GYUNG: SOO" 22
22
Moba Khokham gi Balam ri Khi: Nhang: Kaid Khyoo:
1Israela byumyu" yigi xo' yhe: lo" lho: Yerikho yo' tab cang" tab- Yodan gyid lang da" bidthu shoid Moba jang: pa: moo: dab koid nyid boem.
2Zipo da" nya: yuggi zoo: Moba khokham Balag gi Amori byumyu" yiri Israela byumyu" yi wigi khasu" koid pyam ziyo' nyangnu" khamyhoo' myo: ziri shoug" gyoo: lang" 3nyang: yo' nya: mung" byu yi gyoug dain nyid ago". 4Moba byumyu" yigi Midian byumyu" vhujhung: yiri «He byu phung: zeing gi coung" zoo: jang: mo vufu" ri nulo: wigi zo: pyam yhang: ti" ngoonu" aqei: ayam dangain" ziri amyang" ri phyo' shoin' pyam goo" wa myang» ga: tid ago". 5Houg: yoomo khokham Balag gi Amo mung" Uphrad gyid lang nam mo Pethora voogung moo nyid da" Beora da" nya: yuggi zoo: Balam ri khi: wa shid re" lagyoo: joem ri nhang: kaid. Nyangnu" gi nya: jhang Balag mo pyeing: dang: ci: yhe: ago". Ngoo nang ri si' nhang: nau zigi «Egutu mo byumyu" damyu" goin" bang: ju" re" nyid abye: go". Houg: mo byu joem gi joyoo khang" moo" moo: byeung" sho' nyid nyid wigi ngoonu" mougmyid ri lhoid yu pyam byid: wa ga: kyug nhain' nyid boem ago". 6Nyangnu" gi ngoonu" tho' je myo: ago". Houg: lho: jeju" khyo" nyangnu" ri nga" shid re" nheing" khoin" re" kaid byid: we'. Houg: lang" ngoonu" gi nyangnu" ri oung: pyam wigi he: mougmyid mo nyangnu" ri yo" khaid thu pyam abe. Nang wigi mainkaid byid: da" byu joem mainkaid jeju" yo" wigi nang wigi nheing" lang" byu joem moo: nheing" khoin" zang" goo" wa ziri ngoo se'» ga: pyeung: kaid.
7Houg: yoomo Moba yo' Midian byumyu" yi da" vhujhung: yigi nheing" khoin" shid re" aphoug" ci: wigi Balam ri Balag da" pyeing: dang: yhe: byid: ago". 8Balam gi nyangnu" ri «Hid: moo: damyen yhoeb khoo ge'. Aseing ngoo ri citid kyo" ga: ziri nab kyoo' nanu" ri tid kyoo" wa» ga: lhoem: tid. Houg: yoomo Moba byumyu" vhujhung: yigi Balam jhang theing: nyid ago".
9Mangsoo gi Balam jhang re" lho: myid: zigi «Nang yo' dage" theing: nyid da" hid: bang: gi hang" nghoid lha"» ga: myid.
10Nyang: gi «Moba khokham Balag wigi nyangnu" ri nga" jhang khyoo: nhang: kaid wigi 11Egutu mung" mo loo go" da" byu damyu" gi he: mung" damung" goin" moo: nyid byeung" jo, ago". Nyang: gi nyangnu" ri oung: pyam wigi yo" khaid thu pyam wa khyo" nya: shid re" nyangnu" ri ngo wigi nheing" khoin" kaid nhang: nau ga: re" tid bang: nghoid ago"» ga: tid da:.
12Mangsoo gi Balam ri «He byu joem yo' acang loo". Israela byumyu" yiri nheing" khoin" akaid. Ciwim ga: ri nyangnu" gi nga" da" mainkaid jeju" yo" yu to" ago"» ga: tid.
13Thang: nab kyoo ri Balam gi Balag da" lagyoo: yi jang" khyoo: yhe: lho: «Yhoem: khyoo: doem tau" ge'. Nanu" yo' ngoo dage" cang ri" wa ziri Aseing toem' da» ga: tid. 14Houg: yoomo nyangnu" gi Balag jang" khyoo: doem tau" lo" wigi Balam nyangnu" yo' dage" loo wa ziri he: pyam khyoo: ri nyang: ri tid khyoo" bye:.
15Hau: thang: Balag gi xang: shi" bang: tho' je phung gyi: mo, ri je myoo: sho' nhang: bye:. 16Nyangnu" gi Balam jhang yhe: wigi he: Balag da" pyeing: dang: nya: shid re" yhe: byid: bye:. «Nga" jhang khyoo: nang ri" wa ziri jeju" mo ce: wigi we' atoem' too" goo" baja". 17Nang ri aphoug" jhungshug je myoo: sho' byid: wigi nang tid zi ciri: we' ngoo koid byid: wa. Jeju" mo re" wigi he: byumyu" yiri nga" shid re" nheing" khoin" re" kaid byid: we'» ga: tid.
18Nghoid loug we' Balam gi Balag wigi ngoo ri nya: khokham kho" mo sheing: yo' ngei dangain" byid: nghoid loug nga" Aseing Mangso da" amyeing" dang: mo nge thang ziri lang" atam" gyoo: wa zi anghoid. 19Nghoid loug we' goo" bang: koid ziyo' dayhang: ti" jeju" mo damyen lang" shi" we'. Houg: lang" Aseing wigi ngoo ri daja: ja: tid wa atid wa ein: ziri ngoo yo" si' wa» ga: tid.
