Romanos 11

Le israelitaob toca'ano'obo'

1Bejela'e' túuna' quin wa'alic: ¿Dzo'oc wa ta t'aan u cúulpachcuuntic Jajal Dios u caajal? ¡Ma' bey ucha'anili'! Tumen tene' israelitaen, ti' u ch'i'ibal Abraham, ti' u chi'ibalil Benjamín. 2Jajal Diose' ma' u cúul pachcuntmaj le israelitaob máaxo'ob tu yéeyaj tu yáax chuuno'. ¿Ma' a wojele'ex ba'ax cu ya'alic le Quili'ich Dzíib ti' u tzicbalil u cuxtal aj bóobat Elías, bix leti' ichil u payalchi' ti' Jajal Diose' tu tacaj u pool le israelitaobo'? Tu ya'alaj Beya': 3Yuumtzil dzo'oc u quiimsico'ob a aj bóobato'ob yéetel dzo'oc u jenico'ob u cúuchilo'ob tu'ux ca kulta'al, chéen teen p'aatlen, yéetel u káat u quiimseno'ob xan. 4Ba'ale' Jajal Diose' tu núucaj ti': Dzo'oc in jun páaycuntic in ti'al teen siete mil máaco'ob ma' xolaco'ob tu táan beetbil dios Baal. 5Bey xan bejela'e', p'aatal dze'edzec tio'ob, máaxo'ob yéeyano'ob tumen Jajal Dios tu yo'olal u yutzil. 6Wa tu yo'olal u yutzil Jajal Diose' ma' túun tu yo'olal ba'ax cu beetic máac tu juunal yóoli'; tumen wa beyo', u siibal utzil Jajal Diose' ma' túun siibal utzili'. 7¿Ba'ax túun? Le israelitaobo' ma' yanchaj tio'ob ba'ax cu caxtico'obi', ba'ale' le máaxo'ob yéeya'ano'ob tumen Jajal Diose', yanji tio'ob. Le u láako'obo' chichcunta'ab u pucsi'ikalo'ob 8je'el bix cu ya'alic le Quili'ich Dzíibo': Beeta'abo'ob tumen Jajal Dios síisa'an u pixano'ob; dzaab ich tio'ob ma' tu paacato'ob yéetel xiquin ma' tu yu'ubajo'ob, beyo'ob tac bejela'e'. 9Bey xan cu ya'alic David: U noj Janalo'obe' ca suunac léechilo'ob yéetel núup'tajilo'ob, u ti'al ca lúubuco'ob yéetel ca ja'adzaco'ob. 10Ca ch'óopchajac u yicho'ob u ti'al ma' u paacato'ob, yéetel ca wúudzuc u pu'ucho'ob u ti'al kiino'ob mina'an u xuul.

U tocsajil le máaxo'ob ma' judío'obo'

11Bejela'e' quin wa'alic: ¿Lúubo'ob wa jun puli' le judío'ob ca j t'óochpajo'obo'? ¡Tu jaajile' ma'! Tumen le ca tu beetaj u x ma' u'uyaj t'aan le judíobo', páatji u yantal tocsajil ti' le ma' judíobo', u ti'al ca yanac ti' le israelitaobo' u yóolil u quetico'ob. 12Bey túuno', wa u si'ipil le judío'ob j suunaj u ti'a'al u yutzil yóokolcaabe', wa le ba'ax jóok kaasil tio'ob jóok u ti'a'al u yutzil le ma' judío'obo', ¡buca'aj utzil cun yantal le quéen líiksa'ac tu ca'a téen tuláacal le judío'obo'!

13Ba'ale' yaan ba'al in wa'al ti' te'ex ma' judío'oexi'. Tumen Jajal Dios u túuxmajen ti' le máaxo'ob ma' judío'obo', quin jach táanilcuntic in meyaj. 14In káat beyo' dze'edzec ti' in wéet caajalo'obe' ca u dzíibolto'ob u quete'exo'ob, u ti'al ca to'ococo'ob beyo'. 15Tumen wa tu yo'olal cúulpachcunta'ab le judío'ob, páatji u yóokolcaab u bisicubáa tu ca'a téen yéetel Jajal Dios, ¿ba'ax ma' je'el u yúuchul le quéen ka'amaco'obe'? Mix ba'al u láak wa ma' cuxtal u ti'a'al le máaxo'ob quimeno'obo'. 16Tumen wa jun páaycunta'an u ti'a'al Jajal Dios le yáax waaj beeta'an yéetel le sacano', bey xan jun páaycunta'an tuláacal le sacano'. Wa u mootz jun cúul che' jun páaycunta'an u ti'al Jajal Diose', jun páaycunta'an xan u kabo'ob.

17Dze'edzec ti' le judío'ob je'el bix u jach kabo'ob le olivoo', j ch'a'aco'ob u ti'a'al ca ta'abaquech teech máaxech bey u kab le olivo'. Bey kuchiquech táccpajal ti' u mootz yéetel ti' u cuxtal le olivo'. 18Ba'ale' ma' a tuculticabáa mas ma'alobech ti' le máaxo'ob jach u kabo'ob le olivoo'. Wa ca tuculticabáa mas ma'alobeche', ka'ajac teche' ma' teech tzéentic le mootzo', ba'ale' le mootz tzéentiquecho'.

19Je'el wa a wa'alique': Bey, ba'ale' le kabo'ob ch'a'aco'obe' u ti'al ca ta'abaquen ti' le olivoo'. 20Ma'alob; ba'ale' ch'a'aco'obe' tumen mina'an u yocsaj óolo'ob, yéetel teche' yaan a cúuchile' chéen tumen yaan teech ocsaj óolal. Bey túuno' ma' u ca'analtal a wich ba'ale' canantabáa. 21Tumen wa Jajal Dios ma' tu sa'atsaj le máaxo'ob jach u kabo'ob le olivoo'; mix teech bíin u sa'astech 22Il a wil, túun, buca'aj utzil Jajal Dios, ba'ale' jach toj xan. Jach toj yéetel máaxo'ob luubulo'obo', ba'ale' utz ta wéetel. Ba'ale' yaan a p'áatal ti' u yutzil, tumen wa ma'e' tac teech yaan a ch'a'acal. 23U láak ba'ale', wa le judíob cu ca'a ocsaj óolo'obo', yaan u ta'ablo'ob tu ca'a téen; tumen Jajal Diose' yaan páajtalil ti' u ti'al u ca'a tabico'ob. 24Tumen wa teech ma' judioech, luksa'abech ti' jun cúul káaxil olivo, u ti'al ca ta'abaquech ti' le ma'alob olivo quex táanxelil a taalo', ¡buca'aj mas le judíobo', máaxo'ob jach u kabo'ob le ma'alob olivo', bíin ta'abaco'ob tu ca'a téen ti' le olivo' tu'ux u taalo'obo'!

Le israelitaobo' bíin to'ococo'ob

25Sucu'une'ex, in káat ca a wojéelte'ex le ta'acbil ba'ala', u ti'al ma' a tucultique'ex jach yaan a na'ate'ex: Le israelitaobo' tu chichcuntajo'ob jun p'íit u pucsi'ikalo'obe', ba'ale' lela' chéen tac quéen chucpajac le máaxo'ob yéeyano'ob ichil le ma' israelitaobo'. 26Le quéen úuchuc beyo', tuláacal Israel cun to'ocol túun, tumen le Quili'ich Dzíibo' cu ya'alic: Le J-tocsajo' ti' Sión bíin jóokoc, yéetel bíin u lukes u kasa'anil Jacob. 27Lela' leti' in nup t'aan tu yéetelo'ob, quéen in lukes u kebano'ob.

28Tu yo'olal u ma'alob péectzilil le tocsajilo', le judíobo' ch'a'ano'ob bey u aj p'eeco'ob Jajal Diose' u ti'al u dza'abal tu'ux a wantale'ex te'ex; ba'ale' láili' yaabilta'ano'ob tumen Jajal Diose' tumen tu yéeyaj u úuchben taataob. 29Tumen le ba'ax cu dzáic Jajal Diose' ma' tu luksic, mix cu mixba'alcuntic úuchic u t'anico'on.

30Te'ex ca'ache' ma' ta wu'uyaje'ex u t'aan Jajal Diosi ba'ale' bejela'e' tu yo'olal u x ma' u'uyaj t'aanil le judíobo' Jajal Diose' dzo'oc u ch'a'aic óotzilil ti' te'ex. 31Bey xan bejela'e' leti'obe' ma' tu yu'ubajo'ob u t'aan Jajal Diosi, ba'ale' chéen u ti'al ca ch'a'abac óotzilil ti'ob tumen Jajal Dios je'el bix tu ch'a'ajil óotzilil ti' te'exo'. 32Tumen Jajal Diose' queet tu dzajilac tuláacal máac yáanal x ma' u'uyaj t'aanil, u ti'al ca u ch'a'a óotzilil ti' tuláacal. 33¡Buca'aj taamil u ayikalil Jajal Dios, yéetel u kaj óolalil bey xan u na'at! Ma' tu páajtal c tzolic ba'ax cu tucultic u beetic, mix cu páajtal c ch'a'a nu'uctic u beelo'ob. 34Tumen ¿máax dzo'oc u ch'a'a nu'uctic u tuucul Yuumtzil? ¿Wa máax tzol u xiquin? 35¿Máax tu dzaj táanil wa ba'ax ti' Yuumtzil u ti'al cu dzo'ocole' ca u kam u bo'olil? 36Tumen ti' Jajal Dios u taal tuláacal ba'al, beeta'ab xan tumen leti' yéetel u ti'al leti'. ¡Nojbe'enil ti' Jajal Dios u ti'al kiino'ob mina'an u xuul! Amén.

Currently Selected:

Romanos 11: YUA04

Highlight

Copy