HEBRE 8

Aseing Yesu Gi: Ngoonu" Da" Khainjung Agyi Zeing Nghoid.

1Akhid" ngoonu" tid kyo" nyid da" khyoo: joem mo yhau: gyeung: thang da" dang" zeing khoin" gi Houg: yhangte" da" khainjung agyi moo" ngoonu" yo" boem bye. Nyang: gi moug: khung: moug: di tho' mo amyeing" akhang" bo da" zhung: tang lo, yo shoid moo lo" zhoung: jo, bye. 2Nyang: gi moug: khung: moug: di tho' mo gyeungshang: thang da" joyoo moo khainjung agyi zeung da" moo" ri voin, vu, nyid hau: joyoo gi moug: khung: moug: ein: da" byu da" lo, wigi akoid to" da" Mangsoo zoem" gyeing" nyang: nghoid nyid. 3Khain: jung agyi zeing yi yug khang" moo" gi jhung: shug jhung: lang: yo' gougnyhoug xoin" ri ci: lho: Mangsoo ri xoin" ngei" byid: wa shid re" tang: too" mo, nghoid boem ago". Houg: yo' dakhyoo" ti" ngoonu" da" khainjung agyi moo" we' nyang: moo ngei" byid: wa xoin" daja: gi yoo" ca" nyid. 4Nyang: gi mougmyid tho' moo danyid shi" nghoid rigi nyang: gi kha: khyo" we' khainjung agyi bui" wa zi anghoid. Khasu" wim gari Yuda yi da" tarha" yo' dakhyoo" ti"- jhung: shug jhung: lang: ci: lho: xoin" to' byid: mo, nyid nyid gu nghoid boem bye. 5Khain: jung yi khyo" nyangnu" koid da" moozoo" joem gi moug: khung: moug: di mo noku xoin" ngei" byid: da" alhoo: ayoeb, za: nghoid nyid. Moshe zei: lid loo" bye: da" moozoo" joem we' houg: yo' dakhyoo" ti" za: nghoid nyid. Khasu" wim gari Moshe gi hau: dang: theung thang" cab, yo' sen: da" zoem" koid shed" lo" uri Mangsoo gi nyang: ri-boem tho' moo ngoo nang ri toin" shid' da" azuang khoo" shid yo' dakhyoo" te" dangain" da goo" sho' yo" koid wa zi zed" lhid nyid we' ga: tid too" yoomo nghoid. 6Nghoid loug we' akhid" koem gi hau: khainjung yi yo" da" aya: dangain" tho' mo je gyi: da" khainjung moozoo" aya: gi Yesu ri byid: too" bye.Mangsoo yo' byu yi da" agyoo: moo- Yesu nyheing byid: to" da" dang: theung thang" cab, gi je" ge da" dang: theung thang" cab, nghoid bye. Khasu" wim gari hau: dang: theung thang" cab, gi xang: shed" mo dang: theung to" da" thang" cab, tho' moo je" ge da" thang" cab, ayang: qei" to" zi nghoid bye. 7Xang: shed" mo da" dang: soo" khoin" moo aci: ca" loo: nghoid rigi thang: mo eig loem: ein: da" dang: soo" khoin" rigi doem koid too" gi aca" loo. 8Nghoid loug we' Mangsoo gi nya: byumyu" yi ri yooboo foin: zoore" tid zigi (Israela byumyu" yi yo" we' Yuda byumyu" yi yo' we' dang: theing khoin" theing go" too" wa da" bidnyid gi ju" loo bye ga: Aseing: tid nyid. 9He: da" dang: thang" cab, gi Nyang: nu" ri nga" lo, yo' she: yu wigi Egutu meing: mo shu" thu' lo da" uri nya: phoug" nya: pho, yo' too" go" da" dang: soo" khoin" yo' du, goo" loo: wa zi anghoid. Nyang: nu" gi ngoo nyangnu" yo' too" go" da" dang: soo" ri lhed: pyam' yoomoo- ngoo nyangnu" ri ayu" acoung: loo wa, ga: hau: Aseing: gi tid nyid. 10Akhid" he: da" dang: soo" khoin" gi ju" loo wa da" bidnyid yi thang: moo Israela byumyu" yi yo' ngoo too" too" wa da" dang: soo" thang" cab, nghoid nyid. Nyang: nu" da" nheigloem: e" myed khoug: moo nga" da" tarha" kaid' byid: too" wa zi nghoid. Nyang: nu" da" Mangsoo gi ngoo koid wa nghoid wigi nyangnu" gi nga" da" byumyu" yi bue" lo boem wa nghoid. 11Nyangnu" mo hang" nghoid loug we' nyang: nya: da" moug: seing: byu yi nghoid loug we' nyang: nya: da" seing" tain" byumyu" nyang: cang" nghoid loug we' Mangsoo ri se' lo boem sho' jhau" mhoo, byid: ca" loo: wa zi anghoid. Khasu" wim gari nge thang jang" mo zi gyi: thang jang" moo ju" sho' nyangnu" dangain" mo, gi ngoori se' lo boem bye. 12Nyang: nu" da" yooboo ri ngoo khyoid pyam byid: wigi Nyang: nu" shoid vhang: lo" khyoo: ri ngoo doem, boin: byid: loo: wa zi anghoid.ga: hau: Aseing: tid nyid. 13Hau: dang" soo" thang" cab, khyoo: - Aseing: ri tid ziyo' Mangsoo gi xang: shed" mo da" dang: soo" thang" cab, ri axoug" koid pyam byid: bye- axoug" bue" lho: yoem: zam: lo" da" zi ce" noem nghoid loug we' kha: myhang anghoid ri gi byug wa zi za: nghoid nyid.

Currently Selected:

HEBRE 8: LCL

Highlight

Copy

Compare