ṬAHHLA 2
2
Bawipa In Jerusalem A Hrem
1 Bawipa in Zion cu thimnak in
a khuh;
Bawipa a thin a heng ruangah.
Israel ih sunlawinak cu,
Van ihsin lei ah a run thlak;
A Biakinn pi hman a dungtun,
A thinheng ni ahcun.
2Judah ram khawte hmuahhmuah
a siatsuah ṭheh,
Zawnruahnak zianghman um loin.
An ralhruang pawl a balsak ṭheh,
An ram hum in an ṭannak
ruhkulh pawl cu.
Ningzah mualphonak a thlenter,
An uknak le uktu pawl parah
cun.
3Israel cahnak a sattan ṭheh,
A thin-ai a thawh tikah cun.
A pharh cia a baan a zuuk sal,
Ral pawl ih in ra do tikah cun.
Meisa alh bangin kan parah
a hlio ciamco,
Ziang hmuahhmuah
a siatsuah ṭheh.
4A conkiang in kanmah in bat,
Ral pawl ih in bah vekin.
Amah in a that ṭheh hai,
Kan hmai in hngaltertu
hmuahhmuah cu.
Hi Jerusalem khawpi sungah hin,
A thinhengnak mei alh bangin
kan tuar.
5 Bawipa in Israel a tisiat ṭheh zo,
An do ral lian bangin.
Hnawmpen ah a cangter ṭheh zo,
An ruhkulh le an siangpahrang
inn pawl cu.
Cem neilo riahsiatnak a thlenter zo,
Judah misenpi parah cun.
6Sop seksek in a deengkuai theh,
Amah kan biaknak Biakinn pi cu.
Kan ulhmi ni pawl a cemter,
Sabbath ni le ni thianghlim
pawl cu.
Siangpahrang le puithiam pawl
khal in an tuar,
Tuar harzetmi a thinhennak cu.
7 Bawipa in a biakṭheng a hnong zo,
A Biakinn thianghlim hman
a tlansan.
Ral pawl a balsiatter ṭheh,
Biakinn phar pawl cu.
An ral nehnak an aupi ciamco,
Lungawi in Pathian kan rak
biaknak hmun ahcun.
8 Bawipa in siatter dingah a tum
hrimhrim,
Zion kulhnak phar pawl cu.
A hlan in a rak tah cia ṭheh zo,
Siat ṭheh dingah a ui
hrimhrim lo.
Hmunkhatah hnawmpen ah an
cang ṭheh zo;
Donhleisang inn pawl le
a phar pawl cu.
9A kotka pawl hnawmpen sungah
an pil ṭheh;
A kothrolh pawl tla an kiak
ṭheh.
Salkaihmi thawng thlaknak ah
an thleng ṭheh,
Siangpahrang le bawi upa
pawl cu.
Daan cu zohman in an zirh
nawn lo;
Bawipa hnen in langnak an ngah
nawn lo, profet pawl cun.
10Jerusalem patar pawl cu,
Leilung ah dai zirziar in an to.
An lu ah vutcam an phulh aw,
An ruangpi ah buri puan an
khuh aw.
Jerusalem fala pawl cu,
Lei dai in an lu an kun.
11Ka ṭahnak ah ka mit a kham ṭheh,
Ka donhar ah ka thin a pit ṭheh;
Ka riahsia in ka tha a celh ṭheh,
Ka minung pawl vanduainak an
ton ruangah.
Nauhak le naute pawl khawpi
lamzin ih an sawn an rilh
ruangah.
12Tihal le rilrawng in,
An nu le pawl an ṭah.
Lamzin parah cun an ril,
Ral hmapu bangin.
Nuamtete in an nunnak a cem,
An nule pawl ih ṭaang parah cun.
13Maw duhnungza Jerusalem,
Ziang so ka ṭong nawn ding?
Ziangtizawng in so ka lo hneem
thei ding?
Nang vekih a tuartu hi an um
keel lo.
Na hma hi tipithuanthum tluk in
a thuk;
Zoso a lo damter thei ding?
14Na profet pawl in lo sim ding an
nei lo, thuphanper dah
ti lo cu!
An thusimmi in an lo bum,
Na sualnak an phuang dah fawn
si lo!
Thudik lo an lo sim ruangah,
Sirawknak ṭul lo ah na ruat-aw.
15Na kiangih a fehtu pawl in,
Hmuhsuam nautatnak thawn
an lo zoh.
An lu an thing ih an lo hnihsan,
Jerusalem siatralnak cu.
“Hihi maw khawpi mawi bik
an timi cu?
Leilung pumpi ih hmaihngalpimi
cu hihi maw a si?” an ti.
16Na ral pawl in an lo nautat,
Huatnak mit thawn an lo zoh.
An hmur ciip in an lo hnihsan,
“Kan siatsuah ṭheh zo,
Kan hngakhlapmi ni cu hihi
a si,” an ti.
17 Bawipa in a tisuak ngaingai zo,
Ka tuah ding a rak ti ringring
vekin.
Zaangfahnak nei loin in tisiat
ṭheh zo,
Ralrinnak in rak pek cia vekin.
Nehnak a pek hai,
kan ral pawl hnenah;
Lungawinak a pek hai,
kan siatral ṭheh ruangah.
18Maw Jerusalem, Bawipa hnenah,
Nangmah kulhnak phardawl rori
hi au hai seh.
Na mitthli cu sun zan in,
Tiva bangin luang hai seh.
Na hrangah colh ni um hlah seh,
Na mitthli khal hul ni nei
hlah seh.
19Zanvarte tho cingcing awla,
Bawipa cu ko cingcing aw.
Bawipa ih hmaiah na thinlung
natnak cu tidai bangin
luangter aw.
Na faate pawl hrangah baan pharh in
zaangfahnak dil aw;
Lamzin kel kipih a thi zikmi na
faate pawl,
Rawl loih a thi ṭheh zikmi na
faate pawl hrangah cun.
20Maw Bawipa, zohhnik,
Na hrem reromi pawl hi zohhnik.
Nunau pawl in an faate sa an ei,
An duhdawtmi an faate pawl cu!
Puithiam le profet pawl an that,
Biakinn pi sung rori ahcun.
21Mino mitar ti loin an thi,
Khawpi lamzin ahcun.
Fala le tlangval khal an thi,
Ral pawl ih ralnam cun.
Zaangfahnak nei loin na that hai,
Na thinheng ni ahcun.
22Ka ral pawl cu khuazakip in
na sawm, puai zawh ding
bangin.
Zohman a luat theitu an um lo,
Na thinheng ni ahcun.
Ka faate pawl an that ṭheh,
Ka duhdawtmi le ka cawmmi
pawl cu.
Currently Selected:
ṬAHHLA 2: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.