THU' LO" MOUGSOUG" 10
10
Jhenkhyeug
1-2Hau: thang: Aseing gi Moshe ri «Khokham jhang yhe: yu" we'. Ngoo mau" pho" alhoo: again koid shug uri Egutu byumyu" yiri ngoo khayhi' ko" moo" koid pyam ziri nanu" da" nya: zoo: yi yo' nya: myid: yiri yo" tid kyoo" wa shid re" nyang: yo' nya: gyizoug: yi shidkhoin" moo ngoo koid da" mau" pho" alhoo: again ri yo" myang nhang: wa shid re" nyangnu" ri nheigloem: thain: nhang: to" zi nghoid. Ngoo Aseing nghoid ziri nanu" dangain" si' baja"» ga: tid.
3Houg: yoomo Moshe yo' Arun khokham jhang yhe: wigi nyang: ri «Hebre byumyu" yi da" Aseing Mangsoo tid ‹Nang ngoo ri yhen: loo wa shid re" kha: myhang ngeug he: nyid shi" wa la". Nga" byumyu" yi ngoo ri yo" noku wa shid re" yhi: wa akhang" byid: we'. 4Nang ngeig nyid shi" nghoid rigi nab kyoo' re" mung" khyoo: ngoo jhenkhyeug ri nhang: kaid wa. 5Hau: zigi gye" myo: wigi myidgung dangain" ri yo" nghoeb pyam wa zi nghoid. Hau: joem gi leigvoo yo' ayo" shoin' pyam yoomo deung jo, da" ja: khang" moo" ri zo: pyam wa. Deing jo, da" seiggam joem rilang" zo: pyam goo" wa. 6Hau: joem gi re" khokham kho" joem moo we' re" gyizoug: dangain" bang: yhoem: joem moo we' re" byumyu" yi dangain" bang: yhoem: joem moo we' byeung" shoin: loo" wa zi nghoid. Hau: joem gi nanu" phoug" phyid" yi myang yu" da" tho' je xo: loo wa.›» ga: tid. Hau: thang: Moshe lheing: thu lo" byug bye:.
7Khokham da" gyizoug: yigi nyang: ri «He: byu yigi kha: myhang ju" sho' ngoonu" ri yau: khe" khyoo: byid: nyid shigoo" wa la". Nyangnu" Aseing Mangsoo ri yo" noku wa shid re" Israela yuggi yiri yhe: wa akhang" byid: kaid we'. Egutu mung" bain yoin" lo" ziri nang aboin: rhe"» ga: tid ago".
8Houg: yoomo Moshe yo' Arun ri khokham jhang doem shu" tau" lo wigi nyang: gi Nya: tang: ri «Nanu" yhe: wigi nanu" Aseing Mangsoo ri yhe: noku ge'. Nghoid loug we' yhi: wa mo, hang" hang" nghoid» ga: myid: bye:.
9Moshe gi «Ngoonu" gi ngoonu" da" zooshang: yi yo' mang: zoo: yi bo bo wigi ngoonu" dangain" mo, yhi: wa zi nghoid. Ngoonu" gi ngoonu" yuggi zoo: myiyi: zoo: yi ngoonu" da" yang- coidbaid joem nu: joem ri shu" yhi: wa zi anghoid. Ciwim ga ri ngoonu" Aseing ri ngi: shab byid: da" pui" yhe: koid ca" da» ga: tu" bye:.
10Khokham gi «Ngoo nanu" ri nanu" myiyi: yi yo' zooshang: yiri dage" yhi: wa akhang" byid: zi anghoid ein: Aseing ri ngoo jham' tang: too" bye: zi nghoid. Nanu" goemlu too' wa soin' nyid boem ziri di: di: nyang: myang abye:. 11Hougsu" anghoid. Nanu" nau nghoid rigi yuggi yi kyeing" yhe: wigi Aseing ri yhe: noku ge'» ga: tid. Houg lho: Moshe yo' Arun ri khokham shidkhoin" mo khaid thu kaid bye:.
12Hau: thang: Aseing gi Moshe ri «Jhenkhyeug joem thu loo" wa shid re" re" lo, ri Egutu mung" adang moo tu: yeing too" we'. Hau: joem gi re" wigi Egutu mung" moo yug jo, da" seigzoo: voozoo: dangain" yo' leigvoo baid thang: ri deung jo, gu: dangain" ri zo: pyam wa» ga: tid. 13Houg: lang" Moshe gi nya lhamdung: ri tu: yeung too" lang" Aseing gi hau: nyid" nyid" goin" hau: myen myen goin" ri hau: mung" adang moo bidthu shoid mo lid houg nhang: wigi nab soin: ri hau: zigi jhenkhyeug shu" loo bye: zi nghoid. 14Hau: jhenkhyeug joem dang: vang lo lho: mungdain: goin" adang moo lo no: nyid ago". Hau: joem gi gye" myo: wigi houg yhang: ti" da: jhenkhyeug phung: ri shid ri we' amyang yu" thang: ri we' myang yu" zi anghoid. 15Hau: jhenkhyeug joem gi myidgung ceig ceig no, sho' nghoeb pyam wigi seiggam mo shi" we' bo wigi leigvoo baid jang" mo deing da" seigshi vooshi" dangain" ri zo: pyam boem ago". Egutu mung" dangain" mo nyau da" seigzoo: voozoo: dagam we' ajo, loo: sho' zo: pyam bye: ago".
16Hau: thang: khokham gi Moshe yo' Arun ri myab, myab, khe: wigi «Ngoo nanu" Aseing Mangsoo ri we' re" tang: ri we' yooboo shoid bye:. 17Akhid" daleing: nga" yooboo ri khyoid pyam byid: we'. Shid: gyoin noogyoin yhang: ti" yooboo dam mo ngoo ri khyoid yu wa shid re" nanu" Aseing Mangsoo jhang akyu" mho' byid: we» ga: tid bye:. 18Moshe gi khokham jang" mo thu lo" wigi Aseing jang" moo akyu" mho' bye:. 19Houg: lang" Aseing gi bid thu lid ri je thain: da" bidvang shoid mo lid moid tau" nhang: wigi jhenkhyeug joem dangain" ri moid shoem" lo" lho: Thoem" Ni moo khyo' pyam bye:. Egutu mung" dangain" mo jhenkhyeug dadu: we' anyid khari" loo: nghoid da:. 20Nghoid loug we' Aseing gi khokham da" nheigloem: ri thain: nhang: wigi nyang: gi Israela byumyu" yiri yhe: wa akhang" abyid: nghoid da:.
Moug: coid
21 Aseing gi Moshe ri «Egutu mung" ri teung: teung: no, da" moug: coid wigi nghoeb pyam wa re" lo, ri mougkhung: khyoo: tu: yeung too" we'» ga: doem tid. 22Moshe nya: lo, ri mougkhung: khyoo: tu: yeung too" lang" Egutu damung" goin" jang" mo moug: coid soem" nyid" bue" jo, bye:. 23Egutu byumyu" yi dayug yo' dayug ayo" myang goo" yoomo hau: ayo, khoug: moo nyangnu" yhoem: mo yhoem: pain' khyoo: dayug we' athu loo" nghoid ago". Nghoid loug we' Israela byumyu" yi nyid da" joyoo moo gi myo, myang nyid da:.
24Khokham gi Moshe ri khe: yu wigi «Aseing ri yhe: lho: noku we'. Myiyi: yi yo' zooshang: yi we' nang yo' dage" shu" yhe: we'. Nghoid loug we' re" coidbaid- yang yo' nu: joem ri hid: moo too' khoo' ca"» ga: tid.
25Moshe gi «Houg: lang" ngoonu" Aseing Mangsoo ri xoin" to' wa yo' myi: nghe' wa gougnyhoug xoin" du ri nang byid: ca" zi nghoid. 26Hougsu" anghoid. Ngoonu" da" gougnyhoug dangain" zi pyoung" yhi: wa zi nghoid. Dadu: we' thang: moo teing too" wa zi anghoid. Ngoonu" Aseing Mangsoo ri noku wa shid re" ngoonu" nyang: he: gougnyhoug mo khyen: yu wa zi nghoid. Hau: joyoo mo aju" ju" gi gougnyhoug kha: du: ri xoin" to' wigi nyang: ri noku wa zi ngoonu" se' zi anghoid» ga: tid bye:.
27 Aseing gi khokham ri nheigloem: thain: nhang: wigi nyangnu" ri yhe: wa akhang" abyid: nghoid da:. 28Nyang: gi Moshe ri «Nga" jang" mo thu lo" we'. Ngoo nang ri khanham we' adoem myang nau. Ngoo myang nyid" ri nang shid: wa zi nghoid» ga: tid.
29Moshe gi «Nang tid zi nghoid bye:. Nang ngoo ri khanham we' yo" myang loo: wa zi anghoid» ga: tid.
Currently Selected:
THU' LO" MOUGSOUG" 10: LCL
Highlight
Copy
Compare
Share
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
