PUITHIAM HNAṬUANNAK 20

Thungailotu Pawl Cawhnak

1Israel mi hnenih than dingin, 2Bawipa in Moses hnenah hiti in a sim, “Nanmah lakin siseh, nan lakih a um ramdangmi pawl lakin siseh, Molek khawzing#20.2 Molek khawzing: timi hi Kanaan ram a rak luah hmaisatu pawl ih biakmi khawzing hmin a si ih siangpahrang tican a si. Nauhakte mei-ur thawinak pek tahrat in an biakmi a si. biaknak ah a sungsuak fa a petu cu Israel mipi in lungto in den that a si pei. 3Molek khawzing hnenah a fa a pek ih ka Puanthlam a borhhlawhter ih ka hmin thianghlim a thangsiat ruangah amah cu ka hnong pei ih ka minung ah ka siar nawn lo ding. 4Sikhalsehla Israel miphun pumpi in cupa ih tuahnak cu an umsan men ih that loin an zuah a si ahcun, 5cupa le a sungkhat hmuahhmuah cu ka hnong ding. Cuih tlunah Molek khawzing biaknak ah cupa hnenih a telmi hlawhhlang phun pawl hmuahhmuah cu keimah hrimhrim in ka hnong ding a si. Cupawl cu ka minung ah ka ruat nawn lo ding.

6“Mithi thlarau a kothiamtu pol le tinzoh thiam pawl a lengtu cu keimah in ka hnong pei ih ka miphun sungah ka siarcih nawn lo ding. 7Tithianghlim aw uh; ziangahtile keimah cu Bawipa nan Pathian ka si. 8Ka daan thlun uh, ziangahtile Bawipa ka si ih a lo thianghlimtertu cu Keimah ka si,” a ti.

9Cuih tlunah a tanglamih daan pawl hi Bawipa in an hnenah a pe. A nu siseh, a pa siseh a camtu cu thah a si pei; a nu le a pa a camsiat ruangah a sualnak thisen cu amah ih lu parah a thleng a si.

10Mi pakhat in midang nupi a sualpi ahcun ṭaangṭawm sualnak a tuahtu nu-le-pa an pahnih in thah an si pei. 11A pa ih nupi pakhatkhat a sualpitu cu a pa a mualphoter ruangah an pahnih in thah an si pei. Anmah ih sual ruangah an thi a si. 12A fapa ih nupi a sualpitu pa cu a sualpimi nunau thawn thah an si pei. Sungkhat sualpi tahrat in thil borhhlawh an tuah ruangah an thih cu an sual man a si. 13Mipa pakhat cu a dang mipa pakhat thawn an pawl-aw a si ahcun thil fihnung an tuah ruangah an pahnih in thah an si pei. Anmah ih sual ruangah an thi a si. 14Mi pakhat in nupi a ṭhit ih a nupi ih nu khal a ṭhit fawn a si ahcun thil borhhlawh an tuah ruangah an pathum in meisa in ur that an si pei. Hi bangtuk cu nan lakah nan umter lo pei. 15Mipa pakhat in ṭilva a pawl a si ahcun amah le cuih ṭilva cu thah an si pei. 16Nunau pakhat in ṭilva pawl ding a zuam ih an pawl-aw a si ahcun amah le cuih ṭilva cu thah an si pei. Anmah ih sual ruangah an thi a si.

17Mipa pakhat in a farnu, a si lole a farnuseu a ṭhit a si ahcun misenpi hmaiah ningzak le mualpho in tuah an si hnuah Israel mipi sung ihsin dawihlo an si pei. A farnu a sualpi ruangah hremnak a tuar a ṭul a si. 18Nunau pakhat nunau daan a neih laiah mipa pakhat in a pawl a si ahcun, thil thiangfai le thiangfai lo hrangih daan a ummi an buar ruangah Israel mipi sung ihsin an pahnih in dawihlo an si pei.

19Mi pakhat in a ni a sualpi a si ahcun thil fihnung an tuah ruangah an pahnih in hremnak an tuar pei. 20Mi pakhat in a paseu ih nupi a sualpi a si ahcun a paseuih hmin a siatter ruangah an pahnih in hremnak an tuar pei; fa nei loin an thi pei. 21Mi pakhat in a unau ih nupi a ṭhit ahcun rocotu fa nei loin an thi ding. A thiangfai lomi thil a tuah ih a unau hmin a siatter a si.

22 Bawipa in, “Ka lo thlenpinak hi ram hin a lo hnon lonak dingah ka daan le ka thupekmi hmuahhmuah cu thlun uh. 23Hi ram nan luah theinak dingah hi ram ihsin ka dawimi khawvel pawl ih cin le daan cu thlun ve hlah uh. An thlunmi thil ṭha lo pawl in i ning tuk zo a si. 24Sikhalsehla hi ram, cawhnawi le khuaitizu a luannak ram cu nan luah dingah ka lo kam zo vekin nan hnenah ka lo pe ko ding. Keimah cu Bawipa nan Pathian ka si ih miphun dang pawl thawn rawi loin um dingah nannih cu a hrante ih ka lo retmi nan si. 25Cuti a si ruangah vate siseh, ṭilva siseh, a thiangfaimi le thiangfai lomi cu feltein thiatdan nan thiam pei. A thiangfai lomi vate le ṭilva cu nan ei lo pei. Sathiangfai lo ka ti zomi an si ih nan ei asile mi thiangfai lo ah nan cang ding. 26Mi thianghlim nan si pei ih keimah lawngih ta nan si pei; ziangahtile keimah cu Bawipa ka si ih a thianghlimmi ka si. Keimah lawngih ta nan sinak dingah ramdangmi pawl thawn rawi loin a dangte ih ka lo retmi nan si.

27“Mipa siseh, nunau siseh, thimi thlarau a kotu pol le dawi thiam pawl cu lungto in den that an si pei; hibangtuk a tuahtu cu amah ih sual ruangah a thi a si,” tiah a ti.

Currently Selected:

PUITHIAM HNAṬUANNAK 20: FCL

Highlight

Copy

Compare