TITAS 1
1
1Pathian hnaṭuantu le Jesuh Khrih ih tirhthlah keimah Paul in ca ka lo kuat.
Pathian ih a hrilmi a minung pawl an zumnak fekter dingah le kan biaknak thutak sungih hruai dingah Pathian in ih hril ih ih thlah. 2Cuih kan biaknak cu kumkhua nunnak ruahsannak sungah hram a bunmi a si. Thuphan a per dah lomi Pathian in hi nunnak cu leilung seem hlan ihsin in tiamkam zomi a si ih, 3a tikcu a kim tikah cumicu a Thuthang sungin a hun langter. Cumi cu ka hnenah i pek ih in Runtu kan Pathian ih thupeknak bangtuk in ka phuang.
4Zumnak bangrep kan neihmi sungah ka fa ngaingai a si mi Titas na hnenah hi ca hi ka ngan.
Kan Pa Pathian le in Runtu Khrih Jesuh in zaangfahnak le daihnak lo pe hram seh.
Krete Tikulh-ih Titas Hnaṭuannak
5Krete ah ṭuan ṭulmi pawl ṭuansuak dingah le khawkip ih kawhhran upa ret dingah Krete tikulh-ih ka lo taantanak cu a si. Ka thuzirhmi kha ciing ringring aw. 6Kawhhran upa cu mawhthluknak nei lomi siseh; nupi pakhat lawng a nei mi siseh,#1.6 Nupi pakhat lawng a nei mi siseh timi hi Nupi voikhat lawng a ṭhimi siseh ti tla a si thei. a faale pawl cu zumtu si hai sehla puarthaunak le thu ngailonak lamih thangsia lomi si hai seh. 7Kawhhran hruaitu cu Pathian hnaṭuan ah ṭuanvo neitu a si ruangah mawhthluknak um lomi a si pei. Mi puarthau le mi thintawi, zurit hmangmi, mi helhlong le paisa duhham mi a si lo pei. 8Mikhual le mileng zohthiamtu a si pei ih thilṭha a ngaina pei. A uk-aw theitu a si pei; miding, mithiang le ziaza ṭhami a si pei ih suup theinak neimi a si pei. 9Kan zumnak hram thawn a mil-awmi le rintlak a si mi kan Thuthang kha hnget zetin a pomtu a si pei. Cuticun midang pawl kan zirh awkmi thudik thawn thazaang a pe thei ding ih cuih thudik a eltu pawl ih palhnak khal a langter thei ding.
10Uk theih lomi tamzet an um ih cumi pawl cu Judah biaknak ihsin Khristian biaknak ih a ra lutmi sungin an tam cuang. Cupawl cu ṭong tam pawl an si ih thuphan thu in mi tampi an bum. 11Cupawl cu kham an ṭul; ziangahtile zirh lo dingmi an zirh ruangah innsang tampi an buaiter ih cutiih an zirhnak cu ningzakza a si mi paisa duhnak meen ruangah a si. 12Anmah Krete mi lala profet a si vemi in, “Krete mi cu thuphan per an si, ramsa bangtuk miṭha lo, zaangzel le mihrong an si,” a rak ti ih, 13cuti a timi cu a dikmi a si. Curuangah annih cu napi in kawk awla cuticun zumnak dik an nei ding. 14Culawng in Judah mi pawl ih neihmi thuanthu meenmeen le thudik a hnongtu pawl ih an rak kenmi milai ih thukham pawl kha zianghman ah an siar nawn lo ding. 15Mithiang pawl hrangah cun ziang hmuahhmuah hi a thiang ṭheh; sikhalsehla miborhhlawh le a zum lotu pawl hrangah cun, an thinlung a borhhlawh ruangah zianghman a thiangmi a um lo. 16Anmah cun Pathian theitu kan si an ti aw; sikhalsehla an ṭuan mi le an tuahmi in a zulhpeh lo. Mitkemza in an um, zianghman thu an ngai lo ih ziangvek thil ṭha tuahtu ding hmanah an tlak lo a si.
Currently Selected:
TITAS 1: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.