HAGI 2
2
Noku Yhoem: Moo" Aseig da" Myo, Nhoo: Yoeb Bang
1Hau: zain moo nyang: lhammoo" nyhed khyab eig xe: danyid" moo- lapi: Hagi khyo" wigi Aseing mungdang: doem tid kaid. 2Yuda mung" zoug: Zerubabela yo' khainjung moo" Yoshu ri we' mung" byu yiri we' tid kyoo" we' ga: lapi: Hagi ri tid zigi 3Nanu" da" akhoug: moo shid phyang" mo Noku Yhoem: Moo" da" myonhoo: yoeb bang ri shau" myid soo" bang: boo shi" la". Hau: ziri akhid" nanu" khasu" yu" go" la". Hau: zigi dangain" ciwe' anghoid loo yhang: ti" jhoo: goo" wa bye:. 4Hougsu" nghoid loug akhid" nanu" kha: yug we' nheigloem: abyo, yoin" goo"- moo" zoo" ri zei: nyid ge'. Ngoo gi nanu" yo' dage" nyid. 5Nanu" gi Egutu mung" mo thu lo da" uri ngoo gi nanu" yo' khanham we' dage" nyid wa ein: dangsoo" too" kho' bye:. Ngoo gi akhid" ju" sho' nanu" yo' dage" danyid nyid yoomo agyug goo".
6Kha: myhang anghoid ri ngoo gi mougkhung: yo' myidjang ri Nammugdara yo' bouggung ri lang: nhoid kaid wa nghoid. 7Byumyu" yi dangain" ri tu: mhug khyo' pyam lho: nyangnu" da" jonu" dangain" gi hid: moo ci: ju" lo boem wigi Noku Yhoem: Moo" moo byeung" shoin: loo" wa zi nghoid nyid. 8Mougmyid moo jo, da" ngei yo' sheing: dangain" gi nga" zi nghoid nyid ga: yoem: moo" bo Aseing tid nyid. 9Noku Yhoem: Moo" aseig gi yhoem: moo" axau" tho' moo yoeb bang je" boo wa zi nghoid. Houg: moo nga" mung" byu yiri ngoo gi yoo" zoo: yoo" shug nhang: ziyo' myenjham" khyoo: byid: wa zi nghoid. Yoem moo" bo da" Aseing gi tid nyid bye:.
Lapi: gi Khainjung yi yo' Sham: Go" yu" Khyoo:
10Dari khokham khoo" zhung: thang: ri eig zain khoug: mo lhammoo" goug: khyab bidnyid eig xe: myid: nyid" moo yoem: moo" bo da" Aseing Mangsoo gi Lapi: Hagi ri doem tid zigi 11«Nang gi khainjung yiri ‹He: tarha" moo" zoo" yo' sen: lho: myid: yu" we'. 12Byu dayug yug gi Mangsoo ri xoin" to' da" jang" mo gyeung" shang: shoo" ri nya: byisheing: thang: mo keug ci: lo ein: shang hau: yug gi zoo: yho' zoo: noem zabyid yhid: zhainloin: xu: ce" ja" zoo: noem nghoid loug we' hau: byi thang: moo zang" ri hau: zoo: shug gi gyeung" shang: la"› ga: myid nhang:.
Hougsu" myid ziri khainjung yigi «gyeung" shang: zi anghoid» ga: phoug tu" boem.
13Hau: lho: Hagi doem myid zigi «Byu dayug gi shid: mang ri zang" thung" yoomo agyeungshang: loo ein: shang'. Hau: thang: nyang: gi zoo: noem moo zang" thoung" nghoid rigi hau: ziri we' agyeungshang: loo bue" lo" la".
Khainjung bi tid zigi ‹Nghoid agyeungshang: loo› ga: phoug tid boem.
14Houg: lang" Hagi doem tid zigi ‹Aseing tid zigi houg: yo' dakhyoo" ti" he: nga" da" byumyu" yigi nyangnu" koid thu da" ce" noem yo' we' phoin: moo nyangnu" ngei" byid: wa ga: ci: re" da" xoin" du: dangain" we' nga" shidkhoin" moo hougsu" nyang: agyeungshang: zi nghoid nyid.
Aseing gi Nya: Mainkaid Byid: wa Dangsoo" To" Khyoo:
15 Aseing tid zigi «Nanu" ce: noem bue" jo, ziri asi' goo" la". Nanu" gi Noku Yhoem: Moo" akoid shi" uri 16Gug shi" meishi" yoo mo, eig xi: tang koo: yo" yu wa› ga: myid ci: loug daxi: tang za: dashau" yu ago". Zabyid yhid: 50 ga: lain: yo" yu wa ga: soin: ci: lho: yhe: ri: zabyid pyeig jang: moo: ga: lain: 20 za: dashau" yu ago". 17Ngoo gi nanu" yoem: kaid nyid da" shoo" zoo: shoo" shug shivoo: shiloem kyug shid: loo" wa shid re" lid lung ri houg nhang: lho: leig voo ri khyoo' byid: nghoid loug we' nanu" gi nheigloem: athid lo boem. 18Akhid" nyid" gi lhammoo" goug: khyab eig xe: myid: nyid" nghoid wigi Aseing da" yhoem: moo" ayang: zhug shid" da" moo" bain da" bidnyid nghoid. Akhid" mo thang: phyang" ce: noem bue" loo wa ziri yu" yu we'. 19Gug zoo meiloem: ci" we' adeing loo loug we' zabyid nei yo' lafoem byab shiphain gam yo' zhainloin: gam moo ashi" azei: shi" loug akhid" nyid" mo thang: phyang" gi ngoo nanu" ri mainkaid jeju" byid: wa bye:» ga: tid.
Zerubabela Shid re" Aseing da" Dangsoo" Khoin"
20-21Hau: Lhammoo" khab' eig xe: myid: nyid" moo nyang: Aseing gi Yuda mung" zoug: Zerubabela shid re" Hagi ri eig lheing: ein: da" mungdang: ri doem tid nhang: zigi ngoo gi mougkhung: yo' myidjang ri lang: nhoin' kaid wa 22Khokham mungdain: dangain" ri we' tu: mhug sain" khyo' pyam wigi nyangnu" da" yoem: so' ri we' thang loo" nhang: wa nyangnu" da" gyi rheing" joem yo' houg: moo zhung: mo, dangain" ri tu: sain" pyam byid: wa zi nghoid. Myang: joem we' shid: lo" boem wigi myang: jui: mo, we' nyang: cang" nyang: said go" lho: doem thang lo" byug boem wa. 23Hau: bidnyid moo Shelati da" nya: zoo: nga" join Zerubabela nang ri ngoo shu" yu lho: nga" myeing ri ci: wigi yo" vhoebkhang" nyid wa shid re" nang ri gain khain" byid: too" wa. Nang gi ngoo khyen: yu too" su: nyang: nghoid ga: yoem: moo" bo da" Aseing tid nyid.
Currently Selected:
HAGI 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.