TARHA" AGYI 4
4
Debora yo' Barag
1Ehud shid: thang: ri Israela byumyu" yigi Aseing ri thougtheung yooboo doem shoid ago". 2Houg: yoomo Aseing gi nyangnu" ri Hozora voomoo" moo vhoeb da" Khanan khokham Yabin wigi oung: pyam ziri shoug" nhang: da:. Nya: gyizoug: phoo gi Sisera nghoid. Nyang: gi tungbau: byu yi da" voogung Haroshed moo nyid da:. 3Yabin gi joto' gyi myang: rheing" gau: shoo: yo" da:. Nyang: gi Israela byumyu" yiri zain loem: eig xi: nyang: gye" thain: da" khyo" athoug" akhyoug: vhoeb da:. Hau: thang: Israela byumyu" yigi Aseing ri pang" thoug yu wa shid re" yoid mho' ago".
4Hau: ayo, moo: Lapi: Dod da" nya: yhoem: seing: myhi' Debora gi lapi: myhi' nghoid da:. Nyang: gi hau: ayo, moo Israela byumyu" yi shid re" tarha" agyi dayug khyo" dei byid: da:. 5Nyang: gi Ephrim boem moug: mo Rama yo' Bethela agyoo: moo: yug jo, da" thab gam dagam ayang: moo dang: phyed wa shid re" zhung: jo, da:. Israela byumyu" gi nyang: myid phyed ziri yu wa shid re" hau: joyoo khyoo: yhe: ago". 6Danyid" ri nyang: gi Napthali moug: Kedesha voomoo" mo Abinoam da" nya: yuggi zoo: Barod jhang byu nhang: kaid wigi nyang: ri «Israela byumyu" yi da" Aseing Mangsoo gi he: amyeing" dang: ri byid: abye:. ‹Nabthali yo' Zebulun byumyu" kung: mo byu damoin shu" yu wigi nyangnu" ri Tabora boem khyoo: shu" yhi: we'. 7Ngoo gi Yabin da" gyizoug: phoo Sisera ri Kishan gyid lang moo nang ri gyi zain: wa shid re" shu" loo wa. Nyang: gi nya: gyi myang: rheing" joem yo' gyizoo: yi boo nghoid loug we' ngoo gi nang ri nya: adang moo oung: pyam nhang: wa› ga: tid nhang: kaid da» ga: tid.
8Hau: thang: Barag gi «Nang ngoo yo' dage" yhi: wa nghoid rigi ngoo yhi: wa. Nghoid loug we' nang ngoo yo' dage" ayhi: nghoid rigi ngoo we' ayhi: wa» ga: phug tid da:.
9Nyang: gi «Gi bye:- ngoo nang yo' dage" yhi: wa nghoid loug we' nang gi hau: oung: doid jang" moo nang ce: ngi: yoo" wa anghoid. Ciwim gari Aseing gi Sisera ri myiyi: dayug lo, khyoo: ab byid: pyam ri" wa» ga: tid da:. Houg: yoomo Debora gi Barag yo' dage" Kedesha khyoo: to' yhe: lo" da:. 10Barag gi Nabthali yo' Zebulun byumyu" kung: yiri khe: wigi byu damoin nya: thang: khyoo: cang yhe: ago". Debora gi nyang: yo' dage" yhe: lo" da:.
11Hau: ayo, moo Keni byu Hebera gi nya: Zoem" ri Kedesha yo' tab tab Zananim mo Shookhi" gam nam moo koid to" da:. Nyang: gi Moshe da" nya: khau: Hoba da" amyed ashen yi nghoid boem da" Keni byu gootu: yi yo' gang: lo" da:.
12Tabora boem khyoo: Barag yhe: loo" bye: ziri Sisera si' lang" 13Nya: da" gyi myang: rheing" gau: shoo: yo' nya: byu dangain" ri khe: yu lho: tungbau: yi da" voogung Haroshed mo zi Kedesha gyid lang khyoo: nhang: kaid da:.
14Hau: thang: Debora gi Barag ri «Yhi: we' Aseing gi nang ri vhu" shi: byid: wa. Akhid" nyid" nyang: gi nang ri Sisera adang moo oung: doid nhang: abye:» ga: tid. Houg: yoomo Barag gi nya: byu damoin yo' dage" Tabora boem mo gyoo" lo" ago". 15Barag gi nya: gyizoo: yi yo' gyi khaid boem lang" Aseing gi Sisera ri nya: gyi myang: rheing" joem dangain" yo' nya: byu yi dangain" ri anhung akhoid bue" loo" nhang: da:. Sisera gi nya: gyi myang: rheing" mo gyo" lho: khyid: khyo" tang" phang: lo" da:. 16Barag gi gyi myang: rheing" joem yo' gyizoo: yiri tungbau: yi da" voogung Haroshed khyoo: cang khaid wigi Sisera da" gyidab goin" said pyam zi shoug" ago". Dayug we' adeing nghoid da:.
17Sisera gi Keni byu Hebera da" yhoem: seing: myhi' Yaela da" zoem" khyoo: tang" phang: vang lo" da:. Ciwim gari Hazora khokham Yabin yo' Hebera da" yhoem: byu yigi myid veing" yug yo nyid boem yoomo nghoid da:. 18Yaela gi Sisera ri tau' yu wa shid re" thu yhe: lho: nyang: ri «Zoug: phoo we"- vang loo we' nga" zoem" khoug: khyoo: vang loo we' agyug ca"» ga: tid. Houg: lang" nyang: gi vang yhe: wigi nyang: gi yabkyo' pain" ruang: nungthang moo nyang: ri gau" nyid nhang: da:. 19Nyang: gi Yaela ri «Jeju" mo gyid byid: jhug la- ngoo gyid shid» ga: mho' da:. Nyang: gi nu noug" shooyid thung: phang lho: nyang: ri byid: jhug da:. Houg: lho: nyang: ri doem gau" nhang: to" da:. 20Hau: thang: Sisera gi nyang: ri «Zoem" khoem" duang: moo yab jo, we' dayug yug re" lho: hid: moo dayug yug nyid la' ga: nang ri re" myid: ri hang" anyid ein: tid we» ga: tid da:.
21Sisera gi sung myung: wigi yhoeb moo" myid" sho' yhoeb lo" da:. Hau: thang: Yaela gi du yo' zoem" dung" zeing ri koid: yu lho: nya: jhang sam: zoo: yhe: wigi zoem" dung" zeing yo' nya: vhuloem lo, yo shoid mo zi dashoid khyoo: myidgung khyoo: kyang sho' baid zhug kaid lho: said pyam da:. 22Barag gi Sisera ri sho: ju" loo lang" Yaela gi nyang: ri yhe: tau yu wa thu yhe: wigi nyang: ri «Hid khyoo: ri" we' nang cang sho: nyid da" su: ri ngoo nang ri toin" shed ba» ga: tid da:. Houg: yoomo nyang: gi Yaela yo' dage" vang yhe: da:. Houg moo Sisera gi nya: vhuloem moo zoem" dung" zeing baid kyang too" gu myidgung moo shid: leung jo, da:.
23Hau: bidnyid moo Mangsoo gi Israela byumyu" yiri Khanan khokham Yabin adang moo oung: doid nhang: bye:. 24Israela byumyu" yigi Yabin ri said pyam da" bidnyid ju" sho' je je xo: khyo" doin zeig wigi nyang: ri gyi koid ago".
Currently Selected:
TARHA" AGYI 4: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.