APOEM AYANG: 37
37
Yoseb yo' Nya: Mang: Nhung" Yi
1Yaku gi nya: phoo nyid lo da" Khanan mung" moo xo' nyid nyid lho: 2he: zigi Yaku yhoem: byu yi da" khyoo: nghoid.
Daxe: nyhed zain boo bye: da" Yoseb gi nya: phoo da" dangcang: myhi' Bila yo' Zipha tang: da" zooshang: yi nya: mang: bang: yo' dage" yang joem coidbaid joem ri zung" lho: nyid nyid. Nyang: gi nya: mang: bang: lhoung koid nyid da" age khyoo: joem ri nya: phoo jhang khyang" lhoung lo shid.
3Yaku gi nya: zoo: tang: yi dangain" bang: tho' Yoseb ri je jhed. Khasu" wim ga: ri nyang: apyaid gyi: mang: thang: ri yoo" su: nghoid yoomo nghoid. Nyang: gi Yoseb ri gye" yung" da" byisheing: dakhyab coeb byid: to". 4Nya: mang: bang: gi nyangnu" ri tho' re" nya: nhung" Yoseb ri nya: phoo je jheddab ziri myang lang" nyangnu" gi nya: nhung" ri atho' tid ngheing" wigi zoem" khau: ji khyoo: moo anoug ashoo" koid boem ago".
5Dalheing: ri Yoseb yhoebmo, myang lho: hau: khyoo: nya: mang: bang: ri tid kyoo" lang" Nyangnu" gi je je nyang: ngheing" boem bye:. 6Nyang: gi «Gyo: yu" shi" ge'. Ngoo gi yhoebmo, daloem myang. 7«Nyhang" gi dain" moo sungsoo: gug gam yham" deing: nyid uri nga" gug deing: gi to' yab jo,- nanu" da" gug deing gi nga" gug deing: ri lheing khoem to" lho: houg: ri pid nyid da" yhoebmo, myang» ga: tid.
8«Nang gi khokham zoug: ludaid koid lho: ngoonu" tho' moo vhoeb nyid wa ein: soin' nyid lha"» ga: nya: mang: bang: myid:. Houg: yoomo nyangnu" gi nya: yhoebmo, gang mo we' nyangnu" da" khyoo: ri khyang" shid gang mo we' nyang: ri je je ngheing" bye:.
9Hau: thang: Yoseb gi yhoebmo, gootu: daloem: ri doem myang lho: nya: mang: bang: ri «Ngoo yhoebmo, daloem doem myang. Bid- lhammoo" yo' kyi: joem daxe: dacab gi ngoo ri no' nyid ziri ngoo myang» ga: tid kyo".
10Nyang: gi nya: phoo ri we' yhoeb mo, doem tid kyo" wigi nya: phoo gi nyang: ri hau: zigi cite" yhoebmo, nghoid lha". Re" myhi' re" mang: bang: yo' ngoo gi re" jhang re" lho: nang ri noku goeb pid nyid goo" wa ein: nang soin: nyid lha"» ga: nheig yo: gyi koid kaid. 11Yoseb da" mang: nhung" yigi nyang: ri no" zo nyid. Nghoid loug we' nya: phoo gi hau: khyoo: dangain" ri soin: zhung" yu" nyid.
Yoseb gi Oung" Zo: Kaid Shau" lho: Egutu Moug: khyoo: Shu" lo" Shau" Khyoo:
12Danyid" da" bidnyid moo Yoseb da" nya: mang: bang: gi nya: pho da" gougnyhoug joem ri Shekhem moo yhe: zoem: nyid boem uri 13Yaku gi «Re" mang: bang: yang zung" nyid da" joyoo khyoo: nang ri ngoo yhi: nhang: nau» ga: tid lang"
Yoseb gi «Ge o"» ga: tid.
14Nya: phoo gi «Amang: bang: gi yang" nyid boem go" la'- gougnyhoug joem gi goo" lhoo: za: nghoid nyid la'- yhe: yu" wigi ngoo ri doem lo tid kyoo" we'» ga: tid. Houg: yoomo nya: phoo gi nyang: ri Hebron pa: dam mo yhe: de" kaid.
Yoseb gi Shekhem moo Ju" lho: 15hau: moug: khoug: moo so" lheing: yen" uri yuggi phoo dayug gi nyang: ri myang wigi nyang: ri «Nang ci: sho: yen"» ga: re" myid: lang"
16Yoseb gi «Gougnyhoug re" zoem: nyid da" nga" mang: bang: ri cang sho: yen" zi nghoid. Nyangnu" khamoo nyid ziri nang ngoo ri yo" tid kyoo" la"» ga: wigi doem myid:.
17Yuggi phoo gi «Nyangnu" lo" byug bye:. Nyangnu" gi Dothan khyoo: yhe: lo" boem bye: ga: ziri ngoo shau" gyo:» ga: tid. Houg: yoomo Yoseb gi nya: mang: bang: jhang cang yhe: lho: Dothan joyoo mo yhe: myang shoo: bye:.
18Nyangnu" gi nyang: ri vi: mo myang wigi nyang: gi nyangnu" jhang aju" shi" ri nyangnu" gi nyang: ri said pyam wa shid re" sham: go" boem. 19Nyangnu" gi dayug yo' dayug «Yhoebmo, sara: phoo re" bye:. 20Nyang: ri said pyam lho: gyid aboo lo: da" gyid thung" xoug" moo du" kaid shang. Akhid" ri" ge'. Nyang: ri siyoo gougnyhoug wigi ngaid said pyam bye: ein: ge tid the'. Houg: lang" she' nya: yhoebmo, cisu" bui" loo wa ziri myang wa bye:» ga: tid go" boem.
21Hougsu" sham: goo" ziri Ruben shoug" gyoo: lang" Yoseb ri khyoid yu wa khyoo: shoo bye:. Houg: yoomo nyang: gi «Nyang: ri said gyeing" gi asaid shang. 22Dain" pyoid yoomo jo, da" he: gyid thung" khoug: khyoo: za: nyang: ri kaid too" shang. Dam gyeing" gi atab' ja"» ga: tid. Nyang: hid: su" ga: tid zigi nyang: ri nyangnu" lo, mo khyoid yu lho: nya: phoo jhang doem nhang: tau" kaid wa shid re" soin' zi nghoid. 23Yoseb gi nya: mang: bang: jhang ju" lang" nyangnu" gi nya: da" byisheing: ri lhoem: lhoid khyoid yu pyam byid:. 24Hau: thang: nyangnu" gi nyang: ri myheig yu lho: gyid aboo lo: da" gyid thung" khoug: khyoo: khyo' kaid ago".
25Nyangnu" voem: zoo: go" nyid uri Ishmaela byu daphung: gi Gilead moug: mo Egutu mung" khyoo: yhe: lo" nyid ziri myang kaid. Nyangnu" da" gola-ug joem gi nam pyo: ja: seig xu:- Balsam xu: joem tho' ci: boem ago". 26Yuda gi nya: mang: nhung" yiri «Nyang: ri said lho: byu said khyoo: ri zau" pyam ri ce: akyu" boo wa lha". 27Nyang: ri he: da" Ishmaela byu phung: khyoo: oung" byid: kaid shang. Ngoonu" nyang: ri ce: dam tab anoo" loo- hau: tho' agoo"- nyang: gi nyha" suid" nyha" shoo" nyha" nhung" nyang: danghoid» ga: tid. Nya: mang: nhung" yi we' bo myid veing" wigi 28Midian byumyu" phaga: byu yi lid: loo lang" nya: mang: bi" gi Yoseb ri gyid thung" mo she: thu yu lho: Ishamaela byu yi lo, khyoo: ngei eig xi: yo' nyang: ri oung" kaid wigi nyang: ri Egutu mung" khyoo: shu" yhe: loo" bye:.
29Ruben gi gyid thung" khyoo: doem tau" re" yu" ri Yoseb houg: moo aloung" jo, ziri yhe: myang lang" koug yoomo nyang: gi nya: byimi ri lang: ceig bye:. 30Nyang: gi nya: mang: nhung" yi jang doem tau" lo lho: «Gyid thung" moo zooshang: anyid loo ngoo gi khasu" koid loo wa lha"» ga: tid.
31Hau: thang: ri nyangnu" gi coidbaid dadu: said lho: Yoseb da" byisheing: ri hau: suid" moo doin: joem ago". 32Nyangnu" gi hau: suid" dab da" byisheing: ri nya: phoo jhang ci: lo" lho: «Ngoonu" he: ziri myang koid:. He: zigi Yoseb da" zi anghoid la"» ga: lo" tid.
33Nyang: hau: ziri se' yu" lho: «Nghoid- hau: zi nya: da" byi: nghoid. Siyoo gougnyhoug gi nyang: ri ngaid said lho: nga" zo: Yoseb gi aceing ceing ngaid ceing pyam zi shoug" bye: nhung:» ga: wigi tid. 34Yaku gi koug wigi nya: byimi ri lang: ceig pyam lho: jid: moo" byi: ri void. Nya: zoo: da" gang mo ayo, myang" myang" koug nyid da:. 35Nya: zo: mung nham: yigi lo lho: nheig teing yoem: byid: dang: lo tid nghoid loug nyang: gi ngeug pyam lho: «Nga" zo: gang mo nheig nyang: dakug nyid shi". Ngoo gi shid: noug bye:» ga: tid wigi nya: zoo: Yoseb shid re" xo' lho: dakug nyid.
36Hau: ayo, ri Midian byu yigi Yoseb ri Egutu mung" mo khokham khoo" ri zung" da" khokham gyizoug: Phutipha lo, moo oung" byid: pyam bye:.
Currently Selected:
APOEM AYANG: 37: LCL
Highlight
Share
Compare
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
