JOEL 2
2
Bawipa Ni Ralrinnak Petu Kharbok Tla
1Zion ah tawtawrawt phaw uhla,
Pathian tlang thianghlim ah
ralrinnak dar tum uh.
Hi ramih a ummi hmuahhmuah
khur hai seh;
Ziangahtile Bawipa ih ni
a nai zo.
2Thimnak le khawdurnak ni,
Mero le suum ih a khah ni a si.
Tlang parah thimnak bangin
kharbok an ra;
Mi cakzet le mi nasazet ralkap
bangin.
Hi bangtuk cu khuahlan san ihsin
a um dah keel lo;
Hmailam san, san-i-khuk khalah
a um dah lo dingmi a si.
3Hmaituang meisa in ziang
hmuahhmuah a kang;
Dungṭang meisa hlio a alh
ringring.
An hmailam ih ram cu Eden hmuan
bangtuk a si;
An dunglam cu ramṭhing ah a cang,
An fehnak lamzin ah zianghman
a nung thei lo.
4To rang bangin a rualrual in
an ra;
Raldonak rang bangin hmaiah
an tlan.
5Rangleeng ke awn bangin an awn
durdo,
Tlang par ahcun an pet zohzo.
An thawmvang cu fangkuang
meisa kaang awn bangtuk a si.
Raldo ding ralkap bangin siar
cawk lo an si.
6An hmaiah mi hmuahhmuah an thin
a phang;
An mithmai a raam ṭheh.
7Ralṭha bik bangin hmaiah an nor,
Ralkap bangin phar ah an kai.
Anmah ih zawn cio in an feh,
An fehnak ding lamzin in zohman
an peeng lo.
8Pakhat le pakhat an pah-aw lo.
Hmailam ah cawl bang loin
dingtein an feh ih,
Zohman in an kham thei lo.
9Khawpi an thleng, phar ah an van;
Inn parah an kai ih
Fifir bangin tukvirh in an lut.
10An hmaiah leilungpi hi a khur,
Van khal khi a hnin;
Ni le thlapi an thim,
Arsi pawl an tleu nawn lo.
11 Bawipa ih thupeknak aw cu
a ralkap hmaiah khawri bangin
a ri durdo;
A ralkap cu an nasa ngaingai;
A tirhfialmi cu siarcawk lo an si.
Bawipa ih ni cu a nasa ih
tuksumza a si;
Zoso a tuar thei ding?
Bawipa In Sualsir Ding A Fial
12 Bawipa in, “Atu rori ah
Nan thinlung zatein rawl ul in,
Mitthli tla le riahsia in,
Ka hnenah ra kir uh.
13Nan hnipuan thlek loin nan
thinlung khuai sawn uh;
Cule ka hnenah ra kir uh,”
tiah a ti.
Bawipa nan Pathian hnen ahcun
ra kir uh;
Ziangahtile amah cu zaangfahnak
le lainatnak neitu a si;
A thin a fual ih a ṭunghmunmi
duhdawtnak in a khat;
Hrem a tummi khal a suup sal
ṭheu a si.
14 Bawipa nan Pathian in
a thinlung leet sal in,
Lo rawl tampi a lo thlawsuah tla
a si thei sokhaw.
Cutin sangphut le sabit thawinak,
a hnenah nan pe ding a si.
15Zion Tlangah tawtawrawt tum uh,
Rawl ul ding thu than uhla
misenpi pumkhawmnak tuah uh.
16Mipi kokhawm uhla khawmpi
sunglawi tuah uh.
Upa pawl ko uhla, nauhak pawl kha
kokhawm uh.
Asi, an ṭaang ih an cawimi naute
khal kokhawm uh.
Nupi ṭhitu tlangval a inn ihsin
ra suak seh;
Cun mothar khal a innkhaan sung
ihsin ra suak seh.
17 Bawipa ih hnaṭuantu puithiam
pawl cu Biakinn luhnak sangka le
biakṭheng karlak ah ding
tahrat in:
“Maw Bawipa, na minung pawl hi
zuah hram aw;
Ram dangmi pawl in hmuhsuam le
nautat in,
‘Khui-ah so nan Pathian cu a um?’
in ti hlah hai seh” tiah
thlacam in ṭap hai seh.
Pathian In Israel Ram A ṭhatter Sal
18Cule Bawipa in a ram zawn
a ruahnak a langter;
A minung pawl a lainat a si.
19An ṭahnak aw a thei ih an hnenah,
“Ngai uh, rawl le sabit le olif siti
ka lo pe hai ding ih,
Nan ei nan in ding ih nan tlai
zet ding.
Miphun tampi hmai ah mualpho in
Ka lo umter nawn lo ding.
20Saklam ralkap nan ṭihmi pawl cu
Nan hnen ihsin hlatpi ah
ka re ding;
Ramcaar le ramṭhing ah ka dawi
hlo hai ding;
An hmaituang pawl cu nisuahnak
tipi thi sungah,
Dungṭang ih fehtu pawl cu nitlak
lam tifinriat sungah,
Ka dawihlo ding.
An ruak thu le nam cu khua hlapi
a thleng ding;
Puarthau in thil a tuah ruangah!
21“Maw leilung, zianghman ṭih hlah,
na thla khal ṭem hlah;
Lungawi soparte in um aw.
Bawipa in mangbangza thil
a tuah zo a si.
22Hramlak ih ṭilva pawl,
nan thin phang hlah uh;
Nan tlannak hrampi cu a hring
ringring ding;
Thing an rah ding ih theipi le
Sabit khal an rah ngaingai ding.
23“Maw Zion mi pawl, thinnuam in
um uh;
Bawipa nan Pathian hnenah
nan lung awi uh.
Amah in nan ṭul zat in ṭhal ruah
a surter;
Thlatang ruah le ṭoruah thawn,
A hlan bangin a surter a si.
24Nan rawl ciilnak hmun cu rawl in
a khat ding ih,
Nan ralca beel pawl cu sabit le
olif hriak in a liam ding.
25Nan hnen ih ka run thlah mi
Thing ngeet kharbok,
a bur a bur ih ummi kharbok,
A pet vivo mi kharbok pawl ih
a eimi pawl cu ka lo ruul
sal hai ding.
26“Nan duhzat in nan ei ding ih
nan tlai zet ding;
Cutin Bawipa nan Pathian hmin cu
nan thangṭhat ding.
Nan hrangah mangbangza a tuah zo.
Ka minung pawl cu mualpho in
an um nawn lo ding.
27Israel mi lakih ka um kha nan
thei ding;
Bawipa Keimah lawng hi nan
Pathian ka si.
Pathian dang a um lo;
Ka minung pawl cu mualpho in
an um nawn lo ding.
Bawipa Ih Ni
28“Leh hnuah cun mi hmuahhmuah
parah ka thlarau ka burh ding;
Nan fapa le nan fanu pawl in,
profet bangin ka thu an phuang
ding.
Nan patar pawl in mang an man
ding;
Nan mino pawl in langnak an hmu
ding.
29Cutik ni ahcun salnu le salpa
pawl par tiangin ka thlarau
ka burh ding.
30“Van ah siseh lei ah siseh,
Thilmak zetzet ka langter ding.
Thisen le meisa le meikhu tom
an lang ding.
31Ni a thim ding ih,
Thlapi cu thi bangin a sen ding,
A nasazet le hreh a um zetmi
Bawipa ih ni a thlen hlan
deuh caan ahcun.
32Cutikah Bawipa ih hmin a kotu
hmuahhmuah cu runnak
an ngah ding.
Ziangahtile Bawipa ih a sim zo
vekin Zion Tlang ah a luatmi
an um ding;
Jerusalem ah a taangsun an um ding;
Bawipa ih kawhmi pawl cu!”
tiah a ti.
Currently Selected:
JOEL 2: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.