ESAIA 35
35
Gyeung" shang: da" Khyoomoo"
1Dain pyoid yoo gi ngei pyoo: loo wa.
Houg: lho: mougmyid gang: moo: bain joem bo" lo wa.
2Dain" pyoid yoo gi ngei pyo yoomo jikhoin" khoin" wigi yoid nyho: loo wa.
Hau: zigi Lebanon boem joem su" yung" loo wa.
Khamela yo' Sheron da" yoothung" joem su" myidxu: bo loo wa.
Yugkhang" moo" gi Aseing da" myonhoo: yoeb bang ri myang wa.
nya: da" gyi: sheing: khyoo: yo' yoem so' ri myang wa.
3Myung: dau nyid da" lo, joem yo'
yoem: neing: wigi ko' ko' nain" da" poid lug ri yoem: boo nhang: wa.
4Voem" da" myid abo da" bang: yugkhang" moo" ri «Yoem: kaid ge'. Agyug goo".
Mangsoo gi nang ri khyoid yu wa ju" re" nyid wigi
re" gyivoo yiri yooboo dam byid: wa ju" re" nyid da» ein: tid we'.
5Myo, jed su: myo, myang loo wa.
Nujed su: nukhyab shau" gyo: loo wa.
6Khyid gyoug: su: thau" byam wigi go" loo goo" wa.
nhoid jed bang: gi ngei pyo: wigi nyho: loo wa.
Gyidzoo: gyung: gi dain" pyoid yoo khyo" yau lid loo wa.
7Nge" nyid da" midcoo: boem" gi gyidthoem" bue" loo wa.
Moug: kyug myidkyug mo gyid byeing" jo, wa.
Khuidkoo" joem lhung nyid da" joyoo moo
thoem" nhoid: myo, yo' gyid pheing" gam joem yug loo wa.
8Hougmo «Gyeung" shang: da" khyoo:»
ga: myheing da" fu" moo" khyoo: dakhaid jo, wa.
Hau: khyoomoo" moo yooboo yoo" bang: dayug we' khanham we' gyung: yo" soo" wa zi anghoid.
Hang" koo" su: we' hau khyoomoo" ri cang da" bang: ri khyoo: vhang: ashu" vhang: wa.
9Houg: moo Khangkhyi joem dadu: we' anyid wa.
Hau: khyoo: khyo" gougnyhoug lam" dadu: we aso" lid: wa.
Aseing wigi khyoid yu shoug" bang: gi
hau: khyoo: khyo" yhoem: khyoo: phang: loo goo" wa.
10Nyangnu" gi Yerusalem khyoo: ngei pyo: ziyo'
jikhoin" khoin" lho: gau yi wigi nyho: lho: ju" loo wa.
Nyangnu" gi apyaid atoo: moo ngei pyo: yug yoo loo goo" wa.
Nheig koug ziyo' koug ngau zi apyaid atoo: moo ajo, loo wa.
Lacid Bible © Bible Society of Myanmar, 2009.