Roma 2
2
Mangso: Tarha" Dang: phyed' Khyoo:
1Haugsu" nghoid yoomo - byu gooji ri tarha" dang: phyed' su we' re" yooboo khyoid' byid wa khyoo: thang bye. Khasu" wim ga ri - nanyang: subi" ri - dang: phyed' nyid uri - nang nyang: hau: da: tarha" ri shoid' nyid. Nga" bidnoem nang tarha" dang: phyed' nyid uri nyang: nanya: gung ri nang dang: phyed' nyid zi nghoid bye. 2Houg: su" akhyeing" ashoeb' moo" zei: mo ri Mangsoo: yooboo dam kaid' nyid zi gi - koid' ge khyoo: nghoid zi ngoonu" se. 3Nghoidloug we bidnoem phoo nang gi - subi" ri tarha" dang phyed' byid: ja" yooboo ri - nang nyang: doem shoid' nyid nhung: lha". Nang gi Mangsoo: yooboo dang: phyed' jang" mo loid wa ein: shau" myid nyid la". 4Houg: za: we' anghoid shi" - nang gi Aseing jheddab nheig khyeug nyid da khyoo: - nheigloem: sheing: byid nyid khyoo: yo' kham' zeing: byid nyid da" khyoo: ri aphoug" akhyoid' koid' bye. Mangsoo: gi nang ri ngheig loem: thid' loo wa shid' re" - khyoo: shid' byid: nyid yoomo - Mangsoo: jheddab nheig khyeug da" khyoo: ri nang deing" deing si bye. 5Nghoidloug we' - nang gi u" loem' thain: ci: lho: wigi nheigloem: ayo" thid'. Houg: yoomo - Mangsoo: nheig yo; lo lho: - dain: khyo" tarha" dang: phyed' lo da" bidnyid ri - re" shid' re" je lid: da" yoo bo dam ri shau" kham zoo: wa. 6Hau: bidnyid ri byu yug khang" moo" gi nyang: nya: da" koid' moozoo" yo" dakhyoo" ti" - Mangsoo: gi aphoug" shang: byid wa zi nghoid. 7Ge da" moozoo" ri xo' zei lho: myonho: phung" yoeb ri we' ayo" shid: lo" da" pyaid ri we' -sho: nyid da" byu yi rigi - Mangsoo: gi - aphaid' ato: kangso' ri byid wa nghoid. 8Nyang: nya: akyu" ri te: sho: lho: - jo, da" khyoo: ri she: pyam' wigi - shoid' da khyoo: moo cang loo" da" byu yi gi - Mangsoo: nheig khoo" yo: zi shau" boem wa. 9Xang: shid" ri Yuda byumyu" yi hau: thang: ri tungbau byumyu" yi yo' age khyoo: mo, byu dangain" gi - kyi" khyeug sho" jhen: zi yo" - khe" ngau nyid da dam shau" kham: zo: boem wa. 10Xang: shid" ri Yuda byumyu" yi houg yo" dakhyoo" ti" tungbau byumyu" dangain" mo yo' ge da" moo" zei: mo rigi - myonhoo: ngeilang: we' - myenjham" ngeipyo: khyoo: we' - kham: zoo: nhang: wa zi nghoid. 11Phoo Mangsoo: gi byu xang: su dangain" ri dakhyoo" ti" tarha" dang: phyed' loo wa zi nghoid.
12Moshe da tarha" ri dajhi' we' ase' da" Yuda byumyu" anghoid tungbau byumyu" tarha" shoid' lo" nghoid rigi - nyanu" gi tarha" ri asi' mo nghoid. Moshe tarha" ri se' da" Yuda byumyu" yi tarha" shoid' lo" ri nyanu" gi - lhid" to" tarha" moo tid to" zi yo" dakhyoo" ti" yooboo dam shau" kham wa zi nghoid.' 13Byu gi - lhid" to" tarha" ti" shau" gyo: ziyo' - Mangsoo: shid' moo deingbyeing" mo ayo" bui. Lhid" to" tarha" moo bo zi yo" dakhyoo" ti" cang lo" ri za: Mangso: da shid' khoin" moo deingbyeing" mo dayo" bue" lo. 14Tungbau byumyu" yi gi -hau: da tarha" ri ashau" kham: yu boem. Nghoidloug we' - tarha" moo tid to" zi ri nyang: tu: nyang: myid vho: khyo" cang lo" da" uri tarha" ri shau" kham: yu mo bue" lo. 15Moshe tarha" moo tid to" da" khyoo: joem gi - houg: bang" da" nheigloem: seing" khyab' moo lhid" tab' to" yhang: ti" nyang: bo jo da" khyoo: ri houg bang: nyid yab zei sid yen" jang" mo toin" shid nyid. Nyanu" da" nheigloem: jeung" mo we' deingmain: khyoo: toin" shid' nyid. Nyanu" myid soin: khyoo: gi - dalheing: lheing: nyanu" ri yooboo foin: lho: dao lheing: lheing: gi - nyanu" ri gooloo, goem nyid. 16Houg: yoomo - ngoo phyed" kyo" da" ngeibu lu dang: seig yo" dakhyoo" ti" - tarha" dang: phyed' da bidnyid moo Mangsoo: gi - Yesu Khristu khyo" wigi - byu dangain" mo, - zau" nyhoem" to" da" myid soin: khyoo: yi ri - tarha" dang: phyed' loo wa nghoid.
Yuda Byumyu Yi Yo" Tarha" Khyoo:
17Nghoidloug we' bidnoem phoo we" - nang gi nanya: gung ri Yuda byumyu" nghoid ga: wigi - Yuda tarha" moo yoem: loem lho: - Mangsoo: shid' khoin" moo nang nghoid boin: nyid. 18Nang gi Mangsoo: ce: noem zei: wa vho: zi se' nyid su: nghoid. Yuda tarha" khyo" jo ziri khyen yu wa shid' re" jhau" yu bye: su: nghoid. 19Nang gi - Myo amyang mo da" khyoo: shed' su: -moug: coid' moo nyid mo da" bidbang - deing" deing nghoid. 20Byu gang yi ri khyoo: shed' su: - phajhi" asi' shi" mo da sara nghoid ga: deing" deing nang nghoid. Nang gi Yuda tarha" phajhi" yo" deingmain" da" khyoo: ri se. 21Nang gi subi" ri gi jhoug" byid: -ciwim nanya gung ri gi ajhau" lha". Nang gi subi" ri akhoug" wa shid' re" kho" kyo" lho: ciwim na nyang: gi khau" nyid lha". 22Nang gi subi" myi: ri alhoid' goo" ga: tid lho: - ciwim wigi nang nyang: gi subi" myiyi: lhoid' nyid lha". Nyang gi soolhoo no' zi ri nheig no ga: lho: ciwim wigi nanya gung gi noku yhoem: ri phyo' nyid lha". 23Nang gi Mangso: tarha" yo" khyoo: ri phau khuang yen" lho: - ce: noem wigi nya: tarha" ri shoid' vhang: khyo" Mangso: da" myo nhoo: ri ze" shoem: nyid lha". 24Jhoem: mungdang: moo tid zi gi - Nghizain byumyu" yi gi Mangso: da" myeing khyang" ri akhyeing" ashoeb' tid nyid boem zi gi nanu" Yuda byu yi yoomo nghoid - ga: tid.
25Nang gi Yuda tarha" ri cang" su nghoid lho: re" da sho" yid thang: yham" ziri phoug" tab' ga nghoid loug we' nang gi gyeing" nyang: Yuda tarha" ri atam gyoo: su danghoid nyid rigi sho" yid thang: ayham" ri je gi wa. 26Gyeing" nyang ga ri sho" yid thang ayham" da tungbau byumyu" dayug gi - lhid" to" tarha" moo tid to" ziri cang nghoid rigi hau: yug ri Mangsoo: gi sho" yid thang: yham" ci: su: yhang: ti" soin: yu wa zi anghoid la". 27Nang gi lhid" cab' wim lhid" to" da" sho" yid thang: yham" da" khyoo: ri cang loug we'. tarha" ri shoid' nyid. Houg: yoomo tungbau byumyu" yi gi - nanu" Yuda byumyu" yiri tarha" dang: phyed boem wa nghoid.Nyanu" gi gungshoo" yo" sen: da" sho" yid thang: yham" zi akham: boem nghoid loug we' tarha" rigi cang boem. 28Dang: thang: said' ba ein: rigi - hang" gi Yuda byumyu" agyeing" nghoid la". sho" yid thang: yham" su: la". (Goobang: gi Yuda byumyu" anghoid ) byu dayug gi sho" yid thang: yham" ci: khyo" Yuda byumyu" ayo" bue" loo". 29Gyeing" da" Yuda koem' gi - nheigloem: khoug; mo sho" yid thang: yham" ci: su: nghoid nyid. Hau yug ri Yuda byumyu" bue" loo nhang: da" zigi - lhid" to" da" tarha" khyo" anghoid - Hau yug gi byu yi wi coung" nghei byid: zi shau" su: anghoid. Mangso: wigi coung" nghei" too" su danghoid.
Currently Selected:
Roma 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.