MARKA 9

1Thungai in ka lo sim: hi tawkih a ummi mi ṭhenkhat pawl hi Pathian Uknak huham thawn a ra thlen an rak hmuh hlan lo an thi lo ding,” tiah a ti.

Jesuh Hmuihmel Thlengnak

(Mat 17.1-13; Luk 9.28-36)

2Ni ruk hnuah Jesuh in Piter le Jeim le Johan cu a fehpi ih tlang parah anmah lawng a kaipi. An mit hmuhah Jesuh cu a hmuihhmel a thleng aw; 3a hnipuan cu a tleu in a tleu ih milai in ziangtluk hmanin sawp hai sehla cutluk cun a vaar thei dah lo ding. 4Cule dungthluntu pathum cun Elijah le Moses thawn Jesuh cu bia aw rero in an hmu. 5Piter in Jesuh hnenah, “Sayapa, hitawk kan um cu a va ṭha so! Deubuk pathum in kan sak pei; na hrangah pakhat, Moses hrangah pakhat, cule Elijah hrangah pakhat,” tiah a ti. 6Ziangahtile Piter le a rualpi pawl cu an thin a phang tuk ih ziang ṭong ding dang an theih lo ruangah a si.

7Cuih hnuah mero a ra zaam ih an tlun ihsin a run khuh ṭheh, cule mero sung ihsin, “Himi cu ka duhdawtmi ka Fapa a si, amah ih thu nan ngai pei,” tiah a ti. 8A dungthluntu pathum cun an kiangkap an zoh rero naón zohman an hmu lo; Jesuh lawng an kiangih a um kha an hmu.

9Tlangpar ihsin an rung ṭum laiah Jesuh in, “Milai Fapa hi thihnak ihsin ka thawhsal hlan cu nan hmuhmi hi zohman nan sim lo pei,” tiah thu a pek.

10Cuih a thupekmi cu an thlun; asinain, “Thihnak ihsin thawhsal,” timi cu ziang a si pei? tiah pakhat le pakhat an sut aw rero. 11Cule Jesuh cu, “Ziangah so Daanthiam pawl in Elijah a ra hmaisa ding, an ti?” tiah an sut.

12Jesuh cun, “Ziang hmuahhmuah timtuah ṭheh dingah Elijah cu a ra taktak ding. Asinain ziangah so Ca Thianghlim in ‘Milai Fapa cu nasa zetin a tuar ding ih a hnon tla an hnong ding,’ tiah a ti? 13Thungai in ka lo sim: Elijah cu a ra zo ih, Ca Thianghlim ih a sim vekin minung in an duhduh in an tuah zo,” tiah a ti.

Ramhuai Polhmi Nauhak A Damter

(Mat 17.14-20; Luk 9.37-43a)

14Dungthluntu dang pawl hnen an vung thlen tikah an kiangkap in mitampi in an kulhvel ih Daanthiam hrekkhat pawl le dungthluntu cu thu an el awk rero kha an hmu. 15Misenpi in Jesuh kha an hmuh tikah an mang a bang ngaingai ih va hmuak dingah an tlan ciamco. 16Jesuh in a dungthluntu pawl cu, “Anmah thawn ziangthu so nan el awk rero?” tiah a sut.

17Misenpi lakih mi pakhat in, “Sayapa, ka fapa na hnenah ka rak hruai sokhaw; ziangahtile ramhuai in a polh ih ṭong khal a ṭong thei lo. 18Ramhuai in a polh tikah cun, leilung ah a hlon aw ih a cil buanra a suak ih a hacang rial tahratin a pumpuluk a ṭhong ṭheh ṭheu. Cuih ramhuai dawisuak dingah na dungthluntu pawl ka sim naón zianghman an ti thei lo,” tiah a ti.

19Jesuh in an hnenah, “Maw zumnak nei lo minung pawl! Nan hnenah ziangtik tiangso ka um hrih ding? Ziangtik tiangso ka lo zawi hrih hai ding? Nauhakpa cu ka hnenah rak keng uh,” tiah a ti ih 20Jesuh hnenah cun an ratpi.

Ramhuai in Jesuh a hmuh vete in nauhakpa cu a dirhcaih ih leilung ah a tlu, a let aw tualto ih a ka ihsin buanra a suak ciamco. 21Jesuh in, “Hitiih a sinak hi a rei zo maw?” tiah a pa cu a sut.

A pa in, “A seentet lai ihsin a si zo. 22Voi tampi ramhuai hin that dingin meisa lak le tidai sungah a paih ṭheu. Na tuah theimi a si ahcun in zaangfah awla in bawm hram aw,” tiah a ti.

23Jesuh in, “Na tuah theimi a si ahcun, na ti. A si! Zumnak neitu hrangah cun ziang hmuahhmuah a cang thei a si,” a ti.

24Cupa cun hmakhatte ah, “Ka zum a si; ka zum kim lonak i bawm aw,” tiah a au ciamco.

25Jesuh cun misenpi in a kiangah an ra fuk vivo ti a hmuh tikah ramhuai kha thu a pek ih, “Hnaset le ṭong thiam lo thlarau siava, hi nauhak pa sung ihsin suak awla lut sal nawn hlah, tiah thu ka lo pek,” tiah a ti.

