GYUNG: SOO" 14
14
Byumyu" yi Myeing" Myo: Khyoo:
1Byumyu" yi nheigloem: thang yoomo damyen goin" nyho: ngau nyid ago". 2Nyangnu" gi Moshe yo' Arun tang: ri myeing" myo: wigi tid boem zigi «Egutu mung" moo shid: nghoid ri je ge da:. Anghoid lang" he: dain" pyoid yoo moo shid: ri je gi shi" da:. 3Aseing gi hau: moug: khyoo: ngoonu" ri ciwim yoomo shu" loo la". Ngoonu" gi meing: zain: pui" moo said pyam zi shau" wigi ngoonu" da" yhoem: seing: myhi' yi yo' zooshang: yigi myheig she: lo" zi shoug" goo" wa. Egutu mung" khyoo: doem tau" lo" ri je agi wa rhe"» ga: tid bye:. 4Houg: yoomo nyangnu" dayug yo' dayug «Vhujhung: dayug sho: wigi Egutu mung" khyoo: doem tau" loo" goo" shang» ga: tid boem ago".
5Hau: thang: Moshe yo' Arun tang: gi byumyu" yi dangain" bang: da" shidkhoin" moo myidgung khyoo: goeb pid ago". 6Jooyu" bang: mo eig yug nghoid da" Nun da" nya: yuggi zoo: Yoshu yo' Yephune nya: yuggi zoo: Khaleb gi nheig koug ziyo' nya: tang: byimi ri lang ceig pyam lho: 7byumyu" yiri «Ngoonu" joo" yhe: yu" da" mougmyid gi gye" ge da" mougmyid nghoid. 8Aseing gi ngoonu" ri vho ngei nghoid rigi ngoonu" ri houg: khyoo: shu" yhe: ri" wa nghoid lho: hau: mougmyid nu" ziyo' myid xu: bo da" mung" ri ngoonu" ri byid: wa zi nghoid. 9Aseing ri athougtheung goo". Houg moo nyid da" byumyu" yiri we' agyug ca". Nyhang" gi nyangnu" ri lei lei za: yo" oung: pyam wa nghoid. Aseing gi ngoonu" yo' dage" nghoid wigi nyangnu" ri goem loem byid: da" yu phara" joem ri oung: pyam abye:. Houg: yoomo agyug goo"» ga: tid. 10Shava byu yi dangain" bang: gi nya: eig yug ri lug boem yo' du" said pyam wa ga: kyug nyid boem nghoid loug we' shava byu yigi nyeigdain tung" Zoem" tho' moo: Aseing da" phung" yoeb bidbang bang thu re" ziri myang kaid.
Moshe gi Byumyu" yi Shid re" Akyu" mho' Byid: Khyoo:
11 Aseing gi Moshe ri «He byumyu" yigi ngoo ri khamyhang ju" sho' ngeug pyam nyid shi" wa la". He: byumyu" yigi nyangnu" akhoug: moo: mau" pho" moo" gye" myoo: sho' ngoo koid shug sho' nghoid loug we' nyangnu" gi khamyhang ju" sho' ngoo ri aloem khoug: loo: nyid boem goo" wa la". 12Ngoo gi nyangnu" jang" khyoo: lang: yoem" nhang: kaid lho: said toem" pyam wa. Nghoid loug we' nang rigi nyangnu" tho' je gyi: ziyo' yoem: je bo da" byumyu" damyu" da" nya: phoo bui" nhang: wa» ga: tid.
