MIKAH 7
7
Israel Ih Nuncan ṭhat Lozia
1A va poi so! Rilrawng zetin thingkung parah thingrah hawl ih zianghman a ngah lotu le sabit hri parah sabit rah hawl ih a tong lotu ka bang. Theipi rah thawthaw le sabit rah hmuahhmuah cu an rak lo ṭheh zo. 2Hi ram sungah hin mifel pakhat hman an um lo; Pathian rinsantu pakhat hman an um lo. Mi thahnak tikcu lawng an bawh. Pakhat le pakhat zuarthlai aw dingin an bawh aw fingfing a si. 3Thil ṭha lo tuahnak lam ahcun rintlak hlir an si. Hotu bawi le thuṭhentu pawl in nawhthuh an dil. Thil tithei pacang pawl in an duh mi an sim ih cuticun thil ṭha lo cu an rel tlang. 4An lakih miṭha bik hman hling vek a si ih mifel bik an timi cu so bangtuk a si.
Profet hmangin Pathian in ralrinnak a sim zo bangin a minung pawl a hremnak tikcu a ra thleng ding. Atu-ah an buai celcel zo. 5Na inn hnen khal rinsan hlah; na rualpi khal zum hlah. Na nupi hnenih na ṭongmi hman ralring aw. 6Cuvek tikcu ahcun fapa pawl in an pale pawl cu mi aa ah an ruat ding ih, fanu pawl in an nule pawl cu an dodal ding. Mo pawl cu an ni thawn an to aw ding ih zozo khal an ral cu anmah ih innsungsaangmi an si ding.
7Sikhalsehla kei cun Bawipa ka thlir ding. Thlangamtein i runtu Pathian cu ka hngak ding ih amah in i hum ding. Ka Pathian cun ka aw a ngai ding.
Bawipa In Runnak A Ratpi
8Kan ral pawl in kan parah direm ding zianghman an nei lo. Kan bah zo, asinain kan thosal ding. Thimnak sungah kan um, asinain Bawipa in tleunak in pe ding. 9Bawipa ih parah kan sual zo ih tikcu tawkfang sung cu a thinhengnak kan tuar ding. Sikhalsehla a netnak ahcun amah in in ṭan ding ih kan tlunih thil dik lo an tuahmi cu dingnak thawn thu a ṭhen leh ding. Khawtleu ah amah in in suahpi ding ih in runnak kha kan hmu ding. 10Cutikah kan ral pawl, “Bawipa nan Pathian cu khuiah so a si?” ti ih in nautat rerotu pawl in an hmu ding ih ningzak in an um ding. Kan ral pawl an sung ding ih lamzin ah ciarbek bangih palcih an si kha kan hmu ding.
11Maw Jerusalem mi pawl, nan khawpi sak salnak tikcu a ra thleng zik thlang. Cuih tikcu caanah nan ram cu kauhter sinsin a si ding. 12Nan minung pawl khuazakip in nan hnenah an ra kir ding: Nisuahnak lam Assiria ihsin, thlanglam Izipt ram ihsin le lam hlatzet tifinriat le tlang saangpipi ihsin an ra kir ding. 13Asinain cuih leiram pawl cu a parih umtu pawl ih sualnak le ṭhat lonak ruangah ramṭhingah a cang ding.
Bawipa In Israel A Zaangfah
14Maw Bawipa, na hrilmi na minung pawl hi tuu bangin na kianghrol thawn khal hai aw. An kiangkap ram pawl cu ram ṭha zetzet an si naón annih ih umnak cu ramṭhing a si ih cutawkah anmah lawng an um. Ram ṭhatnak Bashan le Gilead ah feh hai sehla hlanlaipi ih an rak um bangin khopkham in um sal hai seh.
15Maw Bawipa, Izipt ram ihsin in suahpi lai caan ih na rak tuah bangin kan hrangah mangbangza tuah hram aw. 16Miphun dang pawl in cumi cu an hmuh tikah ziangtluk ih micak an si hmanah an ning a zak ding. Beidong in an hmur an hup ding ih an hna an phit ding. 17Leivut lakah rul bangin an vak ding; leilung ih a vakmi cucik kharbok bangin! An ral ṭannak ralhruang ihsin khur thlohthlo in an ra suak ding. Ṭihnak thawn Bawipa kan Pathian hnenah an kir ding.
18Maw Bawipa, nangmah vek Pathian zoso a um! A taangsun na minung pawl cu an sualnak na ngaidam a si. Kumkhua in na thin a heng lo; a hmunmi na duhdawtnak cu an parah na langter ringring. 19Atu khalah kan parah zaangfah lainatnak na nei sal ko ding. Kan sualnak cu na ke tangah na pal ding ih tifinriat ih tawne ah na hlonhlo ding. 20Khuahlan laiah kan pupa Abraham le Jakob hnen ih thu na rak kam cia bangin an tesinfa, na minung Israel mi hnenah cun rinsan tlak na sizia le a hmunmi na duhdawtnak cu na langter ding a si.
Currently Selected:
MIKAH 7: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.