MIPUM SIARNAK 10

Ngun Tawtawrawt

1 Bawipa in Moses hnenah, 2“So ih sutmi ngun tawtawrawt pahnih na tuah pei ih Israel mi pawl pumkhawm kawhnak ah le riahhmun ṭhawn ding thannakah na hmang pei. 3Tawtawrawt a pahnih in rei zet an phawt tikah misenpi an zatein ka umnak Puanthlam luhnak sangka ah an ra pumkhawm ding. 4Asinain tawtawrawt pakhat lawng an phawt a si ahcun an hrin ciarih hotu pawl lawnglawng na hnenah an ra ding. 5Cun ringzet le tawizet ih tawtawrawt an phawt tikah nisuahnak lamih a riakmi hrin pawl an ṭhawn pei. 6Cule cubangtuk thothoin a voihnihnak ringzet le tawizet ih an phawt asile thlanglam ih a riakmi hrin pawl an ṭhawn pei. Curuangah riahnak ṭhawn ding ahcun ringzet le tawizet in tawtawrawt an phaw pei ih, 7misenpi tongkhawm ding ahcun reizet in an phaw ding. 8Tawtawrawt cu Aaron fapa puithiam pawl lawnglawng in an phaw pei.

“A tanglamih daan pawl cu hmailamah nan tesinfa pawl tiang an thlun dingmi an si. 9Nan ram sungih a lo neh-nentu ral pawl nan do tikah hi tawtawrawt pawl hi raldo tawtawrawt phawtin nan phaw pei. Bawipa nan Pathian keimah in ka lo bawm ding ih nan ral pawl ih kut ihsin ka lo run ding. 10Cun lungawi tikcu, thla thar caan ih nan Thla Thar Puai pawl le nan biaknak puai dangdang pawl hrangah siseh, mei-ur thawinak le remnak thawinak nan pek tik khalah siseh, hi tawtawrawt pawl cu nan phaw pei. Cuticun ka lo bawm hai ding. Keimah hi Bawipa nan Pathian ka si,” tiah a ti.

Israel Mi An Riahnak An ṭhawn

11Israel mi pawl Izipt ram in an suah hnu kum hnihnak a thla hnihnak#10.11 thla hnihnak: timi hi Hebru ṭong in Ziv an ti ih April thlahrek le May thlahrek a ceem. ni kul ni ah Bawipa umnak Puanthlam tlunih mero cu a kiang ih, 12Israel mi pawl cu Sinai nelrawn ihsin an suak. Cule Paran nelrawn an thlen in mero cu a cawl.

13Moses hnenih Bawipa thupekmi bangtuk in Israel mi pawl cu an ṭhawn a si. 14Riahnak an ṭhawn tinin, Judah thantaar hnuai ih a ummi hmuahhmuah cu hmaisabik ah an feh; Judah hrin pawl hotu cu Amminadab fapa Nahshon a si. 15Issakhar hrin pawl hotu cu Zuar ih fapa Nethanel a si ih, 16Zebulun hrin pawl hotu cu Helon ih fapa Eliab a si.

17Cun Puanthlam cu an ṭhet ih Gershon le Merari hrin pawl in an phur ih midang bangin an pok ve.

18Cuih hnuah Reuben thantaar hnuai ih a ummi pawl an feh. Reuben hrin pawl hotu cu Shedeur ih fapa Elizur a si. 19Simeon hrin hotu cu Zurishaddai ih fapa Shelumiel a si ih, 20Gad hrin hotu cu Deuel ih fapa Eliasaf a si.

21Cule Kohath hrin, thilri thianghlim pawl a phurtu cu an pok ve ih riahhmun an khuarnak an va thlen tikah cun Puanthlam cu din cia in a rak um zo.

22Cuṭhehin Efraim thantaar hnuai ih a ummi pawl an feh. Efraim hrin hotu cu Ammihud ih fapa Elishama a si, 23Manasseh hrin hotu cu Pedahzur ih fapa Gamaliel a si ih, 24Benjamin hrin hotu cu Gideoni ih fapa Abidan a si.

25Neta bikah Dan thantaar hnuai ih a ummi pawl cu dunglamih ral kiltu-ah a bur a bur in an feh. Dan hrin hotu cu Ammishaddai ih fapa Ahiezer a si. 26Asher hrin hotu cu Okhran ih fapa Pagiel a si ih, 27Naftali hrin hotu cu Enan ih fapa Ahira a si. 28Israel mi pawl an riahnak an ṭhawn ih a bur a burih an fehdan cu cuticun a si.

29Moses in Midian mi a pu Reuel ih fapa, a nupi ih ṭapa Hobab hnenah, “Bawipa in pe dingih in tiammi ram ah kan feh thlang ding. Bawipa in Israel mi cu mineinung zet dingih tuah dingin thu in kam zo; curuangah kan hnenah ra ve awla kan lennak cu kan lo hlawm ve ding,” tiah a ti.

30Hobab cun, “Ka ra lo ding; ka ram le ka miphun hnenah ka kir sawn ding a si,” tiah a sawn.

31Cutikah Moses in, “In tlansan hram hlah aw. Hramlak ramṭhing kan thlen tikah riahnak hmun ṭha na thei sawn ding a si. Curuangah in hruai theitu na si ding. 32Kan hnenih na rat asile Bawipa ih in pekmi thlawsuahnak hmuahhmuah cu nangmah thawn kan hlawm aw ding a si,” tiah a ti.

Misenpi An Feh

33Israel misenpi cu, tlang thianghlim Sinai tlang cun an pok ih ni thum ban khual lamhla-ah an feh. Bawipa ih Thukam Kuang cu an hmaiah a rak feh ih colhnak hmun a rak hawl. 34An riahnak hmun pakhat in pakhat ih an ṭhawn tikah Bawipa ih mero cu sunvu an tlunah a um ringring.

35Cun Thukam Kuang cu riahhmun ihsin a ṭhawn tinte in Moses in, “Maw Bawipa, tho awla na ral pawl cu ṭhekdarh thluh hai aw; a lo huatu pawl cu na hmai ihsin tlanhlo thluh hai seh,” tiah a ti ṭheu. 36Cule Kuang a colh tinin, “Maw Bawipa, Israel mi a thawng le a za hnenah hin ra kir hram aw,” tiah a ti ṭheu.

Currently Selected:

MIPUM SIARNAK 10: FCL

Highlight

Copy

Compare