MIPUM SIARNAK 32

Jordan Ih Nisuahnak Lam Ummi Pawl

(Daan 3.12-22)

1Reuben le Gad hrin pawl cu ṭilva tampi an nei. An ṭilva hrangah Jazer le Gilead ram pawl cu ramṭha an si kha an hmuh tikah, 2Moses le puithiam Eleazar le Israel hruaitu pawl hnenah an ra ih, 3“Hi ram sung um Ataroth, Dibon, Jazer, Nimrah, Heshbon, Elealeh, Sebam, Nebo, le Beon khua pawl, 4Bawipa bomnak ih Israel mi pawl in kan luahmi khua pawl hi ṭilva hrangah ram ṭhazet an si. Kannih le ṭilva tamzet nei kan si fawn. 5Curuangah in zaangfah uhla hi ram hi kan co dingah in zem hram uh. Jordan Tiva khatlam ralih um dingah Jordan Tiva cu in tanter hram hlah uh,” tiah an dil.

6Cutikah Moses in Gad le Reuben hrin pawl hnenah cun, “Nan unau Israel mi pawl raldo dingih an feh laiah nannih pawl hitawk ah maw a um nan tum? 7Bawipa ih a pekmi ram sungih lut lo le Jordan Tiva tan lo dingin ziangtinso Israel mi pawl cu an thin nan nauter ngam? 8Atuih nan tuahmi vekin nan pa le pawl in hi ram thlingthla dingih Kadesh Barnea in ka thlah hai tikah an rak tuah zo. 9Annih in Eshkol Phairawn tiang an feh ih ram cu an ra zoh. Asinain an kir tikah Bawipa ih a pekmi ramih feh tum loin Israel mi pawl ih thinlung cu an derdaiter thluh a si. 10Curuangah Bawipa cu cuih ni ah a thin a heng ih, 11‘Ka parih rinsannak an neih lo ruangah Izipt ram ihsin a suakmi sungin kum kul le a tlunlam mipa hmuahhmuah cu Abraham, Isaak le Jakob hnenih ka tiam ciami Kanaan ramah zohman an thleng hrimhrim lo ding,’ tiah siatcam in thu a kam zo a si. 12Bawipa hnenih rinsannak a neitu Keniz mi Jefunneh ih fapa Kaleb le Nun ih fapa Joshua siar lo, midang hmuahhmuah cu Bawipa ih camsiatmi sungah an tel ṭheh a si. 13Israel misenpi parah Bawipa cu a thin a heng ih Bawipa a lungawi lotertu pawl an thih thluh hlanlo kum sawmli sung thlaler ramṭhing lakah vakvai in a tuah hai a si. 14Cule atu-ah nannih santhar misualral pawl, Israel mi parah tuar ding ṭha lo Pathian ih thinhengnak thlengter sal dingin nan pupa pawl ih can-ai nan awh ve a sihi! 15Nannih Reuben le Gad hrin pawl, atu-ah Bawipa ih dungthlun nan duh lo ngaingai a si ahcun hi Israel misenpi pawl hi Bawipa in hramlakah hin a dungtun lala hai ding ih siatsuah thluh an si ding ih nanmah hi mi siatsuahtu nan si ding,” a ti.

16Cutikah annih in Moses cu an dil sal ih, “Kan tuu pawl hrangah lungto in hruang kan kulh pei ih kan fanau pawl hrangah kulhmi khawpi pawl kan din hmaisa pei. 17Cuih hnuah kan unau Israel mi pawl thawn raldo tlang dingah kan timtuah pei ih an luah ding ram kan lak thluh hlanlo kanmah ih hmaihruai vekin kan ral pawl cu kan do pei. Cutiih kan do sungah kan fanau pawl hitawk kulhmi khawpi sungah an rak um pei ih hitawk ramih a rak ummi miphun pawl ih siatsuahnak an tuar lo pei. 18Israel hrin pawl in an co dingmi ram an luah thluh hlanlo kan ram le kan khua ah kan kir lo ding. 19Hitawk Jordan Tiva ih nisuahnak lamah hin kan covo kan ngah zo ruangah Jordan khatlam ralah kannih in zianghman Israel hrin dangdang pawl lakah covo kan la lo ding,” tiah an ti.

20Cule Moses in an hnenah, “Nan simmi hi nan thinlung ngaingai a si ahcun atu ihsin Bawipa ih mithmuh ah raldo dingin nan tim tuah uh. 21Nan ralkap zatein pakhat hman hrelh loin Jordan Tiva nan tan pei ih Bawipa ih ho in ral cu nan do pei. Bawipa in kan ral a neh thluh hlanlo le, 22ram a lak ṭheh hlanlo nan do pei. Cuih hnu Bawipa ih hnenah le nan unau Israel mi pawl ih parah nan ṭuanvo nan ṭheh hnu lawngah nan kir thei ding. Cuticun Jordan Tiva in nisuahnak lam hitawk ram hi Bawipa in nan ta dingah a hngetter ding. 23Sikhalsehla nan thutiammi nan thlun lo a si ahcun, atu ihsin thei cia uh, Bawipa ih parah misual nan si ding. Kan theih ual lo, tiah ti leh hlah uh. Nan sualnak in a lo hawl suak thotho ding a si. 24Curuangah nan khawpi pawl cu din uhla nan tuu pawl hrangah hruang cu kulh uh. Cun nan kam awk vekin tuah suak rori uh,” a ti.

25Cule Gad le Reuben hrin pawl cun, “Bawipa, na thupekmi vekin kan tuah pei. 26Kan nupi le kan faate pawl le kan caw le kan tuu pawl cu hitawk Gilead ram khawpi pawl ah hin an rak um ko pei. 27A dang hmuahhmuah cu Bawipa ih ho in raldo dingah kan timtuah thluh a si. Na ti bangtuk in Jordan Tiva cu kan tan ding ih ral kan do ding,” tiah Moses cu an ti.

28Curuangah Moses in Eleazar, Joshua, le Israel hruaitu dang pawl hnenah cun thu a pek ih, 29“Gad le Reuben hrin pawl in Jordan Tiva an tan ih Bawipa ih ho in raldo dingah an feh ih, anmah ih bomnak in ram cu nan neh ṭheh a si ahcun an co dingah Gilead ram cu pek uh. 30Sikhalsehla annih in Jordan Tiva an tan loih nanmah hnenah ral an do lo a si ahcun nanmah vek thotho in Kanaan ramah an covo cu an ngah ve ding,” tiah a ti.

31Cutikah Gad le Reuben hrin pawl cun Moses hnenah, “Bawipa Pathian ih thupekmi bangtuk in kan tuah ding. 32Amah ih hmaiah hriamnam thawn Kanaan ram ahcun kan feh ding ih kan do ding; sikhalsehla Jordan Tiva ihsin nisuahnak lam hi ram hi cu kanmah ih covo thotho in a um ding,” an ti.

33Curuangah Moses in Amor siangpahrang Sihon le Bashan siangpahrang Og pawl ih ram hmuahhmuah cu, a kiangkapih khua le ram pawl thawn, Gad le Reuben hrin pawl le Manasseh hrin a hrek pawl hnenah a pek. 34Gad hrin pawl in pharih kulhmi Dibon, Ataroth, Aroer, 35Atroth Shofan, Jazer, Jogbehah, 36Beth Nimrah, le Beth Haran khawpi pawl cu an din sal. An tuu hrangah hruang tla an sak. 37Cule Reuben hrin pawl in Heshbon, Elealeh, Kiriathaim, 38Nebo, Baal Meon (hi khua hmin cu an thleng), le Sibmah khawpi pawl cu an din sal. An din salmi khawpi pawl cu hmin thar an pek thluh.

39Cun Manasseh fapa Makhir hrin pawl in Gilead ram an do ih an luah hnuah cuih ramih a ummi Amor mi pawl cu an dawihlo. 40Curuangah Moses in Gilead ram cu Makhir hrin pawl hnenah a pek ih cutawkah an um. 41Manasseh hrin Jair in khawte pawl a do ih a lak hnuah Jair Khawte pawl tiah hmin an pek. 42Nobah khal in Kenath khua a do ih a kiangkap khawte pawl thawn a lak ih amah ih hmin suangin Nobah tiah hmin a sak.

Currently Selected:

MIPUM SIARNAK 32: FCL

Highlight

Copy

Compare