MIPUM SIARNAK 34
34
An Ram Ih Ramri
1 Bawipa in Moses hnenah 2Israel mi pawl hrangah a tanglam thu pawl cu a pek: “Kanaan ram nan luh tikah nan ramih ramri pawl cu a tanglam bangtuk in a si ding. 3Thlanglam nan ramri cu Zin nelrawn in a thok pei ih Edom ramri in a feh ding. Tipi Thi thlanglam kap nisuahnak lam a thleng ding. 4Cun Akrabbim Tlangkawn lamah a vung suk pei ih Zin in a feh ding ih Kadesh Barnea tiang thlanglam ah a vung ding. Cule saklam nitlaknak lamah Hazar Addar ah a so ding ih Azmon tiang a feh ding. 5Cutawk ihsin Izipt ramri tiva lamah a her-aw ding ih Mediterranean Tifinriat ah a net ding.
6“Nitlaklam ramri cu Mediterranean Tifinriat a si ding.
7“Saklam ramri cu Mediterranean in Hor Tlang tiang a feh pei ih, 8cutawk ihsin Hamath Tlangkawn tiang a feh pei. Cule Zedad le, 9Zifron tiang a feh pei ih Hazar Enan ah a net ding.
10“Cun nisuahlam ramri cu Hazar Enan in Shefam tiang dingtein a feh ding. 11Cuih hnu ah Ain in nisuahnak lamih a ummi Harbel ah a vung suk ding ih cutawk in Galilee Tili nisuahnak lam kamih tlang ah a vung ding ih, 12Jordan Tiva thlun in thlanglam ah Tipi Thi tiang a suk ding. Himi pawl cu nan ram kimvelih ramri an si ding,” a ti.
13Cun Moses in Israel mi pawl hnenah, “Hi ram cu Bawipa in nanmah hrin hrin kua le a hrek pawl hnenih a lo pekmi ram a si ih camcawhfung zukin nan co dingmi ram a si. 14Reuben le Gad hrin pawl le Manasseh hrin a hrek pawl cu, 15Jordan Tiva ih nisuahnak lam Jerikho khatlam ralah an innsang ciarin ram an zem-aw zo a si,” tiah a ti.
Ram Zem Ding Hotu pawl
16 Bawipa in Moses hnenah, 17“Puithiam Eleazar le Nun ih fapa Joshua in ram zem-awk cu ṭuanvo an lak ding. 18Cule anmah bawmtu dingah hrin khat in hotu pakhat fingfing hril awla, 19a tanglam bangtuk in la aw:
Judah hrin in Jefunneh ih fapa Kaleb,
20Simeon hrin in Ammihud ih fapa Shelumiel,
21Benjamin hrin in Khislon ih fapa Elidad,
22Dan hrin in Jogli ih fapa Bukki,
23Josef tefa Manasseh hrin in Efod ih fapa Hanniel,
24Efraim hrin in Shiftan ih fapa Kemuel.
25Zebulun hrin in Parnak ih fapa Elizafan,
26Issakhar hrin in Azzan ih fapa Paltiel,
27Asher hrin in Shelomi ih fapa Ahihud,
28Naftali hrin in Ammihud ih fapa Pedahel,” tiah a ti.
29Hi hotu pawl cu Kanaan ram ah Israel mi pawl hrangih ram zemtu dingah Bawipa ih fialmi an si.
Currently Selected:
MIPUM SIARNAK 34: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
