Roma 1
1
1Nya: ngeibu lu dang: gi ri fu" kaid' wa shid' re" lagyoo: gyeing" dayug khyo" Pho Mangsoo: khyen yu nyheing too" su: - Khristu Yesu da" dei zoo: ngoo Polu gi - mougsoug" lhid" kaid'.
2Goonham' mo Mangsoo: gi nyada" lapi: yi khyo" hau: ngei bu lu dang: ri kyo" kaid' wa ga: dang: soo" to" zi yo" dakhyoo" gyeungshang: jhoem: mungdang: moo lhid" to". 3Hau: ngeibu lu dang: ein: zigi - David akung: mo khu: lo lho: xang: su: byugung re" void da" Mangso nya: zoo: ngoonu" da" Aseing Yesu Khristu da" khyoo: nghoid. 4Mangsoo: gung khyoo" gi - Mangso: da" nya: zoo nghoid da" khyoo: ri thu bang shug wa shid' re" Mangsoo: gi agoin athang da" yoem: moo" khyo" - hau: Aseing ri shid: jang" mo doem dei to' loo nhang: bye. 5Mangsoo: gi hau Khristu khyo" wigi - byu dangain" mo, ri loem khau loem" jeing" tam" gyo: loo wa shid' re" - ngoori phoug" dab thang da" - shu" u" lagyoo: zeing dayug khyo" aya: tang: byid: bye. 6Roma voomoo" moo nyid da" nanu" we' - Yesu Khristu da" phung: byu agyeing" yi khyo" Mangsoo: khyen: yu too" mo nghoid yoomo hau: byuphung: moo boo mo nghoid nyid.
7Mangsoo: gi jheddab yoomo nya: byu yi bue" loo wa shid' re" khyen yu to" da" - Roma mo phung: byu dangain" mo jhang khyoo: he: mougsoug" ri lhid" foin: kaid'. Ngoonu" da" nya phoo Mangsoo: yo" - Aseing Yesu Khristu jang" mo je" ju" yo' myenjham" khyoo: ri - nanu" yo" yu boem baja" o".
Jeju Coung" Ngei" Da" Kyu" Mho' Dang:
8Yesu Khristu ri nanu" Loem jeung" da" khyoo: gi Moug myid gyab goin" fu" nheing loo" yoomo - ngoo gi nanu" dangain" shid' re" - Yesu Khristu khyoo: ngoo gi nga" Mangsoo: ri xang: shid" coung" nghei" nyid. 9Nya: zoo: da" khyoo: ngei bu lu dang: gi ri tid fu" lo" khyo" wigi - ngoo gi Mangso: moozoo" voin vu nyid. Ngoo gi akyu" mho' khang" moo" moo nanu" ri ajang" myed boin nyid da" khyoo: ri Mangsoo: nyang si gu nghoid bye. 10Vho: ngei nghoid rigi - athei" myang" ri nanu" jang" moo ngoo yo" ri" wa da" khyoo: bang" loo wa shid' re" ngoo Mangsoo: ri mho' nyid. 11Nanu" da" nheigloem: geing: teing jo wa shid' re" nanu" ri Venyi: jhung: shug gam byid: noug yoomo - ngoo gi nanu" yo" gye myang" mo shau" goo" nau nyid. 12Ngoo tid nau zigi - nanu" da" leom jeung" nheigloem: yo' ngoonu" da" loem jeung" zi yo" gootu: byu yi ri pang" wa shid' re" ngoo nanu" ri vho: nyid. Nanu" da" nheigloem: gi ngoori pang" thoug wa - nga" da" loem jeung" nheigloem: we' nanu" ri pang" thoug wa.
13Nga" mang nhung" yi we" - Yuda byumyu" anghoid da" tungbau byumyu" yi jang" moo Mangsoo: moo" zei: ri oung: doid lo" yhang: ti" nanu" jang" moo we' oung: doid loo" wa shid' re" - ngoo gi nanu" jhang re" wa shid' re" alheing: lheing: myid soin' bye. Nghoidloug we' akhyoo" aeung: shi" yoomo ayo" ri" shi" da" khyoo: nanu" myid boin: nyid ge'. 14Byumi" yi byukyang: yi pha jhi" si mo asi' mo - dangain" da shid' re" ngoo moo yoovoin boo yoomo 15Ngeibu: lu dang: gi ri - Roma voomoo" moo nyid da" nanu" ri we' kho" kyoo" wa shid' re" nheigloem: gye" tho' nyid.
Ngeibu: Lu Dang: Da" Phung Yoeb,
16Ngoo gi ngeibu lu dang: ri nheig shid: nheig deig loem jeung" bye. Hau: lu dang: gi loem" jeing" mo, dangain" da" Yuda byumyu" yi yo" ngheizain byumyu" yi ri xang: shid" khyoid' yu da" Mangsoo: yoem: so' phung" yoeb nghoid. 17Phoo Mangsoo: gi - byu xangsu: yi ri khasu" vho: ngei kham: yu da" khyoo: ri - ngeibu: lu dang: mo tid pang toin" shid' nyid. Hau: da" khyoo: gi xang: shed" mo zi lo" thang ju" sho' loem" da" nheigloem: mo, ayang: qei" to" da khyoo: nghoid. Houg: yoomo jhoem: dang: moo tid zigi - Mangsoo: vho: ngei kham: yu zi shau" su: gi - loem" khyo" kangso' dei nyid ca" - ga: bo.
