NEHEMIAH 9
9
Senpi Pawl In An Sual An Phuang
1Cuih thla ni kul hluanli ni ah Israel mi pawl cu hmunkhat ah an tong-aw khawm ih an sualsirnak langternak ah rawl an ul; buri puan an sin ih an lu ah leivut an phulh. 2Ramdang mi thawn rawi-aw loin hlimphir in an um. Cule an ding ih anmah le an pupa pawl ih sualnak cu an phuang. 3Nazi pathum sung Bawipa an Pathian ih Daan an siarmi cu an ngai ih cuih hnu nazi pathum sung an sual phuangin Bawipa an Pathian an biak.
4Levi mi pawl hrangah donhleisang an don ih cuih parah Jeshua, Bani, Kadmiel, Shebaniah, Bunni, Sherebiah, Bani le Khenani pawl an ding ih ringzet in Bawipa an Pathian ih hmin an ko.
5Cule Levi mi Jeshua, Kadmiel, Bani, Hashabneiah, Sherebiah, Hodiah, Shebaniah, le Pethahiah in biak kawhnak ah hiti in an saal:
“Ding uhla Bawipa nan Pathian
cu thangṭhat uh,
Kumkhua in kumkhua tiang amah cu
thangṭhat uh,
A hmin sunglawi cu mikip in
thangṭhat uh,
Milai thangṭhatnak cu a kim lo
naón mi kipin thangṭhat uh,”
an ti.
Cule Israel pawl cu hiti in thla an cam:
6“Maw Bawipa, nangmah lawng
Bawipa na si,
Van le arsi pawl khi nangmah
in na tuah.
Nangmah in lei le tipi le a sung
ummi hmuahhmuah na tuah ṭheh.
Ziang hmuahhmuah nunnak na pek,
Van ih a ummi hmuahhmuah in
nangmah cu kuun in an lo bia.
7 Bawipa Pathian, nangmah in
Abram na hril,
Babilon ram Ur khua in na ko;
A hmin cu Abraham ah na thleng.
8Rinsan tlak ih na hmuh ruangah,
Amah thawn thukamnak na tuah.
Kanaan ram pek dingah thu na kam,
Hit mi, Amor mi le Perez mi pawl
Jebus mi le Girgash mi ram cu;
A tesinfa pawl umnak ramah na ti.
Na thukamnak bangin na kimter,
A dingfel mi na si ruangah.
9“Izipt ramih kan pupa pawl
an tuar zia cu na hmu,
Tipi Sen ah bomnak an lo dil mi
cu na thei;
10Faro dodal in khawruahhar
mangbangza na tuah,
A kuthnuai bawi pawl le a ram
minung pawl dodal in,
Na minung pawl an hrem tuk hai
ruangah.
Culai ah na rak neh ih,
Atu khal ah na hmin a thang.
11Tipi satcat in na minung hrang
lamzin na tuah,
Leiro par in na hruai hai.
A duumtu pawl cu tipi thuuk
sungah an tla,
Tipisuar lakih lungto pil bangin.
12Sun ah khawdur in na hruai hai,
Zan ah an lamzin cu meifar na van.
13Sinai Tlang parah van ihsin
na rung ṭum tikah,
Cutawkah na minung pawl hnenah
na ṭong,
An hnenah daan ṭha le thudik
zirhnak na pek.
14Sabbath ni thiangter dingah
na zirh ih,
Na siahhlawh Moses hnenin na daan
pawl na pek.
15“An ril a rawn tikah van ihsin
sang na run thlak,
An ti a haal tikah lungpi sungin
an in ding tidai na suahter.
An thlennak ding ram cu luah
dingah na sim,
An hnenih pek dingih na tiam
cia mi ram cu.
16Asinain kan pupa pawl cu an hngal
ih an lung a ruh,
Na thupekmi thlun an duh lo.
17Na thu an thlun duh lo ih
na thil tuahmi an hngilh ṭheh;
Mangbangza na tuah mi pawl cu
an ciing nawn lo.
An hngalnak thawn hotu an hril,
Izipt saltaannak ih kirpi dingah.
Asinain nang cu mi ngaithiamtu
Lainatu Pathian na si,
Zaangfahnak le duhdawtnak na nei,
Na thinheng a fuung ngaingai.
Na thinpemnak cu a tum ngaingai,
Na dungtun siang hai lo a si.
18Cawcang pian in khawzing lem
an siam,
Izipt ram ihsin in suahtu pathian
a si an ti;
Bawipa, ziangtlukin so an lo
hmuhsuam hi!
19Sikhalsehla nelrawn ahcun
na hnongta hai lo,
Na zaangfahnak a tum ruangah.
Khawdur le meisa cu na lak kir
siang lo,
Sunzan in an lam hmuhtu pawl cu.
20Na ṭhat ruangah an tuah ding
mi na sim,
Manna in na cawm hai,
An in dingah tidai na pek.
21Kum sawmli sung nelrawn ah,
An ṭulmi hmuahhmuah na pek ṭheh,
An hnipuan a ṭet dah lo,
An ke tla naa in a thling dah lo.
22“Ram tampi le miphun tampi
na nehter,
An ram kiangkap ih ram pawl cu.
Sihon ukmi Heshbon ram an neh,
Og Siangpahrang a ṭuannak
Bashan ram tla.
23Van arsi zat in tesinfa na pek,
Ram na nehter ih na luahter;
An pupa hnenih na tiam ciami
an luah dingmi ram cu.
24Kanaan ram cu an lak;
A rak ummi pawl na neh ṭheh;
Na minung pawl hnenah an duhmi
tuah theinak huham na pek,
Kanaan ram Siangpahrang pawl le
an minung pawl parah cun.
25Na minung pawl cun kulh mi
khawpi pawl an lak,
Ram ṭha le tikhur laih cia tla,
Sumpai in a khat mi inn pawl,
Olif kung, thingrah kung le sabit
hmuan pawl thawn.
An duhzat in an ei ih an thau,
Na pekmi thilṭha lakah an nuam
ngaingai.
26“Cu cingin na minung pawl cu
ral an tho,
Na thu an thlun duh lo,
Na Daan pekmi an dungtun.
Na thu zirhtu profet pawl an that,
Ralrinnak petu le na hnen ra kir
dingih thusimtu pawl cu.
An lo hmuhsuam hi a nasa ngaingai.
27Curuangah an ral kut sungah
na thlenter ih,
Annih in an uk ih an hrem hai.
An vansaan tikah na bomnak duh ah
an lo ko,
Van in an aunak aw na run thei.
Na mi zaangfahnak a tum ruangah,
An hnenah hotu pawl na run thlah,
An ral kut sung in runtu dingah.
28Hnangamnak an hmuh tikah cun
an sual sal,
An ral kut sungah na thlenter sal.
Asinain an sual an siirih nunnak
an lo dil tikah,
Van ihsin na run thei ih,
Avei siarcawk lo na run hai a si;
Na zaangfahnak a tum ruangah.
29Na thupekmi thlun dingah
ralrinnak na pek,
Asinain puarthau in na daan cu
an hnong;
Na Daan thlun cu nunnak lamzin
a si ko naón!
Lungruh le thulungkhen nei in
an thlun duh talo.
30Kumkhat hnu kum khat lungsau in
ralrinnak na pek hai,
Na profet pawl in an sim rero nan,
Na minung pawl cu an hna a seet.
Curuangah na minung pawl cu
Miphun dang pawl in an uk.
31Sikhalsehla na zaangfahnak
a tum ruangah,
Na hnong loih na siatsuah hai lo;
Nang cu zaangfahnak le thinpemnak
neitu Pathian na si!
32“Maw Pathian, Ziangkimtithei
Pathian,
ṭihnungza le ziangzongza tuah
theitu Pathian;
Na thukam mi cu famkimzet in
na kimter ṭheh.
Assiria Siangpahrang pawl ih
in hrem thokin,
Tuihsun tiang kan tuar mi hi,
Thu-tenau ah in ruahsak hram
hlah aw.
Kan siangpahrang pawl le
kan hotu pawl,
Kan puithiam le kan profet pawl,
Kan pupa pawl le kan mi senpi
pawl ih an tuarmi,
Hi tluk kan tuarmi hi run theisak
hramhram aw.
33In hrem ṭheu hi na dik ko,
hrem tlak kan si;
Nang cu rintlak na si, kannih
kan sual a si.
34Kan pupa le kan siangpahrang
pawl thokin,
Kan hotu pawl le kan puithiam
pawl tla in
Na Daan cu an thlun lo a si.
Na thupekmi le na ralrin pekmi cu,
An ngai duh hrimhrim lo.
35Na thlawsuah peknak thawngin
Siangpahrang in na minung an uk.
Na pekmi ramkau le ramṭha sung
an um lai ahcun.
Asinain sualnak sungin an kir loih
Na hna cu an ṭuan lo a si.
36Atu ahcun in pekmi ram sungah
sal ah kan cang,
Ei in ding in petu hih ramṭha
sungah hin.
37Kan ram sungin a suak mi
hmuahhmuah cu,
Siangpahrang hnenah a feh ṭheh;
Kan sual ruangah kan tlunih
na retmi bawi hnenah cun.
Kanmah siseh, kan rannung siseh,
an duhduh in in tuah,
Kan van a sang ngaingai,”
tiah an ti.
Lungkimnak Ca An Ngan
38Kan parih thil a cangmi pawl ruangah hin, kannih Israel mi pawl hin atu-ah ca ngan in lungkimnak cakhen kan tuah ih kan hotu pawl, kan Levi mi pawl le kan puithiam pawl in a parah an hmin an khen.
Currently Selected:
NEHEMIAH 9: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
