THUFIM 26
26
1Thangṭhat upatnak cu mi aa hrang
ah a kaih lo;
Khawṭhal caanih vur tla bangtuk le
rawl lak caanih ruah sur bangtuk a si.
2Tican nei lomi camsiatnak cu,
Sunṭam le vanva zuang bangin
umhmun an nei lo.
3Funghreu cu rang vuaknak ah,
Rang kakharh cu laak kakharhnak ah,
Fungfek cu mi aa vuaknak ah a si.
4Mi aa kha mi aa biak in bia hlah,
A lo biak daan vekin na biak ve
asile amah thawn nan bang
aw ding.
5Mi aa kha amah thawn kaih aw in
bia aw;
Cutiin na ti lo asile ka fim tiah
a ruat sual aw pang ding.
6Mi aa kha palai ih a thlahtu cu,
Amah le amah ke tan aw vek a si;
harnak a tong ding.
7Thufim cu mi aa pawl ih kaa ahcun,
A thlai-aw menmen mi ke-awl pa ih
ke bangtuk a si;
Zianghman ṭhathnemnak a nei lo.
8Mi aa upatnak pek cu saili ah
saihlum ṭawn cih bangtuk a si.
ṭhathnemnak a nei lo.
9Mi aa ih thufim ṭongṭhimnak
hman cu,
Zuri pa in a kut a suntu hling a
coih tum vek a si.
10Hnaṭuan petu bawi in a tawivak
mi zuri le mi aa a tonmi poh
hnaṭuan a pek ahcun,
Li le thal thawn mi a tuahmawh
rero mi a bang.
11A aatnak langter sal rerotu
mi aa cu,
Mah ih luak ei saaltu uico bangtuk
a si.
12Mah le mah ka fim tiih a ruat awtu
hnakin,
Mi aa bik hrangah ruahsannak a um
sawn.
13Mi zaangzel ziangah inn lengah a
suak duh lo? Ziang so a ṭih?
Kiosa maw a ṭih?
14Mi zaangzel cu sangka khar a
kopza ih a mer awk rero bangin,
A ihkhun parah a let aw rero men.
15Mihrek khat cu an zaangzel tuk ih,
An kaa sungih rawl san hman an
zuam lo.
16Mi zaangzel cu fimkhur zet in thu
a let theimi mifim pasarih hnakin,
amah ih ruahnak ahcun a fim sawn.
17Mah thawn a pehpar aw lomi
tawhawknak ih a teltu cu,
Amahte a fehtu uico ih hnakawr
kaitu bangtuk a si.
18-19Mi a bum ih, “Ka lo capoh men,”
a titu cu,
Mei-alh tom le conkiang hriamnam
thawn mi a tuahmawhtu mi molh
bangtuk a si.
20Zanthing a um lo a si le meisa
a mit;
A thupte in mi relsiat hmangtu a um
lo le tawhawknak a dai.
21Meihol in meiling a vaamter ih
Thing in meisa a alhter bangtuk in,
Mi tawh a hmangtu pawl in
tawhawknak an suahpi ṭheu.
22Mi a relsiatu ih ṭongkam cu
rawlthaw bangtuk a si;
Pum sung tiangin a lut vivo.
23Awkaa thlum a nei naón thinlung
ṭha lomi cu,
Mawizet ih hnihmi leibeel bangtuk a si.
24Mi huatnak a neitu cun awkaa ṭha
in mi a bia ṭheu;
Sikhalsehla a thinlung cu mi
bumnak in a khat.
25Mi zaangfah zet bangin a ṭongtu
khi va zum hlah;
Ziangruangah tile a thinlung cu
fihnungza thil in a khat.
26A thinlung sungih a ummi huatnak
cu bumnak in a khuh khalle,
A ṭhat lonak cu mizapi in an hmu
thotho ding.
27Midang tlaknak dingah khur a laitu
cu cuih khurah amah a tla ding;
Midang nennak dingah lung a hriltu
cu cuih lungin amah a nen ding.
28Thuphan sim a hmangmi lei in
bumnak a tuartu kha a hua;
A hrokhrawl mi kaa in siatsuahnak
lawng a suahpi.
Falam Bible Revision © Bible Society of Myanmar, 2002.