الإنجيل زي ما كتبه مَتَّى 28

القيامة

1و في يوم الأحد، بعد ما إنتهى يوم السبت، راحت مريم المَجدلية و مريم الثانية يشوفوا القبر. 2و إلا صار زلزال قوي، لأن ملاك من الرب نزل من السما ودحلب الحجرة وقعد عليها. 3و كان منظر الملاك زي البرق، وثوبه أبيض زي الثلج. 4و لما شافوه الجنود إلا يحرسوا القبر، ماتوا من الخوف وصاروا كأنهم ميتين. 5و طمن الملاك النسوان الثنتين و قال ليهم: «لا تخافوا. أنا أدري إنكم جايين تدوروا يسوع إلا أنصلب. 6هو مو هني، لأنه قام، زي ما قال. تعالوا و شوفوا المكان إلا كان موجود فيه يسوع. 7و روحوا بسرعة و قولوا لتلاميده إن هو قام من بين الأموات، و هو بيسبقكم إلى منطقة الجليل، روحوا هناك وبتشوفوه. هدانا عطيتكم خبر!» 8وراحوا النسوان الثنتين يركضوا من عند القبر، و هم خايفين مره و في نفس الوقت فرحانين مره، وركضوا إلى التلاميد يحملوا البشارة. 9و لما كانوا في طريقهم رايحين عشان يبشروا التلاميد، إلا يسوع بنفسه قابلهم في الطريق و قال ليهم: «سلام!»و قربوا منه ومسكوا رجوله، و سجدوا له. 10و قال ليهم يسوع: «لا تخافوا! روحوا و قولوا لأخوتي يروحوا منطقة الجليل، و هناك بيشوفوني!»

تقرير الحراس

11و لما كانوا المرأتين رايحين، و إلا بعض الحراس كانوا رايحين إلى المدينة و قالوا لرؤساء الكهنة بكل إلا صار. 12وأجتمعوا رؤساء الكهنة والقادة وتشاوروا في الموضوع. و بعدين رشوا الجنود بفلوس واجد، 13و قالوا ليهم: «قولوا: إن تلاميده جو في الليل وباقوه وإحنا نايمين! 14و إدا وصل الخبر للحاكم، إحنا بندافع عنكم، و بتكونوا في أمان من أي مشكلة». 15و أخدوا الجنود الفلوس، و سووا بالضبط زي ما فهموهم. وأنتشرت وقتها هدي الإشاعة بين اليهود إلى اليوم.

الإرسالية العُظمى

16و التلاميد الإحدعّش راحوا منطقة الجليل، للجبل إلا قال ليهم عليه يسوع. 17و لما شافوه سجدوا له. و لكن بعضهم شكوا. 18و قرب منهم يسوع و قال ليهم: «أنا أنعطيت كل سلطان في السما و على الأرض. 19روحوا وعلموا وتلمدوا كل الشعوب، وعمدوهم بإسم الآب والإبن و الروح القدس؛ 20وعلموهم يسووا كل إلا وصيتكم به. و هداني وياكم في كل الأيام حتى نهاية الزمان!»

Currently Selected:

الإنجيل زي ما كتبه مَتَّى 28: QNAV

Highlight

Copy