PUITHIAM HNAṬUANNAK 18

Khammi Nupa Pawl awknak

1-2Israel mi pawl hnenih sim dingin Bawipa in Moses hnenah, “Keimah cu Bawipa nan Pathian ka si. 3Nan rak um dahnak Izipt ram milai pawl ih nuncan vekin nan nung lo pei; cule ka lo thlenpi dingmi Kanaan ram milai pawl ih umtlandan vek khal in nan um lo pei. 4Keimah ih daan nan thlun pei ih ka thupekmi nan tuah pei. Keimah cu Bawipa nan Pathian ka si. 5Tuah dingih ka lo fialmi pawl nan tuah pei ih thlun dingih ka lo pekmi daan pawl nan thlun pei; cutiih nan tuah asile nan nung ding. Keimah cu Bawipa ka si,” a ti.

6Cule Bawipa in a tanglam daan pawl hi an hnenah a pe. Zokhal mahih sungkhat thawn nupa sualnak nan tuah lo pei. 7Na nu thawn sual tahratin na pa ih ningzah mualphonak tuah hlah. Na nu rori a si ih a thang siatter hlah. 8Na pa ih nupi dang pawl thawn sual tahratin na pa ih mualphonak tuah hlah. 9Inn khatih khuasa mi nan si ah siseh, nan si lo khal ah siseh, na farnu a si lole na farnu-ei sualpi hlah. 10Na tunu sualpi hlah; na mualphonak a si ding. 11Na farnuseu sualpi hlah; na farnu a si ve. 12-13Na ni a si lole na nu le na pa ih unau sualpi hlah. 14Na paseu ih nupi thawn sual hlah; na nu a si ve. 15Na fapa ih nupi thawn sual hlah. 16Na mo thawn sual hlah. Na unau ih thisa a si. 17Na sualpimi nunau ih fanu a si lole a tunu thawn sual hlah; na sungkhat an si ve ih cubangtuk cu thil borhhlawh ngaingai a si. 18Na nupi a nun sung hmuahhmuahah na nupi ih unau cu nupi-ah ṭhi hlah.

19Nunau daan a neih lai caanah nunau va pawl hlah; ziangahtile mi thiangfai lo a si. 20Midang ih nupi va sualpi hlah; ziangahtile mithiang lo ah na cang ding. 21Molek khawsia biaknak ah na fa va pe hlah; ziangahtile Bawipa Pathian ih hmin siattertu-ah a cang ding. Keimah lawng Bawipa a si. 22Zovek mipa a si khalle a dang mipa thawn sual hlah seh; cuvek cu Pathian ih huatmi a si. 23Mi pa siseh nunau siseh ṭilva thawn nan sual lo pei; cutiih nan borhhlawh asile mithiang lo nan si.

24A tlunih khammi pawl hi tuah tahratin mithiang lo ah canter-aw hlah uh. Hi ram nan thlen hlanih a rak umtu khawvelmi pawl in a tlunih khammi pawl an tuah ruangah mi thiangfai lo ah an cang a si. Curuangah nannih in an umnak nan luah theinak dingah Bawipa in a dawi hai. 25An tuahmi ruangah an ram tiangin ram thiangfai lo ah a cang. Curuangah Bawipa in a hrem hai ih an ram khal a hnong a si. 26-27Hi bangtuk fihnungza thil an tuah ih an ram cu an baalter thluh zo. Sikhalsehla nannih cun Bawipa ih daan le thupekmi pawl nan thlun pei ih Israel mi siseh, nan lakih um ramdangmi siseh, zokhal in hi bangtuk thil sual cu nan tuah lo pei. 28Cutiih nan thlun asile nan hlanih a rak ummi khawvelmi pawl a hnon vek cun nannih cu hi ram ihsin a lo hnong hai lo ding. 29Hi bangtuk thil borhhlawh le thil fihnung pawl a tuahtu cu Pathian miphun ah siarcih a si nawn lo pei, ticu nan thei.

30Cule Bawipa in, “Ka thupekmi pawl cu thlun uh; hi ram nan thlen hlanih a rak ummi pawl ih nuncan cu thlun hlah uh; an nuncan thlun tahratin mi borhhlawh ah cang-awter hlah uh. Keimah cu Bawipa nan Pathian ka si,” tiah a ti.

Currently Selected:

PUITHIAM HNAṬUANNAK 18: FCL

Highlight

Copy

Compare