13Nghoid loug we' Moshe gi Aseing ri «Nang gi he: byumyu" yiri re" yoem: so' khyo" Egutu mung" mo shu" thu loo bye:. Re" byumyu" yi atho' moo: nang koid da" khyoo: ri Egutu byu yi shoug" gyoo: lang" 14nyangnu" gi hau: khyoo: ri he: mung" moo nyid da" byumyu" yiri tid kyoo" goo" wa zi nghoid. Nang Aseing gi ngoonu" yo' dage" nyid lho: re" jhoemmoug" thei" gi ngoonu" atho' moo neing" jo lang" yo" myang jang moo nyang: di: di: za: nang nyid shug da" khyoo: we' nyid" ri nang gi ngoonu" shid vhu" khyoo: jhoemmoug" zeing bung: moo: yhe: lo" wigi myen" ri nghoid lang gi myi: zeing bung moo yhe: lo" da: ga: ziri hau: byumyu" yi shau" gyo: loo" gu nghoid bye:. 15Akhid" nang re" byumyu" yi dangain" ri said pyam nghoid rigi re" lafu" myeing gyi: da" thui: ri shau" gyo: da" byumyu" yigi 16nyangnu" ri byid: wa ga: nang dangsoo" byid: to" da" mung" khyoo: nyangnu" ri nang ayo" shu" yhe: loo: yoomo re" byumyu" yiri dain" pyoid yoo moo: said pyam da:» ga: tid loo goo" wa. 17-18Houg: yoomo akhid" Aseing we" ngoo akyu" mho' nyid. Ngoonu" ri re" yoem: so' ci: shug wigi Ngoo Aseing gi nheig yoo: lei su: anghoid. Gyi: sheung: da" jheddab myid ci: shug lho: dang: zung" wigi yooboo yo' thougtheung gyi koid khyoo: ri yooboo khyoid byid: yug nghoid. Nghoid loug we' nyangnu" myhi' phoo yi da" yooboo yoomo nya: zoo: nya: myid: yiri byu soem" xeig myid: xeig ju" sho' yooboo dam byid: wa shid re" alid pyam yug nghoid ga: nang dangsoo" to" uri tid ziri koid we' ein: ngoo akyu" mho' nyid. 19Houg: lho: Aseing we" akhid" gyi: sheung: lho: geing: teing jheddab myid khyo" wigi Egutu mung" mo nyangnu" thu lo da" ayo, mo nyangnu" yooboo ri khyoid byid: lo ziyo' dakhyoo" ti" he: byumyu" yi da" yooboo ri khyoid byid: wa shid re" ngoo akyu" mho' nyid» ga: tid.
20 Aseing gi «Nang mho' ziyo' dakhyo" nyangnu" ri ngoo yooboo khyoid byid: wa. 21Nghoid loug we' ngoo dei nyid wigi mougmyid gyab goin" moo ngoo nyid ziyo' dakhyoo" ti" 22he: byumyu" yi mo dayug we' hau: mung" khyoo: yo" vang yhi: goo" wa zi anghoid ein: ngoo dangsoo" tid wa. Nyangnu" gi nga" bidbang yo' Egutu yo' dain" pyoid yoo moo: koid shug da" mau" pho" moo" joem ri myang boem bye:. Nghoid loug we' nyangnu" gi nga" nheigloem: sheing: zeing: kham ziri lid: pyam pyam koid wigi ngoo tid dang: ri atam" gyoo: goo" nghoid da:. 23Nyangnu" gi ngo wigi nyangnu" phoug" phyid" yiri dangsoo" byid: to" da" mung" khyoo: khanham we' ayo" vang yhe: goo" wa. Ngoo ri ngeug pyam da" mo, mo dayug we' houg: khyoo: ayo" vang yhi: goo" wa. 24Nghoid loug we' nga" dei zoo: Khaleb gi nya: myid avoid gooyug yo' adu go" ziyo' ngoo ri xo' wigi dang: zung" nyid yoomo nyang: joo" yhe: yu" kho' da" mung khyoo: nyang: ri ngoo shu" vang yhi: wa. Houg: lho: nya: amyed ashen yigi 25Akhid" Amaleg byumyu" yi yo' Khanan byumyu" yi nyid boem da" janggyoin: ri seing: lo" goo" wa. Nab kyoo' doem tau" wigi Thoem" Ni khyoo: yhe: lo" da" dain" pyoid yoo khyoo: yhe: loo" ge'» ga: tid da:.
Myeing" Myo: Yoomo Byumyu" Yiri Aseing Yooboo Dam byid: Khyoo:
26 Aseing gi Moshe yo' Arun ri 27«He: akhyeing" da" byumyu" yigi khamyhang ju" sho' ngoo ri thougtheung lho: myeing" myo: nyid shi" goo" wa la". He: myeing" myo: thui: ri gyo: ngheing" kyi' bye:. 28Akhid" nyangnu" ri he: dang: tid kyoo" we'. Ngoo dei nyid ziyo' dayhang: ti" ngoo gi nanu" mho' bye: ziyo' dakhyo" nanu" ri koid wa ein: jham tang: too" bye:. Ngoo Aseing tid too" bye:. 29Nanu" shid: loo" goo" wa wigi nanu" manggung joem gi he: dain" pyoid yoo moo: she: sain" too" goo" wa. Nanu" ngoo ri thougtheung myeing" myo: boem yoomo nanu" mo eigxi: zain jain" da" mo, dayug we' hau: mung" khyoo: ayo" vang yhi: goo" wa. 30Ngoo nanu" ri hougmoo: yhe: nyid wa dangsoo" byid: too" bye:. Nghoid loug we' Khaleb yo' Yoshu mo lid wigi nanu" hang" we' ayo" yhi: wa zi nghoid. 31Nanu" nya: zoo: yi myheig yu zi shoug" wa ga: nanu" tid ago". Nghoid loug we' nanu" ngeug pyam da mung" khyoo: nyangnu" ri ngoo shu" yhi: wa. Houg: lho: hau: mung" gi nyangnu" da" yhoem: nghoid loo wa. 32Nanu" gi he: dain" pyoid yoo moo shid: loo" goo" wa zi nghoid. 33Nanu" da" zooshang: yigi nanu" mo lo" thang yug shid: sho' nanu" loem khau: myid ageing: teing yoomo yau: khi" kham zo: wigi dain" pyoid yoo moo: myid: xi: zain so" lam" yen" goo" wa. 34Nanu" gi nanu" da" yooboo aphoug" shid re" hau: mung" ri nanu" joo" yhe: yu" uri myang" pyam da" myid: xi: nyid" ri danyid" ri dazain khyo" myid: xi: zain yau: khi" shoug" kham zoo: goo" wa. Ngoo gi nanu" ri thougtheung bye: ein: da" dang: kang: ri nanu" si' goo" wa zi nghoid. 35Dage" zeing: foem: nyid wigi ngoo ri thougtheung bang: nghoid da" he: akhyeing" ashoeb da" byumyu" yi nanu" ri ngoo hid: su" koid wa ein: jham tang:. Nanu" yugkhang" moo" gi he: dain" pyoid yoo moo: shid: loo" goo" wa zi nghoid. Ngoo Aseing tid bye: ein: tid we'» ga: tid.
36-37Hau: mung" ri joo" yhe: yu" wa shid re" Moshe wigi nhang: kaid da" bang: gi byumyu" yi Aseing ri thougtheung myeing" myo: wa zi bui" nhang: da" ajoo aeung: da" lu dang: ri ci: lo boem ago". Houg: lho: Aseing gi nyangnu" ri noo bui" nhang: wigi nyangnu" shid: lo" boem bye:. 38Jooyu" bang: daxe: eig yug mo Yoshu yo' Khaleb eig yug kyeing" ashid: loo: danyid deing ago".
Hau: Moug: Khyoo: Jhen" Vang Yhi: Wa Xang: shi" Lheing: Soin' Khyoo:
(Tid 1:41-46)
39 Aseing tid da" dang: ri Moshe wigi Israela byumyu" yiri tid kyoo" lang" nyangnu" gi nheig khoo" sho' koug ngau boem ago". 40Boem moug: khyoo: jhen" vang yhi: wa shid re" nyangnu" thang: nabkyoo no' mo to' yhe: lo" wigi tid boem zigi «Aseing ngoonu" ri tid kyo" to" da" joyoo khyoo: yhi: wa shid re" akhid" ngoonu" jen" jen" nghoid bye:. Ngoonu" da" shoid yooboo ngoonu" kham: yu bye:» ga: tid.
41Nghoid loug we Moshe gi «Houg: ri akhid" nanu" ciwim yoomo Aseing da" tid dang: atam" gyoo: go" la". Nanu" oung: wa zi anghoid. 42Ayhi: goo" Aseing gi nanu" yo' dage" anyid wigi nanu" da" gyivoo yi wigi nanu" ri oung: pyam wa zi nghoid. 43Nanu" Amaleg byumyu" yi yo' Khanan byumyu" yi yo' shoug" goo" lang" meing: zain: jang: moo nanu" shid: lo" boem goo" wa. Aseing gi nanu" yo' dage" anghoid wa. Ciwim gari: nanu" gi nya: thang: cang wa jang" mo ngeug pyam ago"» ga: tid. 44Nghoid loug Aseing da" Dang: Theing Kuid: yo' Moshe hau: dab mo atoo' shi" ri nyangnu" boem khyoo: do, yhe: loo" wa zi voem" boem shi" ago". 45Hau: thang: Hougmoo: nyid boem da" Amaleg byumyu" yi yo' Khanan byumyu" yigi gyi lhoem: zain: wigi oung: pyam lho: Horma ju" sho' nyangnu" ri cang khaid boem ago".
Lacid Bible © Bible Society of Myanmar, 2009.