Byu Xang: su: Yi Da" Yougnoo Yooboo
18Deingmain" da" khyoo: ri - byu yi asi wa shid' re" toem' jhed' to" da" - agyeing" ashoeb' da" yooboo dangain" ri moug: khung: mo Mangsoo: nheig no yo: khyoo: ri pang shug nyid ziri se' lo boem bye. 19Mangsoo: gi hougbang: ri - jhoug" mho' dam kaid' bye: yoomo Mangsoo: yo" sen: da" - si' ca" gu: dangain" ri - Mangsoo: gi bang" bang tid kyo' kyoo" bye. 20He mougmyid ri Mangsoo: phain" to" da akhyeing: mo nyang: xangsu: byu yi gi - Aseing da" athang agoin myonhoo: phung" yoeb ri we' Aseing gi Mangsoo: agyeing" nyang nghoid da" khyoo: ri we' goolhoo: nyang: si bye: - nyangnu" gi hid te" da" Mangso: myonhoo: ngeilang: ri amyang yu" nghoid loug yo" se' boem. Hougsu" yo" se' da" khyoo: gi nyangnu" gi Mangsoo: phain" to" da" zi yoo joem ri myang yoomo nghoid. Houg: yoomo - houg: bang: gi nyangnu" nyang: shoid' vhang: da" youg: noo yooboo da shid' re" lhoid' pyoin' wa da" khyoo: aboo loo. 21Nyanu" gi Mangsoo: ri se' boem nghoid loug we' - Mangsoo: da" phung" yoeb yo" jeju" coung" nghei moin: loug we' - acoung" anghei' byid: boem nghoid ago". Coung" nghei wa gung thid' - akyu" abo da" moo" ri za: myid soin: yu" nyid ago". Nyanu" da" asi ayeig da nheigloem: ung: khoug: moo- moug: coid' wigi nghoeb' to" 22Nyanu" tid zi gi - nyang: nya: da" gung ri - phajhi" bo ga: myid boem: nghoid loug we' - ce: phajhi" we' abo mo nghoid boem. 23Ase' shid: da" Mangsoo: ri noku ca" nghoid loug - se' shid: lo" da byu nghoo: joem - myid: khyid: dab da goug: nyoug joem - hougsu" anghoid lang" do: yu: lo" se' da" goug: nyhoug yi ngho' joem da" soolhoo: joem ri no' ku" boem ago"
24Hau: khyoo: yoomo Myangsoo: gi xangsu: byu yi ri - nyang: nya: myonhoo: ze" shoem: pyam' lho: nyang: nya: nheigloem: nya yo: phoin: khyoo: cang loo" wa shid' re" nyanu" nyang: ri she: pyam' too" bye. 25Nyanu" gi - Mangso: deingmain" da" tarha" ri - shoid' da" khyoo: yo" thid' go" pyam. Phain" too" su: da" gung thid' phain" to" da" zi ri te: loem no" ago". Phain" to" da Aseing: myonhoo: phung" yoeb ri - khanham we' loem khau noku boem baja".
26Houg: su" nghoid yoomo - Mangsoo: gi xangsu: byu yi ri - aco' ajhoid' da: nyam yo: aved avhu: da" khyoo: moo cang loo" wa shid' re" - she: pyam' too" bye. Myiyi: yi we" tarha" khyoo: khyo" gi anyid looza: myiyi: nyang: cang" zoem" go" lo" boem. 27Houg: yo" dakhyoo" ti" yuggi yi we" - myiyi: yi yo" zoem" jeung" nyid akhyoo" khyo" akoid' loo: za: - yuggi nyang: cang" nyam' yo: avoid avhu: khyo" cang wigi - yuggi nyang: cang" asho' ashid: koid' nyid: lho: - nyang: nya: aco' ajhoid' zei: da moo" zo" moin: yi" yooboo aphoug" ri kham: zo nyid abye: go".
28Xangsu: byu yi gi Mangsoo: vho: zi ri ashau" myid boem yoomo - Mangsoo: gi nyangnu" ri she: pyam' to" wigi - nyanu" gi deingmain" khyo" ayo" myid yu boem loo: yoomo akoid' eung: da" moo" ri koid' lo" boem bye. 29Nyanu" gi aco' ajhoid' akhyeing" ashoeb' da" moo" aja: ja: anyoin: athoung" zi mougmyid zi yoo ri loug gyi: zi - nheigloem: akyang" byo, lo" khyoo: - byen cang" ri nozo: khyoo: - subi" kang: ri said' khyoo: - byo, go" khyoo: - mhoug fain" zo: khyoo: pyi: cang sho: khyoo: joem ri shoid' vhang: nyid boem. Nyanu" gi - luwim gei sang: se' ago". 30Dang: soso' subi" myo nhoo: shoem: nhang: Mangsoo: ri we' ngheung" avhoo: mo nghoid. Nyang: cang" nyang: juang" go" - nghoid boin: yung" thui: gyo: - phau: fain" vo: ngeig se: subi" ri aphoug"- age khyoo: aja: ja: ri - nyheing soin: zei so' se' boem. Nya: myhi' nya: pho dang: ri we' atam" gyo: boem. 31Nheugloem: azoung" mo, - dang: soo" lid: mo, subi" ri nheig khyeug nheig myen: nheigloem: we' nyanu" ayo" toin" shid'. 32Hid: yhang: te" mo gi shid: moin: nyid ga: - Mangso: mungdang: moo tid to" khyoo: ri - nyanu" nyang: si gu nghoid loug we' - nyanu" gungdu: nyang: he: moo" ri zei: tho' moo agoo" hid: su" cang zei: nyid mo ri we' yoem: byid: tu: to' gau yi nyid boem nhung: lha".
Currently Selected:
Roma 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.