THUFIM 7
7
1Ka fapa, ka simmi hi ciing ringring awla,
Tuah dingih ka lo sim hi hngilh hlah.
2Ka sim bangin tuah awla na nung ding,
Ka lo zirhmi thu pawl kha na mitmu bangin kilkhawi aw.
3Ka lo zirh mi hi ciingkeng ringring awla,
Na thinlung sungah ngan aw.
4Fimnak cu ka farnu ti awla,
Theihfiangnak cu ka rualpi ṭhabik na si tiah ti aw.
5Mi nupi le mi bum hmang ṭongkam thiam nunau ihsin a lo humhim ding.
Nunau Sual
6Voikhat cu ka inn tukvirh ihsin lenglam ka cuan ih,
7Khawruah nei lo mi mino pawl lakah,
A aa deuh mi tlangval pakhat khi ka hmu.
8Amah cu cuih nunau ṭha lo umnak lampi kel lam ahcun a feh.
A inn kiang lam a hei pan rero.
9Zanlam khuathim hnuah a si.
10Cule nunau ṭha lo nu in a ra hmuak,
Cuih nunau nu cu hlawhhlang vekin a thuam aw.
11Amah cu ralṭha le ningzah nei lomi nunau a si,
Inn hluum rep loin a vak ringring ih,
12A caancaan ah lamkel kip le kotthler le thil zuarnak hmunin tlangval a bawh ṭheu.
13Tlangvalpa cu a rak pom ih a hnam, ningzak loin a zoh ih,
14“Tuihsun ah raithawinak ka tuah ih, thawinak sa khal ka nei a si.
15Curuangah nangmah hawl dingin ka ra suak ih atu-ah ka lo tong ngah zo.
16Ka ihkhun cu Izipt ram ih patzai puan mawi zet ka phah zo.
17Ka ihkhun cu mura, aloes le sinnamon#mura, aloes le sinnamon timi hi a rim a hmuimi thing thling a si ih fala-tlangval ngaiawknak hla ih an telh ṭheumi a si; cule inn khaan tla ah a rimhmui dingah an re ṭheu. rimhmui tla ka theh zo.
18Ra awla, zanvaarte nomnak ah kan ciah aw pei,
Pom aw in nuam tlang uhsi.
19Ka pasal cu inn ah a um lo,
Ram hlatpi ah khual a tlawng.
20Paisa zaal khat in a keng ih,
Thla thul hlan lo cu a ra tlung lo ding,” a ti.
21Duhnungza a ṭongkam thlumte thawn a leem ngah ih
A mi lom thiamnak in a hruai hlo.
22Cawcang in thahnak ding hmun a pan bangin le,
23Conkiang ih kah dingah zukneng in thang a pal bangin,
Cuih nunau nu cu a thlun.
Vate thang parih a fut bangin
A nunnak tuksumza a si kha a thei lo
24Curuangah ka fapa le tla, ngaihnik uh.
Ka lo sim mi thu hi ṭhatein ruat uh.
25Cuvek nunau ṭha lo lam kha nan thinlung pan ter hlah uh,
A dung khal thlun hlah uh.
26Amah ih ruangah mi tampi an siatral ih a thih ter zo a si.
27A inn ah nan feh a si ahcun mithi khua lamzin a si ih,
Thihnak khur sungih vungṭum bangtuk a si.
Falam Bible Revision © Bible Society of Myanmar, 2002.