GYUNG: SOO" 34
34
Moug: Kyoo" Joem
1 Aseing gi Moshe ri 2Israela byumyu" yi shid re" vhoo: mo jhau" shid dang joem ri byid: da:. «Ngo wigi nanu" ri byid: da" Khanan mung" khyoo: nanu" vang yhe: lo" uri nanu" da" mougmyid mo mougkyoo" joem gi vhoo: mo ziyo' dakhyo" nghoid wa. 3Mougpyi: shoid mo mougkyoo" gi Zin dain" pyoid yoo mo zi Edom mougkyoo" ju" sho' ce" loo" wa zi nghoid. Hau: zigi bidthu shoid thoem" shid: mougpyi: mo shid" wa zi nghoid. 4Houg: mo mougpyi: shoid khyoo: Akarabim koolhang khyo" lid lo" wigi Zin khyo" xo' lid lo" zi mougpyi: shoid Kadesha Berea ju" sho' nghoid da:. Houg: mo bidvang mougzhung: shoid Hazara Adara yo' Azmon ju" sho' nghoid wa. 5Houg: zigi Meing: gung panglai: thang: yo' Egutu mung" mougkyoo" janggyoin: ju" sho' nghoid. 6Bidvang shoid mougkyoo" gi Meing: gung panglai: nghoid. 7Mougzhung: shoid mougkyoo" gi Meing: gung panglai: yam khyo" cang do, lo" zi Hora boem ju" sho' 8hau: joyoo mo zi Hamad koolhang ju" sho'. Houg: mo zi Zedad 9Zephran ju" lo" wigi Hazara Enan moo: lo" thang wa zi nghoid. 10Bid thu shoid mo mougkyoo" gi Hazara Enan mo Shepham ju" sho' nghoid wa. 11Hau: zigi mougpyi: shoid Ain da" bidthu shoid Habela ju" sho' yo' Galile thoem" bidthu shoid bouggung joem ju" sho 12Houg: mo mougpyi: shoid khyoo: Yodan gyid lang cang wigi Thoem" shid: ju" sho' nghoid wa.
He: zigi nanu" mung" da" myid: shoid goin" mo mougkyoo" joem nghoid»
13Houg: yoomo Moshe gi Israela byumyu" yiri «He: zigi nanu" gamboem kho' lho: gam yu wa da" mougmyid nghoid. Aseing wigi byumyu" gau kung: dakhyam" ri gam byid: to" da" mougmyid nghoid. 14Ruben- Gad yo' bidthu shoid mo Manashe kung: agung dago" yi" gi nyangnu" gamboem ri nyangnu" da" yhoemkhung: khyo" 15Yerikho thei: tab Yodan gyid lang bid thu' shoid tab moo: shoug" seing: yu abye: go"»
Mougmyid Kho' Gam Wa Yoovoin Yo" da" Vhujhung: yi
16 Aseing gi Moshe ri 17«Khainjung Eleaza yo' Nun da" nya: yuggi zoo: Yoshu gi byumyu" yiri hau: mougmyid ri gam byid: wa. 18Mougmyid kho' uri nya: tang: ri pang" thoug wa shid re" byumyu" kung: khang" moo" mo vhujhung: dayug yug ri we' shu" yu we'» ga: tid.
19-28Hid: bang: gi Aseing khyen: to" da" bang: nghoid.
| Akung: | Vhujhung: |
|---|---|
| Yuda | Yephune da" yuggi zoo: Khaleb. |
| Simun | Amihuda da" yuggi zoo: Shelumila |
| Benyamin | Khinslora da" yuggi zoo: Elida |
| Dan | Yogli da" yuggi zoo: Bukki |
| Manashe | Ephod da" yuggi zoo: Haniela |
| Ephrim | Shiphtan da" yuggi zoo: Kemuela |
| Zebulun | Parnag da" yuggi zoo: Elizaphan |
| Ishakha | Azzan da" yuggi zoo: Paltiela |
| Ashe | Shelomi da" yuggi zoo: Ahihuda |
| Napthali | Amihuda da" yuggi zoo: Pedahela |
29Hid: bang: gi Khanan mung" moo: Israela byumyu" yi shid re" agyid aso moug: kho' gam wa Aseing wigi moo" foin: too" shoug" bang: nghoid ago".
Lacid Bible © Bible Society of Myanmar, 2009.