GYUNG: SOO" 32
32
Yodan Gyid Lang Bidthu Shoid mo Byu Kung: Joem
(Tid 3:12-22)
1Ruben yo' Gad kung: bang: gi gougnyhoug myoo" sho' yo" da:. Nyangnu" gi Yazera yo Gilead moug: gi nu: kyung shid re" khayhi' ge ziri shau" myang lang" 2nyangnu" gi Moshe yo' Eleaza we' wigi Shava phung: mo gootu: vhujhung: yi jhang khyoo: yhe: lho: 3-4«Aseing wigi Israela byumyu" ri nyid seing: yu wa shid re" pang" byid: da" he: Atarod- Dibon- Yazera- Nimra- Heshbon- Eleale- Sibma- Nebo yo' Beon voo joem gi gougnyhoug shid re" gye" ge ziyo' ngoonu" moo: gougnyhoug gye" myoo: sho' yo" boem ago". 5Jeju" mo he: mougmyid joem ri ngoonu" da" ziyoo jonu" khyo" byid: la. Houg: lho: ngoonu" ri Yodan gyid lang gu: dab wigi hougmoo: ayhe: nyid nhang: ja"» ga: tid ago".
6Moshe doem phug lho: «Nanu" da" Israela byu mang: nhung" yi gyi khaid yhe: uri nanu" hid: moo: nyid kho' goo" wa la". 7Aseing wigi Israela byumyu" yiri byid: to" da" mougmyid khyoo: Yodan gyid lang gu: dab wigi yhi: wa moo" moo: yoem: shoin: wa khyo" nanu" ciwim yoem: voem" kaid nyid ago" la". 8Nanu" da" phoug" phyid" yigi ngo wigi hau: mung" ri joo" yhe: yu" wa shid re" Kadesha Barne mo nhang: kaid uri hougsu" koid ago". 9Nyangnu" gi Eshkola langkhung" ju" sho' yhe: wigi hau: moug: ri yhe: myang ago". Nghoid loug we' nyangnu" doem tau" lo ri byumyu" yiri Aseing byid: to" moug: khyoo: vang yhi: wa moo" moo: yoem: shoin: sho' nyangnu" koid ago". 10Hau: nyid" ri Aseing nheig yo: wigi dangsoo" daloem: to" da:. 11Nyangnu" ngoo ri dang: azung" yoomo ngoo Abraham- Isag yo' Yaku bang: ri dangsoo" byid: to" da" mougmyid khyoo: Egutu mo thu lo da" eigxi: zain yo' atho' mo yuggi yi hang" we' ayo" vang wa ein: ngoo jham' tang: too" bye:. 12He: zigi Kenizi byu Yephune da" yuggi zoo: Khaleb yo' Nun da" yuggi zoo: Yoshu mo lid wigi yugkhang" moo" bo zi nghoid. Nya: eig yug gi Aseing moo dang: zung" nyid ago". 13Aseing gi byumyu" yiri nheig yo: lho: nyang: ri angei nhang: da" byu daxeig goin" shid: doem: sho' dain" pyoid yoo cang myid: xi: zain so" lheing yen" nhang: abye:. 14Houg: lho: akhid"- nanu" gi nanu" da" phoug" phyid" yi da" joyoo moo: thid vang abye: go". Yooboo yo" da" byuxeig aseig dayang: gi Aseing da" nheig joem: yo: da" ziri Israela byumyu" adang moo: khe: khyo' yu wa jen" jen" nghoid nyid abye: go". 15Ruben yo' Gad byumyu" yi nanu" gi akhid" nya: thang: cang wa he: pyam nghoid rigi nyang: gi he: byumyu" yiri dain" pyoid yoo moo: dalheing: doem she: pyam wa nghoid ziyo' nyangnu" byo, yoin" lo" zigi nanu" da" yoovoin nghoid wa» ga: tid.
16Nyangnu" Moshe jhang tab yhe: wigi «Xang: shi" ngoonu" yang joem shid re" hid: moo: lugzeing yo' khyam: kyam' wigi ngoonu" yhoem: byu khau: nghi: mo, shid re" vang khyam: yam pyam da" voogung shi" de: yu wa akhang" byid: la. 17Hau: thang: ngoonu" gi ngoonu" da" Israela byencang" yi yo' dage" meing: zain: jang: khyoo: cang yhi: wa nghoid wigi nyangnu" da" ziyoo jonu" bue" loo wa da" mougmyid moo: ngoonu" yhe: yo" nyid ayo, ju" sho' gyi khaid jang" moo vhu" shi: wa. Hau: ayo, gyoo: moo ngoonu" ri khoug: nghe: nyid bang: he: meing: mo gyi joem lo, mo goem loem wa shid re" hid: moo: vang khyam: bo da" voo joem moo: nyid ca" goo" wa. 18Gootu: Israela byu yi dangain" mo, nyangnu" ri kho' byid: da" mougmyid ri yo" seing: yu da" ayo, ju" sho' ngoonu" gi ngoonu" da" yhoem: khyoo: aphang: wa. 19Ngoonu" gi Yodan gyid lang thei: tab mo nyangnu" phung: mo ziyoo jonu" ciri: we' abo seing: wa. Ciwim gari: ngoonu" gi he: Yodan gyid lang bidthu shoid mo ngoonu" nya: gamboem ri yo" yu to" boem bye:» ga: tid boem.
20Moshe doem phoug tid zigi «Nanu" tid zi gyeing" nghoid rigi he: Aseing da" shidkhoin" moo meing: zain jang: khyoo: yhi: wa soin' ge'. 21Nanu" da" gyi zain wa yuggi yi dangain" gi Yodan gyid lang ri gu: dab yhe: wigi Aseing da" amyeing" dang: mo gyivoo yiri Aseing wigi oung: pyam da" ayo, ju" sho' nyangnu" gi ngoonu" gyivoo yiri khaid zain: ca" zi nghoid ago". 22Houg: lho: hau: mougmyid ri seing: yu wa. Hau: thang: nanu" doem shoug" tau" loo goo" wa. Ciwim gari: nanu" gi Aseing ri we' nanu" da" Israela mang: nhung" yiri we' voin byid: ca" da" yoovoin ri zei: pyeing byid: bye: yoomo nghoid ago". Houg: lang" Aseing gi he: Yodan gyid lang bidthu shoid mo nanu" seing: da" mougmyid ri asoo" xoem" byid: loo wa. 23Nghoid loug we' nanu" gi nanu" da" dangsoo" ri acang pyeing nghoid rigi nanu" gi Aseing ri yooboo shoid thougtheung zi nghoid wa ein: ngoo nanu" ri tid poin" too" bye:. Houg: yo' sen: wigi ciwe' ashoid goo". Nanu" gi nanu" nya: yooboo yoomo yooboo dam shoug" kham zoo: goo" wa. 24Houg: yoomo nanu" da" voomoo" tam: wigi nanu" da" yang joem shid re" khyam: we' kyam' ge'. Nghoid loug we' nanu" koid too" bye: da" dangsoo" rigi koid ge'» ga: phug tid.
25Gad yo' Ruben byu yi gi «Ludaid phoo we" nang amyeing" byid: ziyo' dayhang: ti" ngoonu" koid wa bye:. 26Ngoonu" da" yhoem: seing: myhi' yo' zoo: yi ngoonu" da" nu: kyung yo' yang joem gi he: Gilead mo voogung joem moo: nyhid: too" khoo' wa zi nghoid. 27Nghoid loug we' ngoonu" dangain" gi Aseing wigi amyeing" byid: da" akhoug: moo: meing: zain: yhi: wa jen" jen" nghoid bye:. Nang tid bye: ziyo' dakhyoo" ti" ngoonu" gi Yodan gyid lang gu: dab wigi meing: zain: wa» ga: tid ago".
28Houg: yoomo Moshe gi Eleaza- Yoshu yo' gootu: Israela vhujhung: yiri he: amyeing" dang: joem ri byid: da:. 29«Gad yo' Ruben byu yi Yodan gyid lang ri gu: dab lho: Aseing amyeing" byid: da" akhoug: moo: meing: zain yhi: wa jen" jen" soin wigi nyangnu" pang" thoug yu yoomo mougmyid ri nanu" yo" oung: yu nghoid rigi nyangnu" ri nyangnu" da" ziyoo jonu" khyo" Gilead moug: ri kho' byid: ge'. 30Nghoid loug we' nyangnu" gi Yodan gyid lang ri agu:- nanu" yo' dage" meing: we' azain: nghoid rigi nyangnu" gi nanu" yo' dayhang: ti" Khanan mung" mo nyangnu" seing: da" gamboem riza: dashau" yu goo" baja"» ga: tid.
31Gad yo' Ruben byu yigi «Ludaid phoo we" Aseing da" amyeing" dang: yo' dayhang: ti" nanu" koid wa. 32Ngoonu" gi he: Yodan gyid lang bidthu shoid mo ngoonu" da" ziyoo jonu" mougmyid ri yo" zoem: too" wa shid re" nya: amyeing" dang: akhoug: moo: Yodan gyid lang ri gu: dab yhe: lho: meing: zain: wa» ga: tid ago".
33Houg: yoomo Moshe gi Gad yo' Ruben kung: yi yo' Manashe kung: agung dayi" ri Amori khokham Sihon da" mougmyid dangain" yo' Bashan khokham Oga da" mougmyid mo voogung joem yo' hau: aqei ayam mo siyoo voogung joem bo bo wigi joyoo gam kho' byid: da:. 34Gad kung: bang: gi gyidab vang khyam kyam' da" Dibon- Atarod- Aroera 35Atrod Shophan- Yazera- Yobeha- 36Bed Nimra yo' Bed Haran voogung joem ri tam: to" ago". 37Ruben kung bang: gi Heshbon- Eleale- Kiriathaim- 38Nebo- Bala- Meon (he: myeing ri thid pyam bye:) yo' Sibma voogung joem ri tam: to" ago". Nyangnu" gi nyangnu" doem tam: to" da" voogung joem ri myeing aseig myheing ago".
39Manashe da" nya: yuggi zoo: Makhira kung: bang: gi Gilead mung" khyoo: jhen" vang yhe: wigi hau: ziri yhe: seing: yu ago". Hougmoo: nyid da" Amori byu yiri we' yhe: khaid thu pyam boem. 40Houg: yoomo Moshe gi Makhira kung: bang: ri Gilead moug: ri byid: wigi nyangnu" hougmoo: nyid boem. 41Manashe kung: mo Yaira gi voogung dayham" ri khaid zain: khyoid yu lho: hau: joem ri Yaira da" voogung joem ga: myeing myheing pyam da:. 42Noba gi Kenad yo' houg: mo voogung joem ri khaid zain: khyoid yu lho: nya: myeing ri yu wigi Noba ga: myheing pyam da:.
Lacid Bible © Bible Society of Myanmar, 2009.