20Hau: myen ri Mangsoo gi Balam jhang re" wigi «He: byu yi re" jhang ju" re" wigi nang ri nyangnu" yo' dage" cang loo" wa mho' nghoid ri byen soin' lho: cang yhi: we'. Nghoid loug ngoo tid khyo" za: koid we'» ga: tid da:. 21Houg: yoomo thang: nab kyoo' Balam gi nya: loo zei: ri doo: soin' lho: Moba vhujhung yi yo' cang yhe: lo" da:.
Balam yo' Nya: Loo zei:
22Balam yhe: lo" ziri Mangsoo nheig yu" yo: da:. Balam gi loo zei: dang moo: zhung: wigi dei zoo: eig yug yo' dage" yhe: lo" da:. Aseing da" moug: lagyoo: gi khyoogung moo: lhoem: yab xau' da:. 23Loo zei: gi hau: joyoo moo: sham: ci: wigi yab jo, da" moug: lagyoo: ri myang lang" khyoomoo" mo khyoo: thung vang lho: jang: pa: khyoo: yhe: lo" da:. Balam gi loo zei: ri baid lho: khyoomoo" shoid khyoo: doem koin" yu da:. 24Hau: thang: moug: lagyoo: gi zabyid khyam: eig khyam: da" lugxi' khyam: eig shoid agyoo: khyoo: jhab da" joyoo moo: yab xau' to" da:. 25Loo zei: gi moug: lagyoo: ri myang lang" lug xi' khyoo: do, lo" wigi lugxi' gyoo: moo: Balam da" khyid: ri nyham" cab pyam byid: da:. Balam gi loo zei: ri doem baid da:. 26Dalheing: dam moug: lagyoo: gi shid khyoo: yhe: lo" wigi kha: shoid khyo" we' ayo" jang" da" khyoo: jhab moo: lo" yab jo, da:. 27He: lheing: moug: lagyoo: ri loo zei: myang lang" vhoeb loo" khari" da:. Balam nheig yo: re" wigi loo zei: ri nya: lhamdung: yo' baid da:. 28Hau: thang: Aseing gi loo zei: ri dang: se' tid wa da" yoem: so' byid: wigi Balam ri «Nang ri ngoo cikoid bye: la". Nang ngoo ri ciwim yoomo soem" lheing: baid lha"» ga: myid: bye:.
29Balam gi «Nang ngoo ri koopyoid yhang: ti" koid yoomo nghoid. Ngoo sham: ci: nghoid rigi nang ri said pyam zi nghoid wa bye:» ga: tid.
30Loo zei: gi «Ngoo gi nang dapyaid goin" zhung: lo da" loo zei: anghoid rhe". Lai lo da" ayo, ri ngoo wigi nang ri hid: su" koid yu" rhe"» ga: myid:. Nyang: gi «Akoid» ga: tid.
31Hau: thang: Aseing gi Balam ri sham: ci: da" moug: lagyoo: yab jo, ziri myang nhang: da:. Houg: lho: Balam gi myidjang khyoo: goeb pid da:. 32Moug lagyoo: gi «Nang ciwim yoomo hid yhang: ti" re" loo zei: ri soem" dam baid lha". Nang he: gyung: ri asoo" eung: yoomo re" gyung: khyoo: ri toem' wa shid re" re" lo zi nghoid. 33Nghoid loug we' re" loo zei: gi ngoo ri myang lho: khyoo: thung soem" lheing: vang bye:. Hougsu" aphang: thu nghoid rigi ngoo nang ri said pyam wigi loo zei: ri teing too" wa zi za: nghoid bye:» ga: yooboo zhug dang: tid da:.
34Balam gi «Ngoo yooboo shoid bye:. Ngoo ri lhoem: toem' pyam wa shid re" khyoogung moo: nang yab jo, ziri ngoo asi'. Nghoid loug we' akhid" ngoo yhe: lo" khyoo: ajoo ein: nang myid jho: nghoid rigi ngoo yhoem: khyoo: doem tau" loo" wa» ga: tid.
35Nghoid loug we' moug: lagyoo: gi «He: byu yi yo' dage" cang yhe: we' nghoid loug ngoo nang ri tid nhang: gu: za: da tid we'» ga: tid. Houg: yoomo Balam gi nyangnu" yo' dage" yhe: loo" bye:.
Balam ri Balag Lhoem: Tau' yu Khyoo:
36Balag gi Balam re" ga: ziri shoug" gyoo: lang" Moba mougkyoo" mo Arnon gyid gyung: yam moo de: to" da" Ara voomoo" moo: nyang: ri yhe: shoug" wa shid re" yhe: loo" bye:. 37Balag gi nyang: ri «Xang: shi" lheing: re" khe: uri ciwim acang lha". Nang ri jhungshug myoo: sho' abyid: abe ein: nang myid jho: rhe"» ga: myid:. 38Balam gi «Ngoo ri" bye: anghoid rhe" nghoid loug we' akhid" nga" jang" moo: ce: yoem: so' bo lha". Ngoo gi Mangsoo tid we' ga: ziri kyeing" dayo" tid» ga: tid. 39Houg: yoomo Balam gi Balag yo' Huzod voogung khyoo: yhe: wigi 40hau: voogung moo nu: yo' yang joem ri said wigi Balam ri dayham"- nyang: yo' ju" re" da" vhujhung: yiri dayham" byid: da:.
Balam da" Xang: shi" Lapi: Dang:
41Thang: nab kyoo' Balag gi Balam ri Bamod Bala boem khyoo: shu" yhe: da:. Houg: mo Balam gi Israela byumyu" dayham" ri yo" myang kaid bye:.
Lacid Bible © Bible Society of Myanmar, 2009.