MIPUM SIARNAK 17
17
Aaron Ih Kianghrol
1 Bawipa in Moses hnenah, 2“Israel mi pawl sim awla hrin khatah kianghrol pakhat ciar in kianghrol hleihnih lo pe hai seh. An kianghrol parah an hmin ciar ngan awla, 3Levi hrin kianghrol parah Aaron ih hmin ngan aw. An hrin hotu pakhat hrangah kianghrol pakhat ciar a si pei. 4Cuih kianghrol pawl cu ka umnak Puanthlam sung, ka lo ton ṭheunak Thukam Kuang hmaiah ret aw. 5Cule ka hril mipa ih kianghrol cu a cerh ding. Cuticun Israel mi pawl ih phunzai ringringnak hi ka kham thei ding,” tiah a ti.
6Curuangah Moses cun Israel mi pawl cu a sim ih an hotu ciar in kianghrol pakhat ciar, hrin hleihnih hrangah kianghrol hleihnih, Moses an pek. Aaron ih kianghrol khal a tel ve. 7Moses in kianghrol hmuahhmuah cu Puanthlam sung, Bawipa ih Thukam Kuang hmaiah cun a ret.
8A thaisun ah Puanthlam sungah Moses cu a lut ih Levi hrin ai-awhtu Aaron ih kianghrol a cerh kha a hmu. A cerh lawng si loin a mum hnuah a par ih almon#17.8 Almon rah: timi cu Mekei rah a bangmi a si. a hminmi almon rah a rah. 9Cutikah Moses in kianghrol zatein a lak ih Israel mi pawl hnenah a hmuh. Cutiih thil a cangmi an hmuh hnuah hotu pawl cun anmah an ta ciar an lak sal. 10Bawipa in Moses hnenah, “Aaron ih kianghrol cu Thukam Kuang hmaiah ret sal aw. An phunzainak an baan lo ahcun mi dodaltu Israel mi cu an thi ding, tiih ralrin ternak ah ret ringring ding a si,” a ti. 11Bawipa ih thupek vekin Moses cun a tuah thluh.
12Cule Israel mi pawl cun Moses hnenah, “Kan cem a si. Kan thi cem thluh ding a si ko. 13Puanthlam kiangih a ra menmenmi a thih ahcun kan cem riai a si. Pakhatte hman taang loin maw kan cimih thluh ding!” an ti.
Currently Selected:
MIPUM SIARNAK 17: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