26Ramhuai cu a hruum ih nauhak pa kha dircai phah in a thlukta ih a sung ihsin a suak. Nauhak pa cu mithi a bang ih mi tampi in, “A thi zo,” tiah an ti. 27Asinain Jesuh in nauhak pa cu a kut in a vun dirh ih a hung ding.

28Jesuh cu inn sungah a lut ih dungthluntu pawl in a thupte in, “Ziangah so kannih hmuah in kan dawi thei lo?” tiah an sut.

29Jesuh in, “Thlacamnak dah ti lo, thildang zianghman in hi bangtuk cu a dawi thei lo ding,” tiah a sim.

A Thihnak Ding Thu A Sim Sal

(Mat 17.22-23; Luk 9.43-45)

30Jesuh le a dungthluntu pawl cu cutawk ihsin an pok ih Galilee peng tan phah in an feh. Jesuh in a dungthluntu pawl thu a zirh vivo ruangah midang zohman in a umnak thei dingah a duh lo. 31Ziangtin a zirh tile: “Milai Fapa hi mi kut ah an thlen ding ih an that ding. Asinain ni thum hnuah a tho sal ding,” tiah a ti.

32Sikhalsehla cuti ih a zirhmi cu an thei thei lo. A suh le an sut ngam fawn lo.

Zoso A Tum Bik

(Mat 18.1-5; Luk 9.46-48)

33Kapernaum khua an thleng ih inn sungih an luh hnuah Jesuh in a dungthluntu pawl cu, “Lamzin ah ziangthu so nan el awk rero kha?” tiah a sut.

34A thu suhmi cu zohman in an let lo, ziangahtile lamzinih an el awkmi cu anmah lakah zoso a tum bik ti a si. 35Jesuh cu a to ih dungthluntu hleihnih a ko ih an hnenah, “A tum bik si a duhtu cu mi nauta bik a si hmaisa ding ih mi hmuahhmuah riantu a si pei,” tiah a ti. 36Cule nauhak pakhat a ko ih an hmaiah a dinter. Nauhak pate cu Jesuh in a kuah ih an hmaiah a dinter hnuah, 37“Zokhal sisehla ka hmin in hi bangtuk nauhak a cohlangtu cu keimah i cohlang a si; cule keimah i cohlangtu cu keimah i thlahtu khal a cohlang a si,” tiah a ti.

In Dodal Lotu Cu Kanlam ṭang A si

(Luk 9.49-50)

38Johan in, “Sayapa, na hmin in khawsia a dawisuaktu mi pakhat kan hmu ih kan lak ih tel vemi a si lo ruangah kan khamta,” tiah a ti.

39Jesuh in, “Kham hlah uh! Ziangahtile ka hmin in mangbangza a tuahtu cun i simsia lo ding. 40Ziangahtile in dodal lotu cu kanmah lam ṭang a si. 41Thungaite in ka lo sim: Ka minung nan si ruangih tidai khuat khat a lo petu cu ṭhatman a ngah tengteng ding,” tiah a ti.

Sualforhnak Thu

(Mat 18.6-9; Luk 17.1-2)

42Jesuh in, “Zokhal sisehla hi bangtuk nauhakte pawl pakhatkhat keimah i rinsannak ihsin a pialtertu cu a hngawng ah fangcang rialnak lungtum thlaih tahratin tifinriat sungih thlak a hrangah a ṭha sawn a si. 43Curuangah na kut in na zumnak a lo pialter a si ahcun na kut cu tan aw! Na kut pahnih thawn a mit dah lomi hell meisa sungih na tlak hnak cun kut pakhat lawng thawn nunnak sungih na luh a ṭha sawn.#9.43 Kut ngan cabu hrekkhat ahcun 9:44, ‘Anmah a eitu tholung cu an thi dah loih anmah a kangtu meisa cu a mit dah lo,’ tiin an beet (Mat 9:48 ah zoh). 45Cule na ke in na zumnak a lo pialter a si ahcun na ke cu tan aw. Na ke pahnih thawn hell sungih tlak hnak cun ke pakhat lawng thawn nunnak sungih na luh a ṭha sawn.#9.45 Kut ngan cabu hrekkhat ahcun 9:46, ‘Cutawkah anmah a eitu tholung cu an thi dah lo ih anmah a kangtu meisa cu a mit dah lo,’ tiah an beet. 47Cule na mit in na zumnak a lo pialter a si ahcun na mit cu phorh suak aw. Mit pahnih thawn hell sungih tlak hnak cun mit pakhat lawng thawn Pathian Uknak sungih na luh a ṭha sawn. 48Cutawkah ‘anmah a eitu tholung pawl cu an thi dah lo ih anmah kangtu meisa khal a mit dah lo a si.’

49“Thawinak sa cu ci in thianfaiter a si vekin mi hmuahhmuah cu meisa in thianfaiter thluh an si ve ding.

50“Ci cu a ṭha. Sikhalsehla a alnak a ziam asile ziangtinso na alter sal thei nawn ding?

“Ci bangtuk in a ṭha mi pawlkomnak nei uhla pakhat le pakhat rualremte in um uh,” tiah a ti.

Currently Selected:

MARKA 9: FCL

Highlight

Copy

Compare