà e nɔɔrɔɔ̀ kamà. 24À ɲan màtsur'la mòdzin neè, à ɲe rìì gooma dekɔɔn, ɲe nìì reè kiri bou Dzyèèsìbee mòdzin neè fi, kun kpɛrɛ mòdzin neè. 25#Ukk 2.25.À tɔ̀ rii deò kɛɛra Ushè rè kìtaabuà doùn nìi yɛ ci: «Nìì re naà mun ne moo ì waa, mun nà twɛy kiri n ne mòò rèè. Nìi to naà kɛ̀niɔ̀n waa, mun nà tɔ̀ kiri kɛ̀niunmaà.» 26#Ukk 2.1.À to na deò è ra min niì ci: «Ye na mun ne mòdzin ì waa, tɔ̀ gàne soo ɲàn, è nà kiri ci Ŋaablà jaamaa dzin nèè.» 27#Ekk 10.22,23.Nìi kɛɛra Esayì, tɔ̀ sa dziun Isirayɛlì kàjaa tsɛ nèe tsuru fààn na ci: «Isirayɛlidzin neè kɛ̀nsɛɛn ye giribe a ci kòòyù dziɛ rà cɛncɛndzian, è dzyee touma bàsɔùn nì nà tsi. 28Àwà Tsìfaà nà e devuà shi jiì dzɔ̀nxɔɔ̀ tsɛ, à to nà à fa tabe, à y'à dzii tsyɛn.» 29#Ekk 1.9.Kɛɛra Esayì tabeu è tɔ̀ rii dè tsùù ci: «Jìrànxɔɔ̀ ko dzɔ̀nxɔɔ̀ sa Dzyeèsìbee Ŋaablà ma ba na swey tou ɲe tsu fyeu, ɲe na nà bà a ci Sodomùn wɔ̀ɔ̀. Ɔ̀ɔn, ɲe na nà bà Gomɔrɔ̀n wɔ̀ɔ̀ bosi.» 30Mùn nà fèe rìì dè sa ? Mìn dzin nì ci nìì reè kun kpɛrɛ mòdzin neè, twɛy nìì reè naà terenbe gaa, twɛy terenbee tàrau kɛ̀ ? Terenbe riì tàr'la ɲɛynaà baraka rɔ̀n. 31Tɔ̀ to y'à tàrà, nìi Isirayɛlidzin neè, twɛy nìì reè na sàrìyaa terenbe gaa, è na à tàrà waa. 32Feera è na à tàrà ? È na à tàrà waa, è ɲɛn à tsɛ à na dan ɲɛynaà kàjaa tsɛ waa, fɔ faadziɛ goo rèè. Yè e san nà baun sàn nà baan kpàa rà. 33#Ekk 28.16.Tɔ fau, a ci à yɛ sɛbɛɔ̀n nìi tsuru Ŋaablà re Goomaa doùn ci: «À yɛ, mun nà kpàà tsuù Siyɔ̀n jɔun, sàn nà baan kpàà, mòdzìn mɛɛ kpàà. Mòò riì nà ɲɛn à ra, tɔ̀ fa seey fyeu.»

Learn More About Bible Dzùùngoo Unicode

Ɔ̀rɔ̀mùnka reè 9

Popular Bible Verses from Ɔ̀rɔ̀mùnka reè 9

Popular Bible Verses from
Ɔ̀rɔ̀mùnka reè 9