التكوين 4

قايين و هابيل

1و مرت الأیّام، ودخل آدم على زوجته حواء وحملت و جابت قایین المعروف ب «قابیل» وقالت: ﷲ الحَيّ، رزقني ولد، نشكرك یارب، یا غناتي على ها الولد الصغیر الا طلع مني! 2بعدین جابت له أخو و سمّوه «هابیل.» مرت سنوات طویلة و كبروا الأولاد و قایین صار فلاح و هابیل صار راعي غنم. 3وفي یوم من الأیّام الأخوة قدموا عطیة لله قایین قدم عطیة من محاصیل الأرض 4و هابيل قدم أغّنامه البِكر، أحسَن و أسمن ما عنده. 5و لأن ﷲ یعرف نوایا القُلوب، ﷲ قبل عطیة هابیل و رفض عطیة قایین، قام قایین عصب و تغیر وجهه! 6وﷲ قال لقایین: إلاویه معصب و وجهك متغیر؟ 7أنت لو تصرفت عدل بيبین على وجهك و بتكون فرحان! بس تدري إلاویه أنت مو عارف تتصرف عدل؟ لأن في دنب في حیاتك واقف یحارسك على الباب عشان یقضي علیك، فلا تخلي هالدنب یتغلب علیك و یتمكن منك 8لأن قایین ما سمع كلام ﷲ، و إختار یسوي الشر مو الخیر. الشر سیطر علیه و قال لأخوه: تعال خلنا نطلع، نروح المزرعة نغیر جو، يلا مشینا. یوم طلعوا، كان هابيل غافل و قام قایین و هجم علیه و قتله! 9و قام ﷲ الحَيّ سأل قایین: «وینهو أخوك؟» رد قايين: وش دراني عنه؟ چى حاطیني حارس علیه؟ 10بعدین ﷲ قال لقايين: «ویش سویت؟ صوت دم أخوك یصرخ إليّ مِن الأرض! 11من الیوّم و رایح أنت ملعون و بتتغرب في الأرض إلا فتحت بوزها و شربت دم أخوك! هدا كله من ورا إیدك! 12وهدانا قايل لك إدا فلحت الأرض ما بتعطيك من خيراتها و بتكون هایم على وجهك مشتت في هالأرض.» 13و قال قایین للرب: هدي حوبه أخوي، وش قدرني على هالمصيبة أنا! 14هدا أنت منعت عنّي برَكة الأرض وبكون بعید عن محضرك، و بعد بيكون مشرد تایه في هالأرض اهوجل من مكان لمكان. كل من بيشوفني بيقتلني! 15وﷲ قال لقايين: اي أحد یمدّ إیده علیك عشان یقتلك بنتقم منه، بعاقبه أعظم من عقابك سبع مرّات! و قام ﷲ حطّ علامة على قایین عشان إلا یشوفه ما یقتله. 16وصار قایین بعید عن حضور ﷲ في حیاته. و عاش في شرق عَدنْ في منطقة إسمها «نود.» 17دخل قايين على مرته وحملت و جابت ولد إسمه «حَنوُكُ،» و كان وقتها قایین يبني مدينة و سمَّاها على إسم ولده. 18و مرت الأیّام و حَنوُكُ جاب ولد و سماه عیراد. و عیراد جاب موصل و موصل جاب ولد مَتُوشَائِيلَ، و مَتُوشَائِيلَ جاب لامك. 19لامك كان عنده مرتین: الأولى إسمها عادة و التانیة إسمها صلة. 20عادة جابت يَابَالَ، وهو أوّل من سكن في الخيام و رعى غنم. 21واخوه إسمه يُوبَالَ وهو أوّل من عزف على العود والمزمار، 22صلة جابت «تُوبَالَ قَايِينَ» كانت شغلته يسوي الآلات من النحّاس والحديد. و أخت تُوبَالَ إسمها نعمة. 23وفي مرّة لامك قال لزوجاته الثنتين: إسمعوا یا نسواني یا عاده و یا صلة، بقول لیكم شي مهم. أنا قتلت رجال لأنه ضربني. 24ﷲ قال بيعاقب الا یقتل قایین سبع مرّات، معناها ﷲ بيعاقب إلا یقتلّني سبع و سبعين مرّة!

25آدم دخل على زوجته حواء مرّة ثانية و جابت ولد وسموه «شیث.» حواء فرحت مرّة وقالت: هدا ﷲ عوّضني عن هابیل، ضناي الا قتله أخوه قایین. 26و مرت الأیّام و كبر شیث، وجاب ولد سماه «أنوش.» وفي هداك الوقت صاروا الناس یدعوا باسم ﷲ الحَيّ.

Currently Selected:

التكوين 4: QNAV

Highlight

Compare

Copy