JOSHUA 23
23
Joshua Ih Thucahmi
1Tikcu a hung rei ih an kiangkapih an ral pawl thawn daihnak Bawipa in Israel mi hnenih a pek hnuah Joshua cu a tarzet thlang. 2Cutikah Israel mi hmuahhmuah an upa pawl, an hruaitu pawl, thureltu pawl le an bawi pawl thawn a ko ih, “Kei hi ka tarzet thlang. 3Bawipa nan Pathian in nanmah ih ruangah hi ramih a rak ummi miphun pawl parah thil a tuahmi cu nan hmu thluh zo. Nanmah lam ṭang in Bawipa nan Pathian in ral a do a si. 4Ngai uh; kan neh hrih lomi miphun pawl siseh, kan neh zomi nisuahnak lamah Jordan ihsin nitlaknak lamah Mediterranean Tifinriat tiang a ummi miphun pawl siseh, nanmah ih pawl nan co dingah ka lo pe zo a si. 5Bawipa nan Pathian in hi miphun pawl cu nan hmai ihsin a dawi ding ih an tlan vivo ding. Cule Bawipa nan Pathian ih a lo tiamkam vekin an ram cu nan luah ding. 6Curuangah cakzet le fimkhur zetin nung uh. Moses ih pekmi Daan cabu sungih an ngan vekin tuah uhla thlun uh; malte hman vorhlamah siseh, kehlamah siseh, pial hlah uh. 7Nanmah lakih a taang hrihmi hi ram minung pawl thawn cawkrawi-aw in ṭhi-aw hlah uh; an khawzing pawl ih hmin tla sal hlah uh, an hmin in siatcamnak khal tuah hlah uh, an hna khal ṭuan hlah uhla an hmaiah nan lu khal kun hlah uh. 8Tuihsun tiang Bawipa nan pomhnget bangin hmailam khalah pomhnget ringring uh. 9Bawipa in a cakmi le a nasazetmi miphun cu, hmailam nan nor vivo tikah, a rak dawi ih a lo do theitu zohman an um hrih lo. 10A lo tiamkam bangtuk in nanmah ṭan in Bawipa nan Pathian in a do ruangah nanmah lakih mi pakhat hman in nan ral thawngkhat nan dawi thei a si. 11Cuti a si ruangah Bawipa nan Pathian duhdawtu si dingah fimkhur zetin nung uh. 12Dunglet her tahrat in nan kiangih a um hrih mi miphun pawl hi nan kom ih nan ṭhit awk a si ahcun, 13Bawipa nan Pathian in hi miphun pawl cu a dawi nawn lo ding, ti kha atu ihsin thei cia uh. Nan hrangah korhrum bangtuk le thang bangtuk in ṭihnungza an si pei ih nan zaang vuaknak fung le nan mit sungih hling bangin nan tuar ding. Bawipa nan Pathian in a lo pekmi hi ramṭha ihsin nan cem thluh lai hlan lo cuticun nan tuar ding a si.
14“Kei cu ka thi cing ding. Bawipa nan Pathian in thil ṭha a lo tiamkammi hmuahhmuah cu a zatein tlamtling zetin a kimter thluh zo, ti cu nan thinlung zatein nan theih kerker thluhmi a si. A tiamkammi hmuahhmuah cu a kimter thluh zo, pakhatte hman a pelh lo. 15Bawipa nan Pathian in tuahsuak ding ih a lo tiamkam mi hmuahhmuah cu a tuah ṭheh zo a si. Sikhalsehla nan tlunih thil ṭha a tuahsuaktu Pathian ih thu nan thlun lo a si ahcun nan parah thil ṭha lo a thlenter ding. 16Bawipa nan Pathian in thlun ding tiih thu a lo pekmi thukamnak cu nan thlun lo ih khawzing dangdang tla nan thlun ih nan biak sawn a si ahcun nan parah a thin a heng ding ih a lo pek ciami hi ram ṭha-ah hin milai pakhat hman taang loin nan cemral thluh ding a si,” tiah a ti.
Currently Selected:
JOSHUA 23: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
