COUNG" NGHEI 45
45
Khokham phoo Yo' Sen: Da" Lo, xo' Jikhoin" #Kora amyed ashen, yi da" dang: zhoem yo' jhed kang: jikhoin"
1Khokham pho, shid re" he: da" jikhoin" ri ngoo lhid" da" uri
nga" nheigloem: ung: khoug: moo young" du da" dang: yo' byeung" jo.
Gye" reung da" mougsoug" lhid" sara: phoo ci: da" mhug youg: yhang: ti"
nga" da" yhoo: gi dang: zhoem tid wa zi jen" jen" nghoid nyid.
2Nang gi yug gi nu" yi moo gung du: young" thang su: nghoid bye:.
Nang gi dang: khyoo" jang jang yo" tid su: nghoid bye:.
Mangsoo gi nang ri khanham we' mainkaid byid: nyid bye:.
3Yoem: moo" bo da" Khokham phoo we' re" sham ri voin ri re,.
Nang gi myonhoo: phung" yoeb yo' amyeing" akhang" yo'
byeung" jo, su: nyang: nghoid bye:.
4Deingmain" ziyo' nyeung: veung" da" tarha" ri lhoug zung" zoore
5re" da" myoo: joem gi coin: zi nghoid wigi
re" gyivoo yi da" nheigloem: khoin: jhung: ri beug kyang byid: nyid.
Byumyu" yi we' re" da" khyid yang: moo: leung gyo" lo boem wa.
6Mangsoo nang ri byid: bye: da" mungdain: gi
apyaid atoo: moo: dageung: teung jo, wa zi nghoid.
Nang gi re" da" byumyu" yiri nyeung veung" da" tarha" yo'
vhoebkhang" nyid wa zi nghoid wigi
7nang gi deingmain" da" khyoo: ri nang jheddab nyid lho:
akhyeing" ashoeb da" moo" ce" ja: ri we' ngheung" nyid.
Hougsu" nghoid yoomo Mangsoo re" da" Mangsoo gi
nang ri khyen: yu lho: gootu: khokham hang" tho' moo: we'
je" gau yi ngei pyo: da" khyoo: nang ri: foid shoin" byid: nyid.
8Re" da" byimi joem gi mura bain: soug joem yo' nam pyo: nyid wigi
music phung: bang: gi xang: zei yo' mhoin" to" da" khokham khoo" moo:
nang ri shapyoo: byid: nyid boem da:.
9Re" khokham khoo" mo zoomyi: yi moo khokham yi da" zoomyi: yi we' bo nyid boem ago".
Re" zhungtang da" lo, yo shoid moo myo, yi lo" da" sheing: ziyo' lho, yhoung ci: da- khokham myhi' yab jo.
10Khokham pho, da" myhi' seig we' ngoo citid ziri tam" gyoo: we'.
Re" da" byumyu" yi yo' re" da" seing" tain" bidnoem yiri to" myhed pyam we'.
11Re" da" younglho' gungdu: yoeb bang gi
khokham pho, da" nheigloem: ri lang: yu vho: ngei nhang: wa zi nghoid.
Nyang: gi re" da" Aseing nghoid nyid yoomo nang gi nya: dang: ri tam" gyo: nyid ca.
12Turu byumyu" yigi nang ri jhungshug jhung: lang- re" byid: lo boem wa zi nghoid.
Yoo" mo, di mo, we' re" da" myonhoo: sho lo boem wa zi nghoid.
13Khokham zoomyi: zoo: yigi khokham khoo" vang khoug: moo nyid.
Nyang: gi khayhi' gyeing" young" lha. Nya: byisheing: gi sheing: khyeing: joem yo' yo, to".
14Vedvoo: aja: ja: yo' joeb da- byisheing: joem yo'
lho, yhoung ci: da" myhi' seig ri khokham shidkhoin" khyoo: shu" yhe: lo" zi shoug" nyid.
Myhi, seig da" dang: cang: myhi' joem we' bo cang lo" lho:
khokham jhang khyoo: shu" vang lo" zi shoug" nyid boem.
15Gau yi ngeibu: ziyo' Nyangnu" re" lo boem lho:
Khokham khoo" khyoo: vang lo" boem ago".
16Re" phoug" re" phyid" da" khokham azuang joem ri
xo' kham: yu wa shid re" nga" da" khokham phoo we'
nang moo: yug gi zoo: myoo" sho' khu: loo wa zi nghoid.
Nang gi nyangnu" ri mougmyid gyab, goin" da" tho' moo vhoeb da" zoug: ludaid bui" nhang: wa.
17Nga" da" jihkoin" dang: joem gi re" da" myeing khyang" ri
pyaid moo: too: moo bugthu sheing" jhu" nhang: wa zi yo'
byu yugkhang" moo" gi nang ri pyaid moo: too: moo
coung" nghei nyid boem wam bye: o".
Lacid Bible © Bible Society of Myanmar, 2009.