ESAIA 40
40
Myid Byu da" Dang: Joem
1Mangsoo gi «Nga" byumyu" ri nheig teing we'
nyangnu ri nheig teing we'.
2Yerusalem byu yiri yoem: byid: we'.
Nyangnu" kyi" khyeug kham zo: zigi gi" bye:.
nyangnu" yooboo joem ri khyoid pyam byid: we'.
Ngoo gi nyangnu" da" yooboo dangain" shid re"
yooboo dam byeung" sho' nyangnu" ri byid: bye:» ga: tid da:. 3Thui: dathui: gi
«Aseing shid re" dain" pyoid yoo moo khyoo: nyheing byid: ge'.
Ngoonu" Mangso shid re" dain" pyoid yoo moo khyoo: sho' byid: ge'.
4Lang: khung" khang" moo" boem" ge'.
boem khang" moo" ri tam ge'.
Bouggung joem gi jang: dam bue" loo" wa.
Abu" akhyoid bue" da" mougmyid gi dam lo" byug wa.
5Hau: thang: Aseing da" phung" yoeb ri toin" shid wa wigi
xangsu: byu dangain" hau ziri shau" myang loo wa.
He: ziri Aseing nyang: nyang: dangsoo" byid: to" abye:» ga: nyho: nyid da:.
6Thui: dathui gi «Mungdang: ri tid fu" ge'» ga: nyho: da:.
Ngoo gi «Ce: ja: mungdang: ri tid fu" wa la"» ein: myid.
«Xangsu: byu dangain" gi myo, gam yo' du khyoo: ri tid fu" we'.
Nyangnu" gi siyoo bain joem tho' myang" sho' ayo" myang" jo,.
7Hau: joem adang moo Aseing wigi lid hau nhang: kaid lang"
myo, gam gi yhau" lo" byug wigi bain: joem gi shoem: lo" byug ago".
Byu yigi myo, gam tho' ayo" kham goo" nghoid da:.
8Nghoid bye:. Myo, gam gi yhau" lo lho: bain joem gi shoem lo" byug da:.
Nghoid loug we' ngoonu" da" Mangso dang: gi apyaid atoo: moo geing teing nyid, da» ga: tid da:.
9Yerusalem we"- myhang: da" boem tho' khyoo: do, lo" lho:
lu dang: gi ri tid fu" we'.
Ziun we"- thui: zeing yo' nyho: wigi
Lu dang: gi ri tid fu" we'.
Tid thu' we' agyug noo".
Nyangnu" Mangsoo ju" re" nyid da" khyoo: ri
Yuda voogung joem ri tid kyoo" we'.
10Gyi: sheung: da" Aseing gi yoem: so' yo' vhoeb wa ju" re" wigi
nyang: wigi khyoid yu to" da" byu yiri nyang: yo' dage" shu" re" nyid da:.
11Nyang: gi yang zoem: su: yhang: ti" nya: yang kyung ri goin coung: byid: wa.
nyang: gi yang nu" joem ri zheing" yu lho: nya: lo, moo hau: joem ri vu, ci: wa.
Nyang: gi houg bang: nya: myhi' joem ri nu" nham za: shu" loo wa.
Israela da" Ayo" Tho' Ke' Mangsoo
12Nammugdara ri lo, zhoeb wigi hang" yo" leug la".
Nya: lo, wigi mougkhung: ri yo" ke' la".
Myid gung mo myidzhoo" ri koem: moo hang" yo" kaid ci: la".
Boem yo' bouggung joem ri jang mo hang" yo" leug la".
13Cikoid wa ziri Aseing ri hang" yo" tid la".
Nyang: ri hang" yo" jhau"- nyang: ri phajhi" hang" yo" byid: la".
14Si' wa yo' se' gyoo: wa shid re" yo'
moo" joem ri khasu" koid oung: wa khyoo: ri jhau" yu wa shid re"
Mangsoo gi hang" yo' sham: go" la".
15 Aseing shid re" byumyu" yigi ci: anghoid.
gyid dazo, tho' gootu: aje jain".
gye" gyi: da" gugyoo: kang joem gi pheilhoug: yhang: ti" soem" da:.
16Lebanon seig moo" yoo moo nyid boem da" gougnyhoug dangain" gi
ngoonu" da" Mangsoo ri xoin" ngei" byid: wa atham: nghoid da:.
hau: seiggam joem gi myi: moid tab wa sung neing: ago".
17Byumyu" joem gi nya: shid re" ci: anghoid nghoid da:.
18Mangsoo ri hang" yo' yo" tu' wa la".
nyang: khate" su: nghoid ziri nang khasu" yo" toin" shid wa la".
19Nyang: gi lo, moo" zei: bang: koid to" da" yu phara" to' lo, moo" zei: bang: wigi sheing: tab to" lho: ngei wigi tang koid tab to" da" yu phara" lhoo: yo' adu nghoid da:.
20Sheing: yo' ngei ayo" bue" da" su: gi
aphoem" loo" wa da" seig ri khyen: da:.
Nyang: gi aleing loo" wa da" gung du soolhoo: ri koid wa shid re"
se' jhang: da" lo, moo" zei: su: ri sho: da:.
21Nang asi' rhe"
goonham' nang ri atid boem rhe"
Mougmyid khasu" shid" lo da" khyoo: ri nang agyo: yu" rhe".
22Hau: zigi myidgung atho' mougkhung atho' moo
nya: zhungtang moo zhung: jo, su: phain" so: to" zi nghoid da:.
Vhoo: mo byu yigi layed yhi' nge ago".
Nyang: gi mougkhung: ri yabkyo' pain" ruang: yhang: ti" pyo: kaid wigi
nyid wa zoem" yhang: ti" koid kaid da:.
23Nyang: gi yoem: so' gyi: da" zoug: yiri khyo' pyam lho: nyangnu" ri ci: anghoid loo sho' koid pyam da:.
24Nyangnu" gi agyi: ayo" cen' shi" da" agam zoo: ri phoin pyam yhang: ti" bui" wa.
Aseing wigi lid ri nhang: kaid lang"
nyangnu" kyug lo" byug wigi khoofoo: yo' dakhyo" hau' tang" lo" byug da:.
25Gyeung" shang: da" Mangsoo ri hang" yo' yo" tu' wa la"
nyang: yo' du zi gootu: hang" nyid la"
26Mougkhung: khyoo: yu" kaid we'
Nang shau" myang da" kyi: joem ri hang" wigi phain" so: to" la".
Hau: joem ri gyidab daloem: yhang: ti" shu" thu ri" su: gi
Khanhoo' nghoid ziri nyang: se' da:.
Cab khang" moo" ri myeing yo' khe: da:.
Nya: yoem so' gi gye" nyang: gyi: sheung: da:.
khanham lang" hau: kyi: joem mo dacab we' abyug yu".
27Israela we"- re" yau: khi" ri Aseing asi byid: ein: anghoid lang"
nang adeingmain" khyo" kyi" khyeug kham zo: ziri ci: ajhoo: nghoid da: ein:
ciwim nanu" myeing" myoo: wa la".
28Nanu" asi rhe". Nanu" agyo: yu" shi" rhe"
Aseing gi apyaid atoo: mo Mangsoo nghoid.
Nyang: gi mougmyid dangain" ri phain" so: to" da:.
Nyang: gi khanham we' amyung: adoug nghoid da:.
Nyang: myid da" khyoo: joem ri hang" we' asi' nghoid da:.
29Nyang: gi yoem: neing: bang: yo' myung: doug bang: ri yoem: boo nhang: da:.
30Zooyam yi lang" yoem: neing: lo" da:.
zooyam yigi myung: doug byug ago".
31Nghoid loug we' pang" thoug wa shid re" Aseing ri loem khau: nyid bang: gi
nyangnu" yoem: aseig yo" yu loo wa.
Nyangnu" gi zoin bung: yhang: ti" dung yo' dang: do, loo" goo" wa.
Nyangnu" tang" wigi amyung: doug goo" wa.
Nyangnu" khyoo: so" wigi yoem: anheing: goo" wa.
Lacid Bible © Bible Society of Myanmar, 2009.