THUFIM 4
4
Fimnak Ih Ṭhathnemnak
1Ka faale tla, nan pa ih a lo zirh mi pawl hi ṭhate in ngai uhla,
Theihthiamnak nan neih theinak dingah cing ṭha uh.
2Ka lo zirh mi cu a ṭhat ruangah cingkeng ring ring uh.
3Ka nu le ka pa ih fapa neihsun ka si ih,
Ka sentet lai ihsin,
4Ka pa in hiti in nun i sim, “Ka sim mi thu kha cingkeng ringring awla,
Ziangtik hmanah hngilh hlah aw.
Ka sim bangin tuah awla na nung ding a si.
5Fimnak le theihfiangnak kha la awla,
Ka simmi thu hi ziangsiar loin dungtun hlah.
6Fimnak kha tlansan hlah awla a lo kilveng ding,
Duhdawt awla himdamte in a lo humhim ding.
7Fimnak neih cu na tuah thei mi thil thupi bik a si,
Na neihmi hmuahhmuah hman man sehla fimnak cu nei aw.
8Fimnak cu duh awla a lo khaisaang ding,
Pomhnget awla upatnak a lo pe ding.
9Amah cu na lu parah a mawi mi pangpar rual a si ding ih,
Na sunlawinak sui lukhuh a si ding.”
10Ka fapa, ka thu hi ngai aw,
Ka sim mi hi thungai thlak in ruat awla na nunkhua a sau ding.
11Nundaan ṭha ka lo hmuh zo ih,
Fimnak tla ka lo zirh zo.
12Fimkhur zet ih na feh asile na lamtluan ah zianghman in a lo
kham thei lo ding ih,
Na tlan tik khal ah na bah lo ding.
13Na zir mi pawl hi kaihnget awla,
ṭhatein kilkhawi aw. Na nunnak a si.
14Mi ṭha lo pawl ih fehnak ah khan feh hlah aw;
Mi siava pawl ih nunzia kha cawng hlah.
15Tuah hrimhrim hlah! Mi ṭha lo pawl hnenin tlan awla,
Pialsan awla feh vivo aw.
16Misual pawl cu thilsual ziangtal an tuah lo ahcun an itthat thei lo,
Mi pakhatkhat tal an tuahmawh lo ahcun an ih a hmu lo.
17Sualnak cu saang bangin an ei ih,
Mi tuahmawhnak cu zu bangin an in.
18Sikhalsehla miding pawl ih lamzin cu,
Zing khawvang ihsin sun tiang a tleu sinsin mi tleunak bangtuk a si.
19Mi ṭha lo pawl lamzin cu zanthim bangtuk a si,
Ziang kan pal ih kan ril ti khal an thei lo.
20Ka fapa, ka lo sim mi thu hi ṭhatein ngai awla,
Ka ṭongkam hi ṭhatein thlun aw.
21Na hnen ihsin ziangtik hmanah hloter hrimhrim hlah,
Ciing ringring awla na lung sungah felte in ret aw.
22A theithiamtu hmuahhmuah hrangah an nunnak a si ih,
A hmutu hrangah an taksa harhdamnak a si.
23Ralringte in khua ruat aw,
Ziangahtile na ruah mi in na nunnak a siamrem ding.
24A dik lomi thu zianghman rel hlah,
ṭong hawizawng lo le thuphan va sim hlah.
25Hmailam dingtein zoh awla rinsan aw zet in feh aw;
Na ningzak in leisin bih aw hlah.
26Na tuah ding mi kha ṭhatein khuakhang cia awla,
Cutin na tuah mi pawl cu felte in na tuah suak vivo ding.
27Thil ṭha lo kha hrial awla hmailam ah dingtein feh aw,
Lamzin dik ihsin kal khat hman pial hlah aw.
Falam Bible Revision © Bible Society of Myanmar, 2002.