HOSEA 14
14
Israela Byumyu" Yi ri Hosea Mho' Yoid Da" Khyoo:
1Israela byumyu" yi we" nanu" Aseing Mangso jhang khyoo: doem tau" loo ge'. Nanu" yooboo gi nanu" ri khyid: vhu" thung" wigi lheing nhang: bye:. 2Aseing jhang doem tau" lo lho: he: akyu" mho' dang: gi nyang: ri shugbyid: da" re" xoin" nghoid baja". Ngoonu" yooboo joem dangain" ri khyoid pyam byid: lho: ngoonu" da" akyu" mho' dang: ri khab yu byid: la. Houg: lho: ngoonu" dangsoo" to" ziyo' dakhyoo" ti" nang ri coung" byid: wa. 3Asuri gi ngoonu" ri khasu" we' ayo" khyoid yu. Gyi khaid myang: joem gi ngoonu" ri ayo" goem loem byid:. Ngoonu" da" soolhoo: joem ri ngoonu" da" Mangsoo nghoid ein: khanham we' adoem tid loo wa. O" Aseing we"- Nang gi hang" jhang adoem se' tau" loo bang: ri nheig khyeug myid ci: shug byid: da:.
Aseing gi Israela ri Kangso' Aseig Byid: wa Dangsoo" To" da" Khyoo:
4 Aseing gi
«Nga" byumyu" yiri nga" jhang khyoo: doem shu" yu wa.
Ngoo gi nyangnu" ri nga" nheigloem: ung: khoug: dangain" yo' jheddab wa.
Nyangnu" ri ngoo khanham we' nheig ayoo: loo: wa.
5Ngoo gi Israela byumyu" yi shid re" kyug hei' da" mougmyid mo
moug: gyid yo' dakhyo" nghoid loo wa.
Nyangnu" gi bain: joem yo' dakhyoo" ti" bo" yung" loo goo" wa.
Nyangnu" gi Lebanon mo seiggam joem yo' dakhyoo" ti" agyi: teing za: cen' loo goo" wa.
6Nyangnu" gi aseig gyi: sheung: lho: dei nyid wa.
Houg: lho: zhainloin: gam joem yo' dakhyoo" ti" yung" wa.
Nyangnu" gi Lebanon mo shamu gam joem yhang: ti" shoem: nam pyo: loo goo" wa.
7Nyangnu" gi ngo wigi goem loem byid: da" ayoeb khoug: moo dalheing: doem nyid loo goo" wa.
Nyangnu" gi gug zoo mei: loem: sho" wigi zabyid khyam: yo' dakhyo" ashi" zei: loo goo" wa.
Nyangnu" gi Lebanon mo zabyid yhid: yo' dakhyo" myeing gyi: loo goo" wa.
8Israela byumyu" yigi soolhoo: joem yo' ci: asen: loo: goo" wa.
Ngoo gi nyangnu" da" akyu" mho' dang: ri gyoo: byid: wigi
nyangnu" ri goin coung: byid: wa.
Ngoo gi khanham we' ashoem: lo" da" seiggam yo' dakhyoo" ti"
nyangnu" ri bid shoem: yoeb byid: wa.
Ngoo gi nyangnu" da" mainkaid jeju" dangain" da" ajhung: nghoid» ga: tid
Dang: Thang: Said
9Phajhi" juyhi: bo mo, gi hid: moo lhid" to" ziri se' gyo: yu lho: nyangnu" nheigloem: khoug: moo xoem" yu goo" baja". Aseing da" khyoo: joem gi jo da:. Houg: lho: deingmain" bang: gi hau: joem ri cang lho: dei nyid ago". Nghoid loug we' yooboo yoo" bang: koem' gi hau: joem ri cishu: anhang: yoomo khyid: vhu" thung" wigi leung lo" ago".
Currently Selected:
HOSEA 14: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.