APOEM AYANG: 8
8
Tagyid Kain" Lo" Khyoo:
1Mangsoo gi Noa yo' nyang: yo' dage" gyid lhid moo" zeing khoug: moo loung" nyid da" gougnyhoug dangain" ri boin: so" nyid yoomo nyang: gi lid ri hau' nhang: lho: gyid ri kain" loo" nhang: bye:. 2Mougmyid mo gyid thu duang: joem yo' mougkhung: gyid khoem" joem ri myhid" pyam bye:. Moug: nghain: lho: 3gyid gi dasho: wim: xi: nyid" ju" sho' yen yen kain" loo" bye:. 4Lhammoo" nyhed khyab ein: khyab daxe: nyhed nyid" nyid" moo gyid lhid moo" zeing gi Ararad boem tho' moo ki" khari" bye:. 5Gyid gi xo' xo' kain" lo" lho: daxi: khyab khyab xang: shi" nyid" moo boem phyoo" boem nyug joem ze thu lo.
6Hau: thang: myid: xi: nyid" ri Noa gi bangzoo: khoem" daloem: phang lho: 7Kano, dadu: ri nhang: thu kaid. Hau: ngho' gi adoem tau" loo looza: gyid bain kyug kain" da" ayo, moo ju" sho' dang: lam" lheing: yen" byoug da:. 8Hau: ayo, aboin: moo Noa gi gyid kain" bye: ziri si' wa shid re" pheing" kyoug" dadu: nhang: thu kaid. 9Nghoid loug mougmyid dangain" moo gyid dadeing nyid wigi pheing" kyoug" gi gyo" noo: wa jang: ashau" shoo: yoomo nyang: gi gyid lhid moo" zeing khyoo: doem dang: tau" lo wigi Noa gi lo, yhoin" kaid lho: akhoug: khyoo: lhoem: fang yu. 10Nyang: gi thang: nyhed nyid" doem lang" lho: pheing" kyoug" ri doem nhang: thu kaid. 11Pheing" kyoug" gi myen" thang: zoo" moo zhainloin: fu' ajoem: dafu' thei" dang ci: lho: doem lo. Houg: yoomo Noa gi gyid bain kain" bye: ziri se' abye:. 12Hau: thang: nyang: gi nyhed nyid" doem myang" lang" pheing" kyoug" ri dalheing: doem nhang: thu kaid- he: lheing: moo gi adoem tau" loo loo:.
13Noa gi 601 zain byeung" da" xang: shi" khyab da" xang: shi" nyid" moo gyid gi bain kain" khari" bye:. Noa gi gyid lhid moo" zeing mo amyhid" ri phang pyam lho: ayam khyoo: yu" kaid ri myidjang dangain" kyug zo" loo" bye: ziri myang bye:. 14Eig khyab ein: wa da" eig xe: nyhed nyid" nghoid lang" myidjang gi goo" lhoo: za: kyug hei' bye:.
15Mangsoo gi Noa ri 16«Re" yhoem: seing: myhi'- re" zoo: yi re" dumoo" yi yo' dage" gyid lhid moo" zeing mo thu loo" we'. 17Ngho' joem yo' gougnyhoug joem dangain" gi moug: gyab goin" moo doem nyid je: loo" wa shid re" nang yo' dage" shu" thu loo" we'» ga: tid. 18Houg: yoomo Noa gi nya: yhoem: seing: myhi'- nya: zoo: yi nya: dumoo" yi yo' dage" gyid lhid moo" zeing mo thu boem bye:. 19Gougnyhoug dangain" yo' ngho' joem dangain" gi nya: phung: yo' phung: gyid lhid moo" zeing mo thu lo" boem ago".
Noa Xoin" Ngei" Khyoo:
20Noa gi Aseing shid re" phoin: daloem: ri zhug: lho: nyang: gi younglho' da" gougnyhoug yo' ngho' ja: khang" moo" mo dadu: du: ri yu lho: phoin: tho' moo phoid ngei" byid: bye:. 21Ngei" to' byid: da" nam pyo: xoin" shoem: ri Aseing gi nheugshid: ziyo' nya: gung nyang: «Xangsu: byu yi da" shoid vhang: khyoo: gang mo ngoo gi mougmyid ri nheing" khoin" khanham we' shoug" nhang: loo wa zi anghoid. Nyang: gi ngi shi" mo nyang: nya: da" myid soin' khyoo: gi nheig akhyeing" ziri ngoo si' bye:. Ngoo gi akhid" lheing: koid yhang: te" da" dei moodei ri said mhoin' pyam khyoo: ri khanham we' ngoo doem koid loo wa anghoid. 22Mougmyid dajo, jo, gi houg: moo kyoo' khyoo' yo, yo' yham" zheing" yo, gi dajo, jo, nyid wa bye:. Houg: moo ngam" jham" yo, yo' lung yo, zain yo' xung"- nyid" yo' myen" gi khanham we' dajo, jo, wa bye:» ga: tid.
Currently Selected:
APOEM AYANG: 8: LCL
Highlight
Share
Compare
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
Videos for APOEM AYANG: 8
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Episode 29: Did a Meteor Really Trigger Noah’s Flood?
Under The Hood
Ep 32. Genesis 6-7: The Flood: A Heartbroken God Brings Justice and Mercy
The Bible Show