NEHEMIAH 11

Jerusalem Ih A Ummi Pawl

1Hotu pawl cu Jerusalem khawpi ah an um; misenpi sungin innsang pahra sungah pakhat cu Jerusalem ih um dingah camcawhfung an zuuk ih, a dang hmuahhmuah cu khawdang le khawte sungah an um. 2Jerusalem khawsungah keimah ka um pei tiah lungkimte ih a ti theitu pawl cu misenpi pawl in an lawm ngaingai. 3Israel misenpi, puithiam pawl, Levi mi pawl, Biakinn saktu pawl le Solomon hnen-um pawl ih tesinfa pawl cu khua dang le khawte sungah anmah ih leiram ciarah an um.

Judah peng sungin Jerusalem ih a ummi upa hminthang deuh pawl cu a tanglam pawl hi an si:

4Judah hrin sungin Jerusalem ih a ummi pawl:

Uzziah ih fapa le Zekhariah ih tu Athaiah. A pupa dang pawl cu Amariah, Shefatiah le Mahalalel an si ih Judah ih fapa Perez ih tesinfa an si.

5Baruk fapa le Kolhozeh ih tu Maaseiah. A pupa dang pawl cu Hazaiah, Adaiah, Joiarib le Zekhariah an si ih Judah ih fapa Shelah ih tefa sin an si.

6Perez ih tesinfa sungin mi hminthang zali sawmruk le pariat Jerusalem ah an um.

7Benjamin hrin sungin Jerusalem ih a ummi pawl:

Meshullam ih fapa le Joed ih tu Sallu. A pupa dang pawl cu Pedaiah, Kolaiah, Maaseiah, Ithiel le Jeshaiah an si.

8Sallu sungkhat Gabbai le Sallai.

An zate-ah Benjamin innsang sungin zakua kul hluanriat Jerusalem ah an um. 9Zikhri ih fapa Joel cu an hotu a si ih Hassenuah ih fapa Judah cu Jerusalem khawsung ih bawi upa bik sangtu a si.

10Jerusalem ih a ummi Puithiam pawl:

Joiarib ih fapa Jedaiah le Jakhin.

11Hilkiah ih fapa le Meshullam ih tu Seraiah. A pupa dang pawl cu Zadok, Meraioth le Puithiam Sang Ahitub an si. Ahitub cu Biakinn zohtu upa a si. 12An zate-ah an hrin sungin zariat le kul hluanhnih cu Biakinn ih hnaṭuantu an si.

Jeroham ih fapa le Pelaliah ih tu Adaiah. A pupa dang pawl cu Amzi, Zekhariah, Pashhur le Malkhijah an si. 13An zate-ah an hrin sungin zahnih sawmli le pahnih cu innsang hotu pawl an si.

Azarel ih fapa le Ahzai ih tu Amashsai. A pupa dang pawl cu Meshillemoth le Immer an si. 14An hrin sungin za le kul hluanriat cu ralkap hminthangzet an si. An hrin sungih upa Zabdiel cu an hotu a si ih Haggedolim fapa a si.

15Jerusalem ih a ummi Levi mi pawl:

Hasshub ih fapa le Azrikam ih tu Shemaiah. A pupa dang pawl cu Hashabiah le Bunni an si.

16Biakinn lengah hnaṭuan neitu Levi mi hminthang Shabbethai le Jozabad.

17Mika ih fapa le Asaf tesinfa Zabdi ih fapa sin Mattaniah; lungawi thlacamnak hla an sak tikah Mattaniah cu hla hruaitu a si.

Mattaniah bawmtu Bakbukiah.

Shammua ih fapa le Jeduthun tefa sin Galal ih fapa sin Abda.

18An zate-ah Jerusalem khua thianghlim sungah Levi mi zahnih sawmriat le pali an um.

19Biakinn kiltu Jerusalem ih a ummi:

Akkub, Talmon, le a sungkhat pawl za le sawmsarih le pahnih.

20A dang Israel mi pawl, puithiam le Levi mi dangdang pawl cu Judah ramsung khawpi le khawte sungah anmah ih leiram ciarah an um. 21Biakinn tuamhlawmtu pawl cu Jerusalem khua Ofel vengah an um ih an hotu cu Ziha le Gishpa an si.

22Jerusalem ih a ummi Levi mi pawl hotu cu Bani ih fapa le Hashabiah ih tu Uzzi a si. A pupa dang pawl cu Mattaniah le Mika an si ih Asaf hrin an si. Asaf hrin pawl cu Biakinn khawm tikah hla satu an si. 23Hrinkhat hnu hrinkhat nitinte Biakinn ih hlasak cu a haha teih sawng aw dingah Siangpahrang ih thupeknak a um.

24Judah phun, Zerah hrin, Meshezabel ih fapa Pethahiah cu Persia siangpahrang zungah Israel mi pawl ih palai a si.

Khua Dangdang Ih Ummi Pawl

25Mi tampi cu an lothlawhnak kiangih khua ah an um. Judah hrin pawl cu Kiriath Arba khua, Dibon leh Jekabzeel khua le an kiangkap ih khawte pawl ah an um. 26Cule Jeshua khua, Moladah khua, Bethpelet khua le 27Hazarshual khua tla ah an um ih Beersheba khua le a kiangkap khawte pawl ah an um. 28Ziklag khua le Mekonah khua le a kiangkap khawte ah an um. 29Enrimmon khua, Zorah khua, Jarmuth khua, 30Zanoah khua, Adullam khua le an kiangkap khawte pawl ah an um. Lakhish khua le a kiangih an thlawh mi lo ah le, Azekah le a kiangih khawte pawl ah an um. Cuticun Judah mi pawl cu thlanglam Beersheba ihsin saklam Jerusalem khua kiang Hinnom Phairawn tiang, khua kipah an um.

31Cun Benjamin hrin pawl cu Geba khua, Mikmash khua, Ai khua, Bethel khua le a kiangkap khawte ah le 32Anathoth khua, Nob khua, Ananiah khua, 33Hazor khua, Ramah khua, Gittaim khua, 34Hadid khua, Zeboiim khua, Neballat khua, 35Lod khua, Ono khua le Zungthiam Phairawn ah an um. 36Judah ram sungih a rak ummi Levi mi hrekkhat pawl cu Benjamin mi pawl thawn hmunkhatah an umter.

Currently Selected:

NEHEMIAH 11: FCL

Highlight

Copy

Compare