TARHA" AGYI 2
2
Bokhim Joyoo Mo Aseing Da" Moug: Lagyoo:
1 Aseing da" moug: lagyoo: gi Gilgala mo zi Bokhim khyoo: yhe: wigi Israela byu yiri «Ngoo gi nanu" ri Egutu mung" mo shu" thu lo wigi nanu" phoug" phyid" yiri dangsoo" byid: to" da" mung" khyoo: nanu" ri shu" loo bye:. Ngoo gi Nanu" yo' to" to" da" dang: theing ri khanham we' aphyo' pyam wa. 2He: mung" moo nyid boem da" bang: yo' dang: theing daja: we' nanu" age too" nghoid ago". Nanu" gi nyangnu" da" phoin: joem ri phyo' khyo' pyam ca" ago" da» ga: tid. Nghoid loug we' nanu" gi ngoo tid to" ziri akoid goo" nghoid da:. Nanu" gi atau" khyo" koid abye: go". 3Houg: yoomo akhid" ngoo gi nanu" shid vhu" khyoo: yhe: lo" ri he: byumyu" yiri akhid thu pyam wa zi nghoid da" khyoo: nanu" ri tid kyo". Nyangnu" gi nanu" da" gyivoo yi bue" loo wa. Nanu" gi nyangnu" da" yu phara" joem ri noku da" moo" zoo" wigi lhid' moo myi" ri" goo" wa» ga: tid. 4Moug: lagyoo: he: dang: ri bain tid lang" Israela byu yi dangain" kyi: ngau ago". 5He: gang mo hau: joyoo ri Bokhim ga: myheing ago" zi nghoid. Nyangnu" gi hau: joyoo moo Aseing ri xoin" to' byid: ago".
Yoshu Shid: da" Khyoo:
6Yoshu gi Israela byumyu" yiri nyangnu" nya: khyoo: khyoo: nhang: kaid wigi yugkhang" moo" gi hau: nya: gamboem mougmyid ri yhe: seing: yu ago". 7Yoshu dei nyid gu: moo Israela byumyu" yigi Aseing ri dei byid: nyid ago". Nyang: shid: byug thang: rilang" Israela byu yi shid re" Aseing koid da" gyi: sheung: da" moo" zoo" dangain" ri nyangnu" nya: myo, yo' shau" myang boem da" vhujhung: yi dadei nyid nyid gi nyangnu" hougsu" xo' lho: dei byid: nyid ago". 8Nun da" yuggi zoo:- Aseing dei zoo: Yoshu gi apyaid dasho: daxi: zain ri shid: lo" da:. 9Gasha mougzhung: Ephrim boem moug: mo nya: gamboem mougmyid Timnad Sera joyoo moo nyang: ri myhoeb to" da:. 10Yoshu pyaid mo byu daxeig goin' zi shid: lo" lho: thang: xeig mo byu yigi Aseing yo' Israela byumyu" yi shid re" Aseing koid da" moo" ri to" myhed pyam ago".
Israela Byumyu" yi Aseing ri Noku Nyid Ziri Theing: Byug Khyoo:
11Israela byumyu" yigi Aseing ri yooboo shoid thougtheung wigi Bala ri dei byid: boem ago". 12Nyangnu" gi nyangnu" phoug" phyid" yi da" Mangsoo- Egutu mung" mo nyangnu" ri shu" thu lo da" Mangsoo nghoid da" Aseing ri noku khyoo: theing: byug ago". Houg: lho: nyangnu" gi nyangnu" lheing: khoem moo nyid da" byu yi yu phara" joem nghoid da" gootu: yu phara" joem ri no' lo ago". Nyangnu" houg joem ri goeb pid byid: lho: Aseing ri nheig yoo: nhang: ago". 13Nyangnu" gi Aseing ri noku ziri theing: pyam wigi Bala yu phara" joem yo' Astarte ri dei byid: ago". 14Houg: yoomo Aseing gi Israela byumyu" yiri nheig joem: yo: lho: gyivoo yiri khaid zain: nhang: wigi nyangnu" ri lhoid zoo: nhang: ago". Nyang: gi houg bang: lheing khoem mo gyivoo yiri nyangnu" ri oung: nhang: wigi Israela byumyu" yigi nyangnu" nya: gung ri ayo" goem loem loo: nghoid ago". 15Nyangnu" gyi khaid pui" yhi: khang" moo" nyang: khasu" koid wa tid ziyo' dakhyo" Aseing gi nyangnu" ri thougtheung da:. Nyangnu" gye" myid myo: nyid boem ago".
16Hau: thang: Aseing gi nyangnu" ri phyo' zoo: bang: da" lo, mo khyoid yu wa shid re" Israela byumyu" vhujhung: yiri byid: da:. 17Nghoid loug we' Israela byumyu" yigi nyangnu" da" vhujhung: yi dang: ri atam" gyoo: goo" nghoid da:. Israela byumyu" yigi Aseing ri jhug azug loo: za: yu phara" gootu: ri no' boem ago". Nyangnu" phoug" phyid" yi Aseing da" dang: ri tam" gyo: ago". Nghoid loug we' he: byuxeig aseig bang: gi hougsu" koid wa shid re" toem' pyam bye: ago". 18Aseing gi Israela byumyu" yiri vhujhung: byid: khang" moo" Aseing gi nyang: ri pang" thoug wigi hau: vhujhung: dei nyid da" ayo, cang gyivoo yi lo, mo byumyu" yiri khyoid yu da:. Nyangnu" kyi" khyeug shoug" ziyo' doin: zeig zo: akhoug: moo nyangnu" kyi" khyeug ngau boem yoomo Aseing gi nyangnu" ri nheig khyeug yu da:. 19Nghoid loug we' vhujhung: shid: loo" lang" byumyu" yigi khyoo: xau" khyoo: doem tau" lo" wigi lid loo bye: da" byuxeig tho' je xo: lo, moo" ri koid ago". Nyangnu" gi yu phara" joem gootu: ri dei byid: lho: no' ago". Houg: lho: nyangnu" nya: akhyeing" da" khyoo: ri nheigloem: thain: lho: xo' yhe: lo" ago". 20Hau: thang: Aseing gi Israela byumyu" yiri nheig joem: yo: wigi «He: byumyu" yigi nyangnu" phoug" phyid" yiri cang pyeing wa ngoo amyeing" byid: to" da" dang: theing ri phyo' pyam abye: go". Nyangnu" nga" dang: ri atam" gyoo: yoomo nghoid. 21Yoshu shid: da" uri he: mung" moo nyid boem shi" go" da" ce: byumyu" yiri we' ngoo akhaid thu loo: wa. 22Nyangnu" phoug" phyid" yi koid boem ziyo' dakhyoo" ti" he: Israela byumyu" yi nga" khyoo: moo: cang go" la- acang goo" la- ein: ziri he: byumyu" yiri ci: wigi koid wa zi nghoid» ga: tid. 23Houg: yoomo Aseing gi hau: byumyu" yiri hau: mungdain: moo nyid deing jo, nhang: da:. Nyang: gi Yoshu ri houg: bang: adang moo aoung: pyam nhang: nghoid da:. Yoshu shid: thang: ri we' nyangnu" ri nyang: myab akhaid thu pyam nghoid da:.
Currently Selected:
TARHA" AGYI 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.