JOEL 1
1
Kharbok in Ramsung A Siatsuah
1Pethuel ih fapa Joel hnenah Bawipa ih simmi thu cu:
2Patar pawl, ngaihnik uh;
Judah ram sungih ummi pawl
theihnik uh;
Hi bangtuk hi nanmah nun sungah
a cang dah maw?
Nan pale sanah teh a cang dah
keel maw?
3Hi thu cu nan faale hnenah sim uh,
Cun annih in an faate hnenah
simsin ve hai seh.
Sankhat hnu sankhat ah simsin aw
vivo hai seh.
4Thing ngeet kharbok ih hlah
mi kha,
A burbur ih ummi kharbok in
an ei.
A burbur ih ummi kharbok ih hlah
mi kha,
A pet vivo mi kharbok in an ei.
A pet vivo mi kharbok ih hlah
mi kha,
Siatsuahtu kharbok in an
ei ṭheh.
5Nannih zuri pawl, tho uhla ṭap uh,
Sabitti intu pawl, sabit thawthaw
hrangah ṭap uh;
Ziangahtile an siat ṭheh zo a si.
6Kharbok bur in kan ram an siim;
An cak ngaingai ih siar cawk lo
an si.
An ha cu kiosa ha vek a si ih,
An tin tla cu kiosapi ih tin
vek a si.
7Ka sabit hri an siatsuah ṭheh,
Ka theipi kung cu an ngeetkiak
ṭheh ih hnah nei lo ah an tuah;
A rah an ei ṭheh,
a hawng an hawk ṭheh;
A hnge pawl cu raang ko in an
hiikfai ṭheh.
8Nannih minung pawl,
A pasal dingmi tlangval pa ih
thihsanmi fala nu a ṭah bangin,
Buri hnipuan hruk ih a ṭah
bangtuk in ṭap uh.
9Thawinak ih pek dingah sabit le
sangphut cu Bawipa ih inn ah
a um nawn lo.
Bawipa riantu nannih puithiam
pawl ṭap uh!
10Loram cu a siat ṭheh, leilung cu
riahsia in a ṭap.
Thlairawl an siat ṭheh,
Sabit an ro ṭheh ih
Olif in hriak a suah nawn lo.
11Lothlo pawl, nan riahsia uh,
Sabit tuamhlawmtu pawl,
riahsia in ṭap uh.
Sangvut le barli sangvut an um lo,
Rawl lak ding zianghman a um lo.
12Sabit hri an vuai ih
Theipi kung an caar.
Taleti kung, ung kung, epal kung
le thingkung dangdang tla
an ro ṭheh.
Minung hrangah lungawinak le
Thinnomnak a cem a si.
13Maw puithiam pawl,
biakṭheng ih hnaṭuantu pawl,
Buri hnipuan hruk in ṭap uh.
Biakinn ah feh uhla zanvar ṭap uh.
Nan Pathian pek dingah rawl le
Sabitti a cem ṭheh zo.
14Rawl ulh ni than uh,
Khawmnak thianghlim tuah ni ti uh!
Upa pawl ko khawm hai uhla
Ramsung minung pawl sawm
ṭheh uh.
Bawipa inn sungah ra tlaang uhla
Bawipa Pathian hnenah cun
ṭap uh.
15Cuih ni cu hreh a va um so!
Cuih Bawipa ni cu a nai thlang;
Cungnungbik hnen ihsin a nasa zet
mi siatsuahnak thawn a ra.
16Kan mithmuh rori ah rawl an
hlo ṭheh;
Kan Pathian inn ihsin lungawinak
le thinnomnak a cem ṭheh.
17Leilung a caar ih thlaici an
thi ṭheh.
Rawl retnak an siatral ṭheh,
Thlairawl ret ding a um nawn lo.
18Ṭilva pawl an ai an hruum,
Cawcang pawl an van a saang.
Ziangahtile ei ding hrampi a um lo;
Tuu run pawl khal in an tuar a si.
19Maw Bawipa nangmah ka lo ko;
Ziangahtile meisa in phuul ih
hrampi a kang fai ih,
Mei alh in hramlak ih thing
tiangin a kang fai a si.
20Asi, hramlak ih ramsa hman in
nangmah an lo hai nasa;
Ziangahtile tiva tete an caar ih,
Hrampi hmuahhmuah meisa in
a kang ṭheh a si.
Currently Selected:
JOEL 1: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.