2 SAMUELA 7
7
David Shid re" Nathan da" Mungdang:
(1 Km 17:1-15)
1Khokham David gi nya: khokham vang" moo nyid nyid lho: Aseing gi nya: gyivoo dangain" jang mo nyang: ri lhoug zung" nyid da:. 2Hau: thang: ri khokham gi lapi: Nathan ri «Yu" we' ngoo koem' gi shamu seig yo' koid da" yhoem: moo lung" jo, bye: nghoid loug we' Mangso da" Dang: Theing Kuid: gi zoem" moo dabo jo, da» ga: tid.
3Nathan gi «Aseing nang yo' dage" nghoid nyid yoomo nang myid khyo" koid we'» ga: tid. 4Nghoid loug we' hau: myen nyang: Aseing gi Nathan ri 5«Yhe: wigi nga" join David ri ngoo tid ein: yhe: tid we'. Nang gi ngoo nyid wa da" nga" shid re" Noku Yhoem: Moo" ri yo" koid byid: wa su: anghoid. 6Israela byumyu" yiri Egutu mung" mo ngoo khyoid yu da" bidnyid mo akhanyid" ju" sho' Noku Yhoem: moo ngoo anyid yu" shi"- zoem" akhoug: moo nyid nyid lho: ngoo dalheing" yen" zi nghoid. 7Israela byumyu" yi yo' ngoo gyung: so" yen" da" joyoo khang" moo" moo nga" shid re" shamu seig yo' koid da" Noku Yhoem: Moo" ri nyangnu" ciwim akoid bye: go" lha" ein: khyo" Israela byumyu" vhujhung: yi hang" ri we' ngoo moo" foin: wigi khanham we' amyid: yu"» ga: tid da:.
8«Hougsu" nghoid yoomo Myhang: thang da" ngoo Aseing nyang: ri tid da" dang: nga" dei zoo: David ri tid we'. Khyam: cang nang yang zung" nyid jang" mo ngoo nang ri khe: yu wigi Israela byumyu" yiri vhoebkhang" wa da" zoug: aya: nang ri byid: too" bye:. 9Nang so" yen" da" joyoo khang" moo" ngoo nang yo' dage" nyid nyid nang oung: doid wa shid re" re" gyivoo yi dangain" ri ngoo khaid zain: pyam byid: bye:. Mougmyid gyab goin" jang" moo nyid da" gyi: thang vhujhung: yi dangain" bang: yhang: ti" ngoo nang ri myeing gyi: nhang: wa zi nghoid. 10-11Nga" Israela byumyu" yi shid re" joyoo dayoo yoo soin' to" wigi hau: joyoo moo nyangnu" nyid nyid lho: doin: zeig da" khyoo: ci: we' ajo, loo: za: nyangnu" shoug" nyid wa zi nghoid. Akhid" ju" sho' nyangnu" gi he: mung" khyoo: vang nyid zi nghoid wigi athoug" akhyoug: bang: wigi lhoem: khaid zain: ziri we' shoug" bye: zi nghoid. Nghoid loug we' doem bui" wa zi anghoid. Re" da" gyi yi dangain" bang: da" lo, mo laloem lanyu: zung" wa da" dang: theing ngoo to" too" bye:. Re" byumyu" akung: ako'' joem ri we' ngoo byid: wa zi nghoid. 12Nang shid: byug lang" re" phoug" phyid" yo' dage" myhoeb wigi re" yuggi zoo: dayug yug ri khokham koid nhang: lho: nya: mungdain: ri ngoo geing: teing nhang: wa zi nghoid. 13Nyang: koem' gi nga" shid re" Noku Yhoem: Moo" koid wa yug nghoid wa. Nya: da" myhang: thang zhungtang ri gyeing" nyang: apyaid atoo: ngoo geing: teing nhang: too" wa zi nghoid. 14Ngoo gi nya: phoo nghoid wa ziyo' nyang: gi nga" zoo: nghoid wa zi nghoid. Nyang: shoid da" uri nya: phoo gi nya: zoo: ri dam byid: yhang: ti" ngoo dam byid: wa zi nghoid. 15Nang khokham bui" sho' Sholu da" lo, mo ngoo khyoid yu yhang: ti" nya: thang: bo dab da" khyoo: ri ngoo theing: pyam wa zi anghoid. 16Re" akung: ako' joem khanham we' dajo, nyid wa. Re" mungdain: ri apyaid atoo: geing teing nyid nhang: wa. Re" da" myhang: thang zhungtang gi khanham we' thang loo" wa zi anghoid» ga: tid.
17Nathan gi Mangsoo nyang: ri pang shug gu: dangain" ziri David ri tid kyoo" bye:.
David da" Jeju" Boin: Akyu" Mho' Dang:
(1 Km 17:16-27)
18Hau: thang: ri khokham David gi Aseing da" zoem" khyoo: vang zhung: wigi «Myhang: thang Aseing we"- nga" shid re" nang koid byid: bye: da" moo" zoo" yo' tu' yu" ri ngoo yo' nga" ikoin deungkhu: gi phau" dab nyid zi anghoid. 19Nghoid loug akhid" gi nang je koid byid: nyid da:. Myhang: thang Aseing we"- ju" loo wa da" ayo, akhyeing: moo nyid yhe: loo" wa da" nga" akung: ako' joem yo' sen: da" dang: theing joem ri we' nang jang deing too" bye: zi nghoid. Myhang: thang Aseing we"- nang gi he: khyoo: myang nhang: nyid nhung: lha". 20Ngoo nang ri ce: noem yo" phug tid wa la". Re" dei zoo: nghoid da" ngoo ri nang se' nyid gu: nghoid bye:. 21Ngoo ri jhau" shid wa shid re" he: moo" zoo" zeing dangain" ziri nang koid bye: yoomo hau: zigi re" da" myid vho: khyoo: yo' myid soin' to" da" khyoo: nghoid nyid da:. 22Myhang: thang Aseing we"- nang gi khayhi' gyi: sheung: nyid lha". Nang yo' du zi hang" we' anyid nghoid da:. Nang nyang: kyeing" Mangsoo nghoid ziri ngoonu" khanham we' se' nyid zi nghoid. 23Re" byumyu" bui" wa khyo" wigi nyangnu" ri join koid jang" mo nang khyoid yu da" Israela byumyu" yi yhang: ti" du da" byumyu" gootu: he: mougmyid tho' moo anyid loo: nghoid ago" da:. Nyangnu" shid re" nang koid shug da" gyi: sheung: ziyo' mau" pho" moo" zoo" joem gi mougmyid gyab goin" jhang khyoo: myeing khyang" byo: sain" nhang: bye:. Re" byumyu" bui" nhang: wa khyo" Egutu mung" mo nang khyoid yu bye: da" byumyu" yi to' yhe: loo" lang" gootu: byumyu" yi yo' nyangnu" da" yu phara" joem ri nang khaid thu byid: bye: zi nghoid. 24Israela ri apyaid atoo: re" byumyu" aseing: nang bui" nhang: bye: zi nghoid ziyo' nyangnu" Mangsoo gi nang Aseing nghoid nyid bye: zi nghoid.
25Akhid" koem' gi Aseing Mangsoo we"- ngoo yo' nga" akung: ako' yi shid re" nang jang deing too" bye: da" dang: theing joem ri pyeing byid: la o". Nang koid byid: wa ga: tid to" da" ziyo' dayhang: ti" koid byid: we' o". 26Re" myeing khyang" gyi: sheung: lo wigi ayo, khang" moo" moo byumyu" yigi «Myhang: thang Aseing gi Israela byumyu" yi atho' moo nyid da" Mangsoo nghoid da» Nang gi nga" zhungtang ri apyaid atoo: lhoug zung" goin coung: nyid zi nghoid. 27Myhang: thang Aseing Israela byumyu" yi da" Mangsoo we"- re" dei zoo:- ngoo ri he: khyoo: dangain" ziri nang tid phang shug bye: ziyo' nga" byumyu" akung: ako' yiri khokham koid nhang: wa ga: we' nang tid bye: yoomo he: akyu" mho' dang: yo' re" jang" moo akyu" voem" mho' nyid zi nghoid o".
28Akhid koem' gi Myhang: thang Aseing we"- nang gi Mangsoo nghoid nyid da:- nang gi re" dang: theing ri khanham we' zei: zeing ci: ziyo dayhang: ti" ngoo ri we' he: mau" pho" dang: theing nang jang deing too" byid: bye: zi nghoid. 29Nga" akung: ako' yi re" myonhoo: ngilang: akhoug: moo xo' wigi ngei pyo: nyid baja"- nyangnu" ri mainkaid byid: wa shid re" ngoo nang ri mho' nyid o". Myhang: thang da" Aseing we"- he: ziri nang dang: theing" byid: bye: zi nghoid wigi mainkaid jeju" gi nga" akung: ako' yi da" adang moo apyaid atoo: dajo, jo, baja" o"» ga: mho' yoid nyid da:.
Lacid Bible © Bible Society of Myanmar, 2009.