ZEKHARIA 2
2
Laki' Tei" Myang da" Yoeb Myang
1Gootu: yoeb myang daloem: gi nya: lo moo laki' tei" ci: su: ri ngoo myang. 2«Nang khakhyoo: yhe: lo" nyid» ein: ngoo myid: yu" ri
nyang: gi «Yerusalem voomoo" gi- khayhi' gyi: khayhi' sheung: ziri ke' yu" wa shid re" yhe: zi nghoid» ga: tid.
3Hug: lang" ngoo yo' doem go" nyid da" moug: lagyoo: thu lo" uri moug: lagyoo: gootu: dayug gi nya: jhang re" lo. 4Moug: lagyoo: thang: moo ju" re" yug ri xang: shi" yug lhoem: tid zigi «Nang gei yhe: lho: hau: laki' yang: ci: su: ri hid su" ein: tid we'. Yerusalem voomoo" vang khyam: gi atho' koem" yu" loo: sho' gyi: lam: lo wigi byu yo' gougnyhoug myo: je: loo wa. 5Aseing gi Yerusalem voo loem: lheing khab' mo voomoo" myi: vang khyam: bue" lho:-nyang: gi hau: jang" moo nya: myonhoo: phung" yoeb bain sho' yo' nyid nyid wa ein: yhe: tid we'» ga: tid.
Pyoung" She: Loo" Shoug" mo, ri Yhoem: Khyoo: Doem Khe: Khyoo:
6-7 Aseing gi nya: mung" byu yiri hid su" tid-«Ngoo gi nanu" ri mougmyid myonhoo: shoid khang" moo" khyoo:- byo sain" loo" nhang: bye:. Nghoid loug we' akhid" pyoung" she: lo" zi shoug" mo, nanu" gi Babelon mo wigi Yerusalem khyoo: doem tau" loo" loo we'. 8Nanu" ri zang" thung" su: gi Nga" myo, loem: moo zang" thung" su: nghoid» ga: tid. Nga" da" byumyu" yiri khaid zain: bye: bang: ri he: mungdang: tid kyoo" wa shid re" myhang: thang Aseing ngoo ri nhang: kaid. 9«Nga" mung" byu yiri phyo' mo, nanu" rigi Aseing nyang: latoo: phug wa zi nghoid. Nanu" join koid nyid da" Israela byumyu" yigi nanu" da" jonu" lhoid pyam byid: wa zi nghoid ein: yhe: tid kyoo" gi'» ga: tid.
He: da" zi bue" loo lang" gi ngoo ri nhang: kaid su: gi yoem: moo" bo da" Aseing nyang: nghoid nhung:» ga: dangain" mo, se' loo goo" wa zi nghoid. 10Houg: lho: Aseing tid zigi «Yerusalem bang: we"- jikhoin" khoin" lho: gau yi nyid we'. Khasu" wim gari ngoo gi nanu" da" akhoug: moo re" bo nyid wa zi nghoid» ga: tid.
11Hau: da" bidnyid ri byumyu" myoo" sho' bang: gi Aseing ri loem khoug: lo boem wigi nya: mung" byu yi bue" lo boem wa nghoid lho: ngoo gi nanu" akhoug: moo nyid wa nghoid. Nyang: yoem: moo" bo Aseing gi ngoo ri nanu" jhang khyoo: nhang: kaid su: nghoid ziri nanu" se' lo boem wa nghoid. 12Yuda mung" rigi Aseing nyang: seing: ci: da" gyeung" shang: mung" dakheing: doem bue" loo nhang: shi" wa nghoid. Yerusalem we' nyang: je" jheddab da" voomoo" doem bue" loo wa nghoid. 13Aseing shidkhoin" moo nyid da" byumyu" yi dangain" bang: we"- sam: zoo: nyid we'. Khasu" wim gari nyang: gi nya: gyeung" shang: yhoem: moo" moo re" lo nyid bye:.
Currently Selected:
ZEKHARIA